দক্ষিণ আফ্ৰিকাৰ বিৰুদ্ধে বুধবাৰৰ পৰা আৰম্ভ হ’বলগীয়া টি-২০ শৃংখলাৰ পূৰ্বে আঘাতৰ সমস্যাই চিন্তাত পেলাইছে ভাৰতীয় শিবিৰক। আঘাতৰ বাবে শৃংখলাৰ পৰা বাহিৰ হ’বলগীয়া হৈছে শেহতীয়াকৈ ভাৰতৰ হৈ ক্ৰিকেটৰ চুটি ফৰ্মেটটোত উজ্জীৱিত প্ৰদৰ্শন আগবঢ়াই অহা উদীয়মান বেটাৰ দীপক হুডা।
আনহাতে ক’ভিদৰ বাবে শৃংখলাটোৰ বাবে দলৰ পৰা বাদ পৰিছে পেচাৰ মহম্মদ ছামিও। এই দুই তাৰকাৰ বাদেও দলৰ নিৰ্ভৰযোগ্য তাৰকা অলৰাউণ্ডাৰ হাৰ্দিক পাণ্ডিয়াকো শৃংখলাটোত বিশ্ৰাম দিয়াৰ সিদ্ধান্ত লৈছে বিচিচিআই- এ।
এই তিনি খেলুৱৈৰ অনুপস্থিতিত দলত অন্তৰ্ভুক্ত কৰা হৈছে বেটাৰ শ্ৰেয়স আয়াৰ, যুৱ অলৰাউণ্ডাৰ শ্বাহবাজ আহমেদ আৰু পেচাৰ উমেশ যাদৱক। বিচিচিআইৰ এগৰাকী বিষয়াই সংবাদ মাধ্যমৰ আগত এই বিষয়ে সদৰী কৰিছে।
“ছামি বৰ্তমানলৈকে ক’ভিদৰ পৰা সম্পূৰ্ণ সুস্থ হৈ উঠা নাই। তেওঁক আৰু কিছু অধিক সময়ৰ প্ৰয়োজন। সেয়েহে ছামি দক্ষিণ আফ্ৰিকা শৃংখলাৰ পৰা বাহিৰ হ’ব আৰু উমেশ যাদৱ দক্ষিণ আফ্ৰিয়া শৃংখলাৰ বাবে ছামিৰ পৰিৱৰ্তে দলত থাকিব।”— বিচিচিআইৰ বিষয়াগৰাকীয়ে সংবাদ মাধ্যমৰ আগত এইদৰে কয়।
উল্লেখ্য যে তিনিখনীয়া মেচৰ শৃংখলাটো ২৮ ছেপ্টেম্বৰৰ পৰা তিৰুৱন্তপুৰমত আৰম্ভ হ’ব। এই শৃংখলাৰ পাছতে দক্ষিণ আফ্ৰিকাৰ বিৰুদ্ধেই তিনিখনীয়া মেচৰ এদিনীয়া শৃংখলাতো অৱতীৰ্ণ হ’ব ভাৰতীয় দল।