২০২০ চনৰ দিল্লী হিংসাৰ গোচৰত কেইবাগৰাকীও ৰাজনৈতিক নেতাই সকাহ লাভ কৰিছে। ‘কা’ আৰু ‘এনআৰচি’ বিৰোধী আন্দোলনৰ সময়ত উচটনিমূলক ভাষণ প্ৰদানৰ অভিযোগত এই নেতাসকলৰ বিৰুদ্ধে এজাহাৰ তথা চিট তদন্তৰ দাবী জনাই দাখিল হোৱা মুঠ ১৫ খন আবেদন সোমবাৰে দিল্লী উচ্চ ন্যায়ালয়ে একেলগে খাৰিজ কৰিছে। ৫০ জনতকৈ অধিক লোকৰ প্ৰাণহানি হোৱা এই হিংসাত্মক ঘটনাৰ আঁৰত ৰাজনৈতিক নেতাৰ উচটনি থকা বুলি অভিযোগ তুলি দাখিল হোৱা আবেদনসমূহ ন্যায়াধীশ বিবেক চৌধুৰী আৰু মনোজ জৈনৰ খণ্ড বিচাৰপীঠে নাকচ কৰে।
দিল্লী হিংসাৰ পাছতেই দাখিল হোৱা এই ৰাজহুৱা স্বাৰ্থজড়িত আবেদনসমূহত উচটনিমূলক ভাষণৰ লগতে কৰ্তব্যত গাফিলতি কৰাৰ অভিযোগত আৰক্ষী বিষয়াৰ বিৰুদ্ধেও ব্যৱস্থা গ্ৰহণৰ দাবী জনোৱা হৈছিল। শ্বেখ মুজতবা নামৰ এজন ব্যক্তিয়ে দাখিল কৰা এখন আবেদনত বিজেপি নেতা কপিল মিশ্ৰ, অনুৰাগ ঠাকুৰ, প্ৰৱেশ বাৰ্মা আৰু অভয় বাৰ্মাৰ বিৰুদ্ধে এজাহাৰ ৰুজু কৰাৰ আহ্বান জনোৱা হৈছিল। অভিযোগ অনুসৰি, হিংসাৰ ঠিক পূৰ্বে এক জনসভাত তদানীন্তন কেন্দ্ৰীয় মন্ত্ৰী অনুৰাগ ঠাকুৰে ‘কা’ বিৰোধীসকলক লক্ষ্য কৰি ‘দেশদ্ৰোহীক গুলী মাৰক’ বুলি শ্লোগান দি জনতাক উচটনি দিছিল। ইয়াৰ পাছদিনাই বিজেপি নেতা প্ৰৱেশ বাৰ্মাই কাশ্মীৰত কাশ্মীৰী পণ্ডিতসকলৰ সৈতে হোৱা ঘটনাৰ দিল্লীতো পুনৰাবৃত্তি হ’ব পাৰে বুলি সতৰ্ক কৰি দিয়াৰ লগতে শ্বাহিনবাগৰ প্ৰতিবাদকাৰীসকল সাধাৰণ লোকৰ ঘৰত সোমাই মহিলাৰ নিৰাপত্তাৰ প্ৰতি ভাবুকি কঢ়িয়াব পাৰে বুলি দাবী কৰিছিল।
আনহাতে, ‘লয়াৰ্ছ ভইচ’ নামৰ এটা সংগঠনে দাখিল কৰা আন এখন আবেদনত কংগ্ৰেছ নেত্ৰী ছোনিয়া গান্ধী, ৰাহুল গান্ধী, প্ৰিয়ংকা গান্ধী ৱাদ্ৰাৰ লগতে আম আদমী পাৰ্টীৰ নেতা মনীষ ছিছোদিয়া, আমানতুল্লাহ খান আৰু এআইএমআইএম নেতা আকবৰুদ্দিন ওৱেইছী তথা ৱাৰিছ পাঠানৰ নাম উল্লেখ কৰা হৈছিল। ইয়াৰ উপৰিও, চিপিআই(এম) নেত্ৰী বৃন্দা কাৰাটে দাখিল কৰা এখন সুকীয়া আবেদনত হিংসাৰ সময়ত আৰক্ষী, ৰেপিড একচন ফ’ৰ্চ আৰু অন্যান্য চৰকাৰী বিষয়াৰ বিৰুদ্ধে উত্থাপিত অসদাচৰণৰ নিৰপেক্ষ তদন্তৰ দাবী কৰা হৈছিল। লগতে, ‘কা’ বিৰোধী প্ৰতিবাদত কোনে ধনৰ যোগান ধৰিছিল, তাৰ ৰাষ্ট্ৰীয় তদন্তকাৰী সংস্থাৰ দ্বাৰা তদন্ত বিচাৰিও আন এখন আবেদন দাখিল কৰা হৈছিল।
উল্লেখ্য যে, নাগৰিকত্ব সংশোধনী আইন আৰু ৰাষ্ট্ৰীয় নাগৰিকপঞ্জীৰ বিৰুদ্ধে চলি থকা প্ৰতিবাদৰ মাজতেই ২০২০ চনৰ ২৪ ফেব্ৰুৱাৰীত উত্তৰ-পূব দিল্লীত ভয়ংকৰ সাম্প্ৰদায়িক সংঘৰ্ষৰ সৃষ্টি হৈছিল। অগ্নিসংযোগ আৰু ব্যাপক লুণ্ঠনৰ এই হিংসাত্মক ঘটনাত কমেও ৫৩ জন লোক নিহত হোৱাৰ লগতে প্ৰায় ৭০০ লোক গুৰুতৰভাৱে আহত হৈছিল। বৰ্তমান উচ্চ ন্যায়ালয়ৰ এই ৰায়দানৰ পাছত উক্ত নেতাসকলৰ বিৰুদ্ধে তদন্তৰ সকলো আইনী প্ৰক্ৰিয়াৰ অন্ত পৰিল।
