সদস্যপদ দিয়াক লৈ বিতৰ্কৰ আৱৰ্তত সোমাই পৰিছে গুৱাহাটী প্ৰেছ ক্লাব৷ সদস্য তালিকাৰ পৰা কেইবাগৰাকীও কৰ্মৰত সাংবাদিকক আঁতৰাই দিয়াৰ অভিযোগৰ পাছতে গুৱাহাটী প্ৰেছ ক্লাৱৰ সদস্য বাছনি প্ৰক্ৰিয়াক লৈ প্ৰশ্ন উত্থাপন হৈছে।
নাম প্ৰকাশ নকৰাকৈয়ে বহুকেইজন সাংবাদিকে দাবী কৰিছে যে কোনো বৈধ কাৰণ উল্লেখ নকৰাকৈয়ে ডিজিটেল সংবাদ মাধ্যমৰ লগত জড়িত সাংবাদিক-সংবাদকৰ্মীৰ এটা অংশক এই সন্মানীয় সংস্থাটোৰ তালিকাৰ পৰা আঁতৰাই দিয়া হৈছে।
নৰ্থইষ্ট নাওৰ সাংবাদিক কোকিল শইকীয়াই নিজৰ উদ্বেগ প্ৰকাশ কৰি কয় যে, “মই যোৱা পাঁচ বছৰ ধৰি সংবাদ মাধ্যমৰ সৈতে কাম কৰি আহিছো। তিনি বছৰ আগতে গুৱাহাটী প্ৰেছ ক্লাবৰ সদস্য হৈছিলো। কিন্তু সদস্যপদ নবীকৰণৰ বাবে আবেদন কৰাৰ পাছতো মোৰ আবেদন নাকচ কৰা হৈছিল।”
শইকীয়াই উল্লেখ কৰে যে ইয়াৰ অৰ্থ হ’ল তেওঁ আৰু আঁতৰোৱা আনসকলে এইবাৰৰ প্ৰেছ ক্লাবৰ নিৰ্বাচনত ভোট দিব নোৱাৰিব।
আন এটা অভিযোগ অনুসৰি প্ৰথমতে কেইবাজনো জ্যেষ্ঠ সাংবাদিকৰ নাম কোনো কাৰণ নোহোৱাকৈয়ে তালিকাৰ পৰা আঁতৰাই পেলোৱাৰ অভিযোগ উত্থাপন হৈছে। পৰৱৰ্তী সময়ত সাংবাদিসকলে আপত্তি দৰ্শোৱাৰ পাছত এই নামসমূহৰ কিছুমান নাম পুনৰ সন্নিৱিষ্ট কৰাৰ বিপৰীতে প্ৰথমতে কৰা নামকৰ্তনক লৈহে সন্দেহৰ সৃষ্টি হৈছে।
ইয়াৰ বিপৰীতে কিছুমান সংবাদ গোষ্ঠীৰ অতি সীমিত অভিজ্ঞতা থকা সংবাদকৰ্মীক সদস্যপদ দিয়া হৈছে বুলিও দাবী উত্থাপন হৈছে।
আনকি এজন সাংবাদিকে গুৱাহাটীৰ এটা বিশিষ্ট সংবাদ মাধ্যমৰ পৰা সংবাদসেৱাৰ সৈতে পোনপটীয়া সম্পৰ্ক নথকা লোককো সদস্যপদ দিয়াৰ অভিযোগ উত্থাপন কৰিছে৷ যাৰ ফলত সদস্য বাছনি প্ৰক্ৰিয়াত ব্যৱহাৰ কৰা স্বচ্ছতা আৰু মাপকাঠীক লৈ প্ৰশ্নৰ অৱতাৰণা কৰিছে।
