মাত্ৰ ১৪ দিনতে ৯ টি শিশুৰ মৃত্যু! মধ্যপ্ৰদেশত কফ চিৰাপে সাধাৰণ জনতাৰ মাজত বিয়পাইছে আতংক। জানিব পৰা মতে শিশুসকলক বিষাক্ত কাহৰ চিৰাপ খুওৱাৰ বাবে তেওঁলোকৰ বৃক্ক বিকল হৈ নিশাটোৰ ভিতৰতে মৃত্যুক সাৱটি লয়। সম্প্ৰতি সমগ্ৰ ঘটনাই কাহৰ চিৰাপ নিৰ্মাতাসকলক লৈ প্ৰশ্ন উত্থাপন কৰিছে।
যোৱা কেইদিনমানৰ পৰা মধ্যপ্ৰদেশৰ ছিণ্ডৱাৰা আৰু ৰাজস্থানৰ ছিকাৰত একেৰাহে শিশুৰ মৃত্যু ঘটিছে। সামান্য জ্বৰৰ বাবে হঠাতে বৃক্ক বিকল হৈ কেইবাজনো শিশু মৃত্যুমুখত পৰিছিল। মুঠতে বৃহস্পতিবাৰলৈকে ছিণ্ডৱাৰাত ৯ টি শিশুৰ মৃত্যু হৈছে। ইতিমধ্যে কাহৰ চিৰাপ সন্দৰ্ভত ছিণ্ডৱাৰাত বিশেষ সতৰ্কবাণী জাৰি কৰা হৈছে। কোনো ৰুগীয়া শিশুৰ জ্বৰ হ’লে চৰকাৰী চিকিৎসালয়ত ৬ ঘণ্টা ধৰি শিশুটিক নিৰীক্ষণত ৰখা হৈছে। যদি অৱস্থাৰ অৱনতি ঘটে তেন্তে শিশুকেইটিক জিলা চিকিৎসালয়লৈ প্ৰেৰণ কৰা হ’ব। ব্যক্তিগত চিকিৎসকক জ্বৰত আক্ৰান্ত শিশুৰ চিকিৎসা নকৰিবলৈ পৰামৰ্শ দিয়া হৈছে। উল্লেখ্য যে, ৰাজস্থান চৰকাৰে ১৯টা বেচৰ কাহৰ চিৰাপ বিক্ৰী কৰাত নিষেধাজ্ঞা আৰোপ কৰিছে।
জানিব পৰা মতে ৰুগীয়া শিশুসকলৰ প্ৰথমে জ্বৰ, চৰ্দি আৰু কাহৰ দৰে লক্ষণ দেখা গৈছিল। ডাক্তৰৰ ওচৰলৈ নিয়াৰ সময়ত চিকিৎসকে কেইটামান সাধাৰণ ঔষধ দিয়ে। তাৰে ভিতৰত এটা আছিল এই কাহৰ চিৰাপ। সেই চিৰাপ সেৱন কৰাৰ পাছত লাহে লাহে শিশুসকল সুস্থ হৈ উঠিছিল যদিও কিছুদিন পাছত হঠাতে তেওঁলোকৰ শাৰীৰিক অৱস্থাৰ অৱনতি ঘটে। অভিযোগ অনুসৰি শিশুসকলৰ প্ৰস্ৰাৱ কৰা প্ৰক্ৰিয়া বন্ধ হৈ যায়। ইয়াৰ পাছত এই সংক্ৰমণ বৃক্কলৈ বিয়পি পৰে। পৰৱৰ্তী সময়ত যোৱা ১৫ দিনত ইটোৰ পিছত সিটোকৈ ৯টি শিশুৰ মৃত্যু হয়। পৰিয়ালৰ সূত্ৰ অনুসৰি মৃত আটাইকেইটা শিশুৰ বয়স পাঁচ বছৰৰ তলৰ। এই কাহৰ চিৰাপ সেৱন কৰি আৰু ১০ টি শিশু গুৰুতৰভাৱে অসুস্থ হৈ পৰিছে।
