নিজ পিতৃক হত্যা কৰাৰ অভিযোগত গ্ৰেপ্তাৰ হৈছে এগৰাকী ২০ বছৰীয়া যুৱক। পক্ষাঘাতগ্ৰস্ত পিতৃয়ে বিচনাত প্ৰস্ৰাৱ কৰাৰ বাবেই যুৱকগৰাকীয়ে তেওঁক হত্যা কৰা বুলি জানিব পৰা গৈছে। এই ঘটনা সংঘটিত হৈছে দিল্লীৰ আনন্দ পৰ্বত এলেকাত। ধৃত যুৱকগৰাকীৰ নাম সুমিত শৰ্মা বুলি জানিব পৰা গৈছে।
প্ৰকাশিত খবৰ অনুসৰি, শুকুৰবাৰে নিশা প্ৰায় ৯ বজাত জিতেন্দ্ৰ শৰ্মা ব্যক্তিগৰাকীৰ মৃত্যু সন্দৰ্ভত আৰক্ষীয়ে তথ্য লাভ কৰিছিল। খবৰ লাভ কৰাৰ পিছত আৰক্ষী ঘটনাস্থলীত উপস্থিত হয় আৰু শৰ্মাৰ মৃতদেহ বিচনাত পৰি থকা অৱস্থাত উদ্ধাৰ কৰে বুলি এগৰাকী জ্যেষ্ঠ বিষয়াই জানিবলৈ দিয়ে।
আৰক্ষীয়ে শৰ্মাৰ মৃতদেহ উদ্ধাৰ কৰি স্থানীয় আৰ এম এল হাস্পতাললৈ প্ৰেৰণ কৰে আৰু শনিবাৰে মৰণোত্তৰ পৰীক্ষা কৰা হয় বুলি বিষয়াগৰাকীয়ে লগতে উল্লেখ কৰে। মৰণোত্তৰ পৰীক্ষাত তেওঁক ডিঙি চেপি হত্যা কৰা বুলি জানিব পৰা যায়।
ইয়াৰ পাছতে আৰক্ষীয়ে তদন্ত আৰম্ভ কৰে আৰু এগৰাকী চুবুৰীয়াৰ ভাষ্য লয়। ব্যক্তিগৰাকীয়ে ঘটনাৰ দিনা সন্ধিয়া ৬.৩০ বজালৈকে জিতেন্দ্ৰ শৰ্মা আৰু সুমিত শৰ্মাৰ সৈতে মদ্যপান কৰা বুলি নিজ ভাষ্যত স্বীকাৰ কৰে উপ-আৰক্ষী আয়ুক্তগৰাকীয়ে জানিবলৈ দিয়ে।
চুবুৰীয়া ব্যক্তিগৰাকীয়ে সুমিত শৰ্মাই নিজ পিতৃ জিতেন্দ্ৰ শৰ্মাক হত্যা কৰাৰ অভিযোগ কৰে। জেৰাৰ সময়ত সুমিত শৰ্মাই অপৰাধ স্বীকাৰ কৰে বুলি আৰক্ষীয়ে সদৰী কৰিছে। সুমিত শৰ্মাৰ মতে, তেওঁৰ পিতৃ পক্ষাঘাতগ্ৰস্ত হোৱাৰ বাবে তেওঁ অকলেই তেওঁৰ যত্ন ল’ব লগা হৈছিল।
তেওঁ লগতে উল্লেখ কৰা মতে তেওঁৰ পিতৃ অত্যন্ত মদ্যপায়ী আছিল আৰু ঘটনাৰ দিনা পুৱাৰে পৰা দুয়োগৰাকীয়ে সুৰা পান কৰিছিল। সন্ধিয়া শৰ্মাই বিচনাত প্ৰস্ৰাৱ কৰাৰ পিছত খঙৰ ভমকতে পুত্ৰ সুমিত শৰ্মাই তেওঁক ডিঙি চেপি হত্যা কৰা বুলি আৰক্ষী বিষয়াগৰাকীয়ে জানিবলৈ দিয়ে।