দিল্লীৰ ইন্দিৰা গান্ধী আন্তঃৰাষ্ট্ৰীয় বিমানবন্দৰত এয়াৰ ট্ৰেফিক কণ্ট্ৰ’ল (ATC) চাৰ্ভাৰত হোৱা এক গুৰুতৰ কাৰিকৰী বিজুতিৰ ফলত যাত্ৰীসকলৰ মাজত হাহাকাৰৰ সৃষ্টি হৈছে। ইখনৰ পিছত সিখন বিমানৰ উৰণ পলম হোৱাৰ ফলত বৰ্তমানলৈকে ৮০০ খনতকৈও অধিক আগমন আৰু প্ৰস্থান বিমান সেৱাত ব্যাঘাত জন্মিছে।
ATC ব্যৱস্থাৰ Automatic Message Switching System (AMSS)-ত কাৰিকৰী বিজুতি হোৱাৰ বাবে এই সমস্যাৰ সৃষ্টি হৈছে। ইয়াৰ ফলত বিমান পৰিচালনাৰ বাবে প্ৰয়োজনীয় তথ্যৰ আদান-প্ৰদানত অসুবিধা হৈছে।
ATC কৰ্তৃপক্ষই জনোৱা অনুসৰি, তেওঁলোকে বৰ্তমান সমস্যা সমাধানৰ বাবে অহৰহ কাম কৰি আছে যদিও সফলতা লাভ কৰিব পৰা নাই। ফলস্বৰূপে বিমান সেৱা বিঘ্নিত হৈ আছে আৰু বৰ্ডিং গেটত যাত্ৰীৰ ভিৰৰ বাবে যানজঁটৰ সৃষ্টি হৈছে।
বিমান বন্দৰ কৰ্তৃপক্ষই যাত্ৰীসকলক ধৈৰ্য সহকাৰে অপেক্ষা কৰিবলৈ আহ্বান জনাইছে। লগতে, শেহতীয়া আপডেটৰ বাবে নিজৰ বিমান সংস্থাৰ সৈতে যোগাযোগ কৰিবলৈ পৰামৰ্শ দিছে।
সামাজিক মাধ্যমত পোষ্ট কৰি ইণ্ডিগ’ই জনাইছে যে ATC ব্যৱস্থাৰ এই কাৰিকৰী সমস্যাৰ বাবে দিল্লী আৰু উত্তৰৰ বিভিন্ন অঞ্চলৰ বিমান সেৱাত ব্যাঘাত জন্মিছে। যাত্ৰীসকলক ইণ্ডিগ’ৰ ৱেবছাইট পৰীক্ষা কৰিবলৈ আহ্বান জনোৱা হৈছে।
ইণ্ডিয়াইও যাত্ৰীসকলক ধৈৰ্য ধৰিবলৈ আহ্বান জনাইছে আৰু জনাইছে যে সমস্যা ঠিক হ’লে পুনৰ বিমান সেৱা আৰম্ভ হ’ব।
সমস্যাটোৰ তাৎক্ষণিক সমাধানৰ বাবে প্ৰচেষ্টা অব্যাহত আছে আৰু ইয়াৰ ফলত যাত্ৰীসকল যথেষ্ট অসুবিধাত পৰিছে।
