উত্তৰাখণ্ডৰ ৰাজধানী ডেৰাডুনত সংঘটিত এক অনাকাংক্ষিত ঘটনাই এতিয়া ৰাজ্যখনৰ শৈক্ষিক তথা ৰাজনৈতিক মহলত তীব্ৰ চাঞ্চল্যৰ সৃষ্টি কৰিছে। এখন চৰকাৰী বিদ্যালয়ৰ নাম সলনি কৰাক কেন্দ্ৰ কৰি শাসকীয় দলৰ বিধায়কৰ সমৰ্থকৰ দ্বাৰা শিক্ষা সঞ্চালকক নিজ কাৰ্যালয়ৰ ভিতৰতে শাৰীৰিকভাৱে অপদস্থ কৰাৰ গুৰুতৰ অভিযোগ উত্থাপন হৈছে। এই কাৰ্যই কেৱল চৰকাৰী কাৰ্যালয়ৰ সুৰক্ষা ব্যৱস্থাকেই উদঙাই দিয়া নাই, বৰঞ্চ ক্ষুব্ধ শিক্ষক সমাজৰ ধৰ্মঘট আৰু আগন্তুক ব’ৰ্ড পৰীক্ষা বৰ্জনৰ হুংকাৰে ৰাজ্য চৰকাৰক এক গভীৰ প্ৰশাসনিক সংকটৰ মাজলৈ ঠেলি দিছে।
কেমেৰাত বন্দী হোৱা এই ঘটনাই সমগ্ৰ ৰাজ্যজুৰি শিক্ষক আৰু প্ৰশাসনিক কৰ্মচাৰীসকলৰ মাজত ব্যাপক প্ৰতিবাদৰ সূচনা কৰিছে। আনকি প্ৰতিবাদকাৰীসকলে আগন্তুক ব’ৰ্ডৰ পৰীক্ষাসমূহো বৰ্জন কৰাৰ হুংকাৰ দিছে, যাৰ ফলত পৰীক্ষা প্ৰক্ৰিয়া বাধাগ্ৰস্ত হোৱাৰ আশংকাই দেখা দিছে
প্ৰত্যক্ষদৰ্শী আৰু ভাইৰেল হোৱা ভিডিঅ’ ফুটেজ অনুসৰি, বিধায়কগৰাকীৰ সমৰ্থকসকলে সঞ্চালক নৌদিয়ালৰ সৈতে তীব্ৰ বাকবিতণ্ডাত লিপ্ত হয়। পৰৱৰ্তী সময়ত সঞ্চালকগৰাকীক শাৰীৰিকভাৱে অপদস্থ কৰাৰ লগতে চকী দলিওৱাৰ দৰে হিংসাত্মক পৰিস্থিতিৰ সৃষ্টি কৰে। জানিব পৰা মতে, স্থানীয় এখন চৰকাৰী বিদ্যালয়ৰ নাম ভূমিদাতা পদম সিং ৰাৱটৰ নামেৰে নামকৰণ কৰাৰ দাবীক কেন্দ্ৰ কৰিয়েই এই বিবাদৰ সূত্ৰপাত হৈছিল।
চিকিৎসালয়ৰ পৰা এই সমগ্ৰ ঘটনাৰ বিষয়ে বৰ্ণনা কৰাৰ সময়ত নৌদিয়ালক যথেষ্ট শংকিত অৱস্থাত দেখা গৈছিল। তেওঁ জানিবলৈ দিয়ে যে বিধায়ক উমেশ শৰ্মা ‘কাউ’ আৰু তেওঁৰ সমৰ্থকসকলে বিদ্যালয়খনৰ নাম তৎকালীনভাৱে সলনি কৰাৰ দাবী লৈ কাৰ্যালয়ত উপস্থিত হৈছিল। কিন্তু সঞ্চালকগৰাকীয়ে চৰকাৰী প্ৰতিষ্ঠানৰ নাম সলনি কৰাৰ কৰ্তৃত্ব সঞ্চালকালয়ৰ নহয়, বৰঞ্চ ৰাজ্য চৰকাৰৰ অধীনতহে পৰে বুলি স্পষ্ট কৰি দিয়াৰ পিছতেই তেওঁলোকে আক্ৰমণাত্মক ৰূপ ধাৰণ কৰে।
সঞ্চালকগৰাকীৰ ওপৰত হোৱা এই শাৰীৰিক আক্ৰমণৰ খবৰ বিয়পি পৰাৰ লগে লগেই সঞ্চালকালয়ৰ পৰিৱেশ উত্তপ্ত হৈ পৰে। ক্ষুব্ধ কৰ্মচাৰীসকলে প্ৰতিবাদস্বৰূপে বিধায়কগৰাকীকে কাৰ্যালয়ৰ এটা কোঠাৰ ভিতৰত আবদ্ধ কৰি ৰাখে। অৱশ্যে, বিধায়কগৰাকীৰ সমৰ্থকসকলে তেওঁক “উদ্ধাৰ” কৰিবলৈ কাৰ্যালয়ৰ দুৱাৰ ভাঙি পেলোৱাৰ অভিযোগ উত্থাপন হোৱাৰ পিছত পৰিস্থিতি অধিক ভয়াৱহ হৈ পৰে।
উদ্ধাৰৰ পিছতে আঘাতপ্ৰাপ্ত নৌদিয়ালক চিকিৎসাৰ বাবে ডেৰাডুনৰ চৰকাৰী জিলা চিকিৎসালয়ত ভৰ্তি কৰোৱা হয়। দুয়োটা পক্ষৰ মাজত যাতে পুনৰ কোনো সংঘৰ্ষ নহয়, তাৰ বাবে সঞ্চালকালয়ত বৃহৎ পৰিমাণৰ আৰক্ষী মোতায়েন কৰা হৈছে। এই ঘটনাই সমগ্ৰ শৈক্ষিক সমাজত তীব্ৰ চাঞ্চল্যৰ সৃষ্টি কৰিছে।
উত্তৰাখণ্ডৰ বিষয়া, কৰ্মচাৰী আৰু শিক্ষক ফেডাৰেচনে চৰকাৰী কাৰ্যালয়ৰ ভিতৰত সংঘটিত হোৱা এই “অৰাজকতা”ক তীব্ৰ ভাষাৰে গৰিহণা দিছে। ফেডাৰেচনৰ সভাপতি দীপক যোশীয়ে প্ৰশাসনক কঠোৰ সকীয়নি দি কয় যে চৰকাৰী কাৰ্যালয়ত প্ৰৱেশ কৰি এগৰাকী উচ্চ পদস্থ বিষয়াক আক্ৰমণ কৰাটো চৰম লজ্জাজনক কাৰ্য। তেওঁলোকে দোষীৰ বিৰুদ্ধে তৎকালীন আইনী ব্যৱস্থা গ্ৰহণৰ দাবী জনায়। লগতে তেওঁ প্ৰশ্ন উত্থাপন কৰে যে, যদি জ্যেষ্ঠ বিষয়াগৰাকীৰেই সুৰক্ষা নিশ্চিত কৰিব পৰা হোৱা নাই, তেন্তে সাধাৰণ কৰ্মচাৰীসকলে কেনেকৈ নিৰাপত্তা অনুভৱ কৰিব?
ক্ষোভিত শিক্ষকসকলে এতিয়া আগন্তুক ব’ৰ্ড পৰীক্ষাৰ দায়িত্বৰ পৰা বিৰত থকাৰ হুংকাৰ দিছে। ইতিমধ্যে সঞ্চালকালয়ৰ কৰ্মচাৰীসকলে ধৰ্মঘট ঘোষণা কৰাৰ ফলত প্ৰশাসনিক কাম-কাজ সম্পূৰ্ণৰূপে স্তব্ধ হৈ পৰিছে। বিৰোধী দলেও এই পৰিস্থিতিৰ সুযোগ লৈ ঘটনাটোক শাসকীয় দলৰ “ক্ষমতাৰ অপব্যৱহাৰ”ৰ এক জ্বলন্ত উদাহৰণ বুলি অভিহিত কৰিছে। উত্তৰাখণ্ড কংগ্ৰেছৰ মুখপাত্ৰ গৰিমা মাহৰা দাসাউনীয়ে বিজেপি বিধায়ক উমেশ শৰ্মা ‘কাউ’ক দুষ্কৃতিকাৰীৰ সৈতে মিলি শিক্ষা সঞ্চালকক আক্ৰমণ কৰাৰ অভিযোগত তীব্ৰ সমালোচনা কৰে। তেওঁ কয় যে এই কাৰ্যই গণতান্ত্ৰিক মূল্যবোধক ম্লান কৰিছে আৰু বিজেপিৰ শাসনকালত ৰাজ্যখনত আইন-শৃংখলা সম্পূৰ্ণৰূপে ব্যৰ্থ হৈছে।
