দিল্লীৰ এখন ব্যক্তিগত চিকিৎসালয়ে ক’ভিড-১৮ সম্পৰ্কীয় এটা গুৰুত্বপূৰ্ণ বক্তব্য আগবঢ়াইছে।
চিকিৎসালয়খনে দাবী কৰিছে যে চিকিৎসকসকলে কৰোণা ভাইৰাচৰ ফলত ‘ব্লেক ফাংগাছ’ তথা মুকৰমাইচিছিছৰ (mucormycisis) সংক্ৰমণত ভোগা বহুতো ৰোগী পোৱা গৈছে।
শ্ৰী গংগাৰাম হস্পিতাল নামৰ চিকিৎসালয়খনৰ এজন জ্যেষ্ঠ ই.ন.টি. চাৰ্জন ডাঃ মনিষ মুঞ্জলে কয় যে তেওঁলোকে ক’ভিড-১৯ৰ ফলত এই মাৰাত্মক ফাংগাল সংক্ৰমণৰ প্ৰমাণ লাভ কৰিছে।
তেওঁ কয় যে যোৱা দুদিনত, এই ফাংগাল ইনফেকচনজনিত ৬টাকৈ কেচ চিকিৎসালয়খনত ভৰ্তি কৰোৱা হৈছে।
তদুপৰি যোৱা বৰ্ষত এই ফাংগাল সংক্ৰমণৰ ফলত বহু ৰোগীৰ মৃত্যু হোৱা বুলিও তেওঁ জনায়।
ৰোগীসকলে এই সংক্ৰমণৰ ফলত দৃষ্টিশক্তি হেৰুৱাই পেলোৱাৰ উপৰিও নাক আৰু হনু বিকৃত হৈ পৰে বুলি তেওঁ কয়।
চিকিৎসা বিজ্ঞানৰ মতে, এই Mucormycisis এবিধ দুষ্প্ৰাপ্য কিন্তু গুৰুত্বপূৰ্ণ সংক্ৰমণ।
অৱশ্যে চিকিৎসকসকলে কয় যে এই সংক্ৰমণে সেইসকল লোকৰ বাবে কোনো বিশেষ ভাবুকিৰ সৃষ্টি কৰিব নোৱাৰে, যিসকলৰ ৰোগপ্ৰতিৰোধী ক্ষমতা সবল।
চিকিৎসালয়খনৰ ই.এন.টি. ডিপাৰ্টমেণ্টৰ মুৰব্বী ডাঃ অজয় স্বৰূপে কয় যে ক’ভিড-১৯ৰ পৰা আৰোগ্য কৰিবলৈ ৰোগীসকলৰ ওপৰত ব্যৱহাৰ কৰা ষ্টেৰ’ইডে (steroid) এই সংক্ৰমণ তীব্ৰ কৰি তুলিছে।
তেওঁ কয় যে ক’ভিড-১৯ত আক্ৰান্ত হোৱা ডায়েবেটিছ ৰোগীসকল এইক্ষেত্ৰত অধিক ক্ষতিৰ সম্মুখিন হোৱাৰ সম্ভাৱনা থাকে।
তেওঁ কয় যে এই ফাংগাল সংক্ৰমণ ক’ভিড-১৯ৰ পৰা আৰোগ্য হোৱাৰ পাছত সাধাৰণতে দেখা পোৱা যায়।
অৱশ্যে ডায়েবেটিছ, কেঞ্চাৰ আৰু কিডনী অথবা হৃদপিণ্ড বিকল হোৱা ৰোগীসকলৰো এই সংক্ৰমণ হ’ব পাৰে।
