বিজেপি নেতৃত্বাধীন ড° হিমন্ত বিশ্ব শৰ্মাৰ নতুন চৰকাৰ খনে এমাহ পাৰ কৰিলে। এই কালছোৱাত, সামগ্ৰীক ভাবে সকলো ক্ষেত্ৰতে মূল্যাংকন কৰাটো অনুচিত হ’ব, ইতিমধ্যে তেওঁলোকে ৰাইজক দিয়া প্ৰতিশ্ৰুতিৰ মোনাখনত অত্যাধিক বোজা আছে। যদিও এই এমহীয়া শাসনকালত, চৰকাৰখনে কেইটামান সমাজ শুধাৰক পদক্ষেপ গ্ৰহণ কৰিছে। এই মন্তব্য কংগ্ৰেছ নেতা দেৱব্ৰত শইকীয়াৰ।
শইকীয়াই কয় —বিশেষকৈ, ড্ৰাগছ্ আৰু ছিণ্ডিকেটৰ বিৰুদ্ধে লোৱা পদক্ষেপক মই আদৰণি জনাইছোঁ। এয়া আৰম্ভণিহে, ইয়াক সমাজৰ পৰা সমুলঞ্চে নাইকীয়া কৰিবলৈ চৰকাৰে আৰু অধিক উৎসাহেৰে কাম কৰি যাব লাগিব। মাত্ৰ এমহীয়া চমক দেখুৱাই এই অভিযান সমূহ পিছলৈ আঁতৰাই থৈ দিলে, এয়া মাত্ৰ এক প্ৰচাৰৰ আহিলা হিচাপেহে পৰিগণিত হ’ব। সেয়েহে এই অভিযান পুৰ্ণ গতিত চলাই নিব বুলি মই চৰকাৰৰ পৰা আশা ৰাখিছোঁ।
কিন্তু এটা কথা মন কৰিবলগীয়া যে, আমি আগৰপৰাই যিবোৰ দুৰ্নীতি, ভ্ৰষ্টাচাৰৰ বিৰুদ্ধে চৰকাৰখনক অৱগত কৰাই আহিছিলোঁ, সেয়া যে সত্য আছিল, আজি বৰ্তমান চৰকাৰে ড্ৰাগছ্ , ছিণ্ডিকেট ইত্যাদিৰ ক্ষেত্ৰত দেখুওৱা তৎপৰতাৰ পৰাই উমান পোৱা যায়, যদিও যোৱা সময়চোৱাত, পুৰণি বিজেপি চৰকাৰখনে, এই সকলোবোৰ বিষয়ৰ ওপৰত নিমাত হৈ আছিল আৰু দুৰ্নীতিৰ বিৰুদ্ধে শূণ্য সহনশীলতাৰ ফটা ঢোল পিটি আছিল। যি নহওঁক, আজি ৬১ মাহৰ পিছত বিজেপি চৰকাৰ খনে এইবোৰ ক্ষেত্ৰত দেখুওৱা তৎপৰতাৰ বাবে মই ধন্যবাদ জ্ঞাপন কৰিছোঁ।
ড° হিমন্ত বিশ্ব শৰ্মা ডাঙৰীয়াৰ নেতৃত্বত হোৱা এই চৰকাৰ খনে বিধানসভাৰ মজিয়াত, ১লাখ নিবনুৱা যুৱক-যুৱতীক গণি গণি চাকৰি দিয়াৰ কথা উল্লেখ কৰিছে, তাক মই আদৰণি জনাইছোঁ, কিন্তু, যোৱা নিৰ্বাচনত, তেখেত সকলে ২৫ লাখ নিবনুৱাক চাকৰি দিয়াৰ প্ৰতিশ্ৰুতি দিছিল আৰু সেই হিচাপত, ২৪ লাখ নিবনুৱাকো কৰ্ম সংস্থাপন দিয়াৰ ব্যৱস্থা চৰকাৰে গ্ৰহণ কৰিব লাগিব।
মুখ্যমন্ত্ৰীয়ে কৈছে যে, প্ৰতিমাহে ১০ তাৰিখৰ আগত ‘অৰুণোদয়’, ‘বৃদ্ধ-পেঞ্চন’ আদিৰ পাবলগীয়া ধন হিতাধিকাৰী সকলে পাব, যিটো সংবাদ মাধ্যমে হওক বা ছোছিয়েল মিডিয়াতে হওক অলপ বেছিকৈ চৰ্চিত কৰিছে, যদিও মই এইটো কোনো বিশেষ সাফল্য বুলি ক’ব নিবিচাৰোঁ।
যিহেতু, মন্ত্ৰী, বিধায়কৰ পৰা কৰ্মচাৰী সকলে তেওঁলোকৰ দৰমহা মাহৰ প্ৰথমটো সপ্তাহতে পাই, গতিকে হিতাধিকাৰী সকলে ও এই ধন প্ৰতি মাহৰ প্ৰথম সপ্তাহতে পাব লাগে। ইয়াৰ উপৰিও, যোৱা ৭ বছৰ ধৰি কেন্দ্ৰত বিজেপি দলৰ চৰকাৰ আছে, যোৱা ৫ বছৰ অসমত বিজেপি নেতৃত্বাধীন চৰকাৰ আছিল, তেনে ক্ষেত্ৰত এয়া সিমান কঠিন কাম হ’ব নালাগে।
এতিয়া যিহেতু সমগ্ৰ দেশৰ লগতে আমাৰ ৰাজ্যখনো ক’ভিড মহামাৰীৰ কবলত আছে। কিন্তু যোৱা বছৰ ক’ভিড মহামাৰীৰ প্ৰতিৰোধৰ ক্ষেত্ৰত, স্বাস্থ্য বিভাগে যি ধৰণে পদক্ষেপ গ্ৰহণ কৰিছিল, এইবাৰ তেনেকুৱা তৎপৰতা দেখিবলৈ পোৱা নাই। বিশেষকৈ যিধৰণে, ৰাজ্যতে, ৪৫ বছৰৰ উৰ্দ্ধৰ তথা ১৮ বছৰ বা তাৰ উৰ্দ্ধৰ লোক সকলক টীকাকৰণ কৰাৰ প্ৰক্ৰিয়া আগবঢ়াব লাগিছিল, তেনেকুৱা দেখিবলৈ পোৱা নাই। আমি সকলোৱে দেখিছোঁ, প্ৰতিষেধক টীকাৰ অভাৱত টীকাকৰণ প্ৰক্ৰিয়া লেহেমীয়া হৈ পৰিছে। ” ডাবল ইঞ্জিনৰ ” চৰকাৰৰ পৰা ৰাইজে এই ধৰণৰ ফল আশা কৰা নাছিল। মোৰ নিজৰ সমষ্টিতে এতিয়াও মৃত্যুৰ হাৰ ৫.৫% হৈ আছে।
এমাহ একেবাৰে কম সময় এই চৰকাৰৰ কাম-কাজৰ ওপৰত মূল্যাংকন কৰিবলৈ, তথাপিও চৰকাৰৰ বহুত কৰণীয় আছে আগন্তুক সময়ত। বিশেষকৈ ৬ জনগোষ্ঠীৰ জনজাতিকৰণ, চাহ শ্ৰমিক সকলৰ মজুৰি বৃদ্ধি, গৰাখহনীয়া প্ৰতিৰোধ কৰা, বান নিয়ন্ত্ৰণ কৰা, নিবনুৱা সমস্যা সমাধান কৰাৰ লগতে, যোৱা সময়চোৱাত, যেনেকৈ চৰকাৰখনে উন্নয়নমূলক কাম-কাজত বিৰোধী পক্ষৰ বিধায়ক সকলৰ লগত পক্ষপাতিত্ব কৰিছিল, সেয়া আঁতৰাই উন্নয়নৰ কাম কৰিবলৈ সকলোকে সুবিধা দিব লাগিব। ইয়াৰ জৰিয়তে, নতুন চৰকাৰ খনক পুনৰবাৰ মোৰ শুভেচ্ছা জ্ঞাপন কৰিছোঁ।
