যাত্ৰাপথত চৰাইৰ খুন্দা: কন্নুৰত জৰুৰী অৱতৰণ দিল্লী অভিমুখী এয়াৰ ইণ্ডিয়াৰ বিমানৰ
কেৰালাৰ কোজিকোড বিমানবন্দৰৰ পৰা দিল্লী অভিমুখে উৰা মৰাৰ কিছু সময় পিছতে যাত্ৰাপথত চৰাইৰ খুন্দাৰ ফলত সোমবাৰে এয়াৰ ইণ্ডিয়াৰ এখন বিমান কন্নুৰ আন্তঃৰাষ্ট্ৰীয় বিমানবন্দৰত অৱতৰণ কৰিবলৈ বাধ্য হয়।
এয়াৰ ইণ্ডিয়া এয়াৰলাইনছৰ এগৰাকী বিষয়াই এই আকস্মিক ঘটনাৰ বিষয়ে সদৰী কৰি এক বিবৃতি যোগে কয় যে চৰাইৰ খুন্দাৰ বাবে সুৰক্ষামূলক ব্যৱস্থা হিচাপে বিমানখন পৰীক্ষণৰ উদ্দেশ্যে জৰুৰী অৱতৰণ কৰা হয়।
আনহাতে কন্নুৰ বিমানবন্দৰ কৰ্তৃপক্ষই আন এক বিবৃতিত কয় যে ১৩৫ গৰাকী যাত্ৰী কঢ়িয়াই নিয়া বিমানখন কোজিকোডৰ পৰা দিল্লীলৈ উৰা মাৰিছিল। যাত্ৰাপথত আকস্মিক ঘটনাৰ বাবে বিমানখনে কন্নুৰ বিমানবন্দৰত অৱতৰণ কৰিছিল।
বিমানখনত থকা ১৩৫ গৰাকী যাত্ৰীৰ ভিতৰত ৮৫ গৰাকী কোজিকোডৰ আৰু ৫০ গৰাকী কন্নুৰৰ লোক আছিল বুলি বিমানবন্দৰৰ এগৰাকী বিষয়াই সংবাদ মাধ্যমৰ আগত উল্লেখ কৰে।
অৱশ্যে যাত্ৰীসকল সম্পূৰ্ণ সুৰক্ষিত অৱস্থাত আছিল বুলি বিষয়াগৰাকীয়ে লগতে জানিবলৈ দিয়ে।
বিমানখনত থকা বিদেশ ভ্ৰমণ কৰিবলগীয়া যাত্ৰীসকলক আন বিমানত দিল্লীলৈ প্ৰেৰণৰ বাবে তৎকালীনভাৱে ব্যৱস্থা গ্ৰহণ কৰা হয় বুলি কৰ্তৃপক্ষই বিবৃতিত উল্লেখ কৰে।
আনহাতে দিল্লী অভিমুখী যাত্ৰীসকলক কন্নুৰৰ দুখন হোটেলত ৰখোৱাৰ ব্যৱস্থা কৰা হয়। আজি এই যাত্ৰীসকলৰ ভ্ৰমণৰ ব্যৱস্থা কৰা হ’ব বুলিও বিমানবন্দৰ কৰ্তৃপক্ষই জানিবলৈ দিয়ে।