অঞ্জলী সিঙৰ ঘটনাৰ পিছতেই এতিয়া যেন সষ্টম হৈ পৰিছে দিল্লীৰ প্ৰশাসন ব্যৱস্থা। অঞ্জলী সিঙৰ কাণ্ডৰ পিছতে সমগ্ৰ দেশৰ সচেতন মহলৰ সমালোচনাৰ সন্মুখীন হৈছিল দিল্লী আৰক্ষী। গালি খাই যেন এতিয়া গা লৰিছে দিল্লীৰ প্ৰশাসনিক মহলৰ।
নতুন নিয়ম মতে এতিয়াৰে পৰা সকলো ষ্টেচন হাউছ বিষয়া , সন্ত্ৰাসবাদ বিৰোধী শাখাৰ বিষয়া আৰু তদন্তকাৰী পৰিদৰ্শকে থানা এৰি যোৱাৰ পূৰ্বে আৰক্ষী উপ আয়ুক্তৰ ওচৰত প্ৰতিবেদন দাখিল কৰিব। কেৱল এয়াই নহয়, নিশাৰ কৰ্তব্যৰ সময়ত সকলো পৰিদৰ্শক পৰ্যায়ৰ বিষয়াই নিজৰ স্থানৰ ৰিপৰ্ট দিব লাগিব।
গাড়ীৰ খুন্দাত অঞ্জলি সিঙক টানি নিয়াৰ পিছত ৰাজধানীৰ নিৰাপত্তা বৃদ্ধিৰ বাবে এনে কঠোৰ ব্যৱস্থা গ্ৰহণ কৰা হৈছে।
জানিব পৰা মতে ৰাজধানীৰ প্ৰতিখন থানালৈ এটা নিৰ্দেশনা প্ৰেৰণ কৰা হৈছে। নিৰ্দেশনাটোত কোৱা হৈছে যে এছ এইচ অ’, এ টি অ’ আৰু ব্ৰাভোৱে নিজৰ বৰ্তমানৰ স্থিতি ডি চি পিক অৱগত কৰিব।
ৰাতিপুৱা ১২ বজাৰ পৰা পুৱা ৪ বজাৰ ভিতৰত তেওঁলোক ক’ত আছিল সেই সম্পৰ্কে সকলো তথ্য দিব লাগিব। কেৱল সেয়াই নহয়, ডিচিপিৰ অনুমতি অবিহনে কোনো আৰক্ষী বিষয়া বা কৰ্মচাৰীয়ে থানা এৰিব নোৱাৰে।
দিল্লীৰ চুলতানপুৰীত নৱবৰ্ষৰ প্ৰাকক্ষণত পুৱা প্ৰায় ২ বজাত এখন গাড়ীয়ে খুন্দা মাৰে ২০ বছৰীয়া যুৱতী অঞ্জলি সিঙক। ইয়াৰ পিছত পাঁচজন লোকে ১৩ কিঃমিঃ চোঁচৰাই লৈ যায় যুৱতীগৰাকীক। অৱশ্যে ঘটনাৰ লগত জড়িত আৰু অভিযুক্তক বচাবলৈ সহায় কৰা মুঠ ৭জন লোকক আৰক্ষীয়ে গ্ৰেপ্তাৰ কৰিছে। এই ঘটনাই দিল্লী আৰক্ষীৰ ভূমিকা আৰু ৰাজধানীত মহিলাৰ সুৰক্ষাক লৈ প্ৰশ্ন উত্থাপন কৰে। ইয়াৰ পিছত দিল্লী আৰক্ষীয়ে এইদৰে সলনি কৰে নৈশ পহৰাদাৰী ব্যৱস্থা।
