বৃদ্ধ পিতৃ-মাতৃৰ সম্পত্তি দখল কৰা সন্তান বা উত্তৰাধিকাৰীক বিচাৰিলেই উচ্ছেদ কৰিব পাৰে। দিল্লী উচ্চ ন্যায়ালয়ে দিলে এক ডাঙৰ ৰায়। আদালতে কয় যে পিতৃ-মাতৃৰ ওপৰত দুৰ্ব্যৱহাৰ বা অৱহেলাৰ অভিযোগ প্ৰমাণিত হ’লেই সংশ্লিষ্ট অঞ্চলৰ জিলা দণ্ডাধীশে তেওঁলোকৰ সন্তানক সম্পত্তিৰ পৰা উচ্ছেদ কৰাৰ নিৰ্দেশ দিব পাৰিব।
আদালতে কয় যে এই ক্ষমতা দিল্লী মেইণ্টেনেন্স এণ্ড ৱেলফেয়াৰ অৱ পেৰেণ্টছ এণ্ড ছিনিয়ৰ ছিটিজেনছ ৰুলছ, ২০০৯ৰ অধীনত উপলব্ধ।
দিল্লী উচ্চ ন্যায়ালয়ৰ মুখ্য ন্যায়াধীশ দেৱেন্দ্ৰ কুমাৰ উপাধ্যায় আৰু ন্যায়াধীশ তেজস কাৰিয়াৰ খণ্ড বিচাৰপীঠে স্পষ্টকৈ উল্লেখ কৰিছে যে এই আইন ২০০৯ চনৰ উচ্ছেদ নিয়মৰ পৰিসৰৰ ভিতৰত আছে।
আদালতে পৰ্যবেক্ষণ কৰে যে এই ধাৰাত ৰাজ্য চৰকাৰক জ্যেষ্ঠ নাগৰিকৰ জীৱন আৰু সম্পত্তি সুৰক্ষিত কৰাৰ বাবে এক সমন্বিত পৰিকল্পনা প্ৰস্তুত কৰিবলৈ কোৱা হৈছে।
এগৰাকী মহিলাই তেওঁৰ বোৱাৰীয়েকে বলপূৰ্বকভাৱে সম্পত্তিটোত বাস কৰি থকা বুলি অভিযোগ উত্থাপন কৰি দিল্লী উচ্চ ন্যায়ালয়ত গোচৰ ৰুজু কৰিছিল। ২০০৯ চনৰ নিয়ম অনুসৰি তেওঁক ঘৰৰ পৰা উচ্ছেদৰ বাবে আবেদন জনাইছিল।
প্ৰথম অৱস্থাত মহকুমাধিপতিৰ তদন্তত হাৰাশাস্তিৰ কোনো নিৰ্দিষ্ট অভিযোগ প্ৰমাণিত হোৱা নাছিল। পিছত জিলা দণ্ডাধীশেও উচ্ছেদৰ আবেদন নাকচ কৰে।
সেই সিদ্ধান্তৰ বিৰুদ্ধে যেতিয়া সংমণ্ডল আয়ুক্তৰ (ডিভিজনেল কমিছনাৰ)ওচৰত আবেদন দাখিল কৰা হয়, তেতিয়া তেওঁ পূৰ্বৰ সিদ্ধান্ত সলনি কৰি মহিলাগৰাকীক ঘৰ খালী কৰিবলৈ নিৰ্দেশ দিয়ে।
ইয়াৰ পিছতে মহিলাগৰাকীয়ে দিল্লী উচ্চ ন্যায়ালয়ৰ কাষ চাপে। তেওঁ জ্যেষ্ঠ নাগৰিক আইনৰ অধীনত এনে উচ্ছেদ বৈধ নহয় বুলি দাবী কৰে।
আদালতে কয় যে এজন জ্যেষ্ঠ নাগৰিকৰ শান্তিপূৰ্ণভাৱে জীয়াই থকাৰ অধিকাৰক আওকাণ কৰিব নোৱাৰি।
