দৈনিক ন ন তথ্য উদঘাটন হৈছে দিল্লীৰ চাঞ্চল্যকৰ নিকি যাদৱ হত্যাকাণ্ডৰ। নিজৰ লিভ-ইন সংগীয়ে যুৱতীগৰাকীক হত্যা কৰি এখন ৰেষ্টুৰেণ্টৰ ফ্ৰীজৰ ভিতৰত ভৰাই থোৱা মৃতদেহ যোৱা মঙলবাৰে উদ্ধাৰ হোৱাৰ পিছত হত্যাকাণ্ড সন্দৰ্ভত আৰক্ষীয়ে চলাই থকা জোৰদাৰ তদন্তত শেহতীয়াকৈ এক নতুন তথ্য পোহৰলৈ আহিছে।
আৰক্ষীয়ে সদৰী কৰা অনুসৰি নিকি যাদৱক হত্যা কৰাত তেওঁৰ প্ৰেমিক তথা হত্যাত অভিযুক্ত চাহিল গেহলটক তেওঁৰ পিতৃ তথা পৰিয়ানৰ আন সদস্যয়ো সহায় কৰিছিল। ইতিমধ্যে দিল্লী আৰক্ষীয়ে গেহলটৰ পিতৃৰ লগতে পৰিয়ালৰ আন তিনিগৰাকী সদস্য আৰু বন্ধু-বান্ধৱীকো গ্ৰেপ্তাৰ কৰিছে।
দিল্লী আৰক্ষীৰ এগৰাকী শীৰ্ষস্থানীয় আৰক্ষী বিষয়াই সংবা মাধ্যমৰ আগত উল্লেখ হত্যাকাণ্ডৰ তদন্তৰ অগ্ৰগতি সন্দৰ্ভত কয়, “দিল্লী আৰক্ষীয়ে পাঁচ গৰাকী ব্যক্তিক গ্ৰেপ্তাৰ কৰিছে। চাহিল গেহলটৰ পিতৃকো এই পৰিকল্পনাত সহায় কৰাৰ অভিযোগত গ্ৰেপ্তাৰ কৰা হৈছে।”
ইফালে আৰক্ষীয়ে প্ৰকাশ কৰিছে আন এক চাঞ্চল্যকৰ খবৰ। দিল্লী আৰক্ষীৰ মতে, ২০২০ চনৰ অক্টোবৰ মাহত নয়ডাৰ মন্দিৰত বিবাহপাশত আবদ্ধ হৈছিল চাহিল আৰু নিকি। আৰক্ষীয়ে জানিবলৈ দিয়া মতে, চাহিলৰ পৰিয়াল এই সম্পৰ্কত মান্তি হোৱা নাছিল আৰু আন এগৰাকী যুৱতীৰ সৈতে চাহিলৰ বিবাহ ঠিক কৰি দিছিল।
কিন্তু নিকিয়ে কেতিয়াও জানিব পৰা নাছিল তেওঁৰ লিভ-ইন পাৰ্টনাৰ চাহিলৰ আন এগৰাকী যুৱতীৰ সৈতে এংগেজমেণ্ট হোৱাৰ কথা। আৰক্ষীৰ ভাষ্য মতে, চাহিলৰ এই নতুন বিয়াৰ এদিন পূৰ্বেহে এই কথা জানিব পাৰিছিল নিকিয়ে।
তদন্তৰ সময়ত আৰক্ষীয়ে নিকি যাদৱ দক্ষিণ-পশ্চিম দিল্লীৰ ভাড়াঘৰলৈ যোৱাৰ চিচিটিভি ফুটেজ উদ্ধাৰ কৰে। ৯ ফেব্ৰুৱাৰীৰ এই ভিডিঅ’টোত নিকি ভাড়াঘৰত অকলে থকা দেখিবলৈ পোৱা যায় বুলি আৰক্ষীয়ে জানিবলৈ দিয়ে।
ইফালে চাহিলে আনগৰাকী যুৱতীক বিয়া কৰাবলৈ যোৱাৰ সময়ত গাড়ীৰ ভিতৰতে প্ৰায় তিনি ঘণ্টা ধৰি দুয়ো কাজিয়াত লিপ্ত হৈছিল বুলি জানিব পৰা গৈছে। কাজিয়া তীব্ৰতৰ হোৱাৰ লগে লগে চাহিলে চাৰ্জিং কেবল ব্যৱহাৰ কৰি নিকিক ডিঙি চেপি হত্যা কৰে বুলি আৰক্ষীয়ে জানিবলৈ দিয়ে।
তাৰ পিছতেই চাহিলে নিকিৰ মৃতদেহটো ঘটনাস্থলীৰ পৰা ৪০ কিলোমিটাৰ দূৰৈত থকা নিজৰ ধাবালৈ নি মৃতদেহটো টুকুৰা-টুকুৰ কৰি ফ্ৰীজত লুকুৱাই ৰাখে। হত্যাকাণ্ডৰ পিছদিনাই আনগৰাকী যুৱতীৰ সৈতে বিবাহপাশত আবদ্ধ হৈছিল চাহিল।
