পশ্চিমীয়া সাজ-পোছাক নহয়, পৰম্পৰাগত ভাৰতীয় সাজ-পোছাক পৰিধান কৰি আহিছিল এহাল দম্পতীয়ে। অভিযোগ অনুসৰি কেৱল তাৰ বাবেই তেওঁলোকক দিল্লীৰ পীতমপুৰাৰ এখন ৰেষ্টুৰেণ্টত প্ৰৱেশ কৰিবলৈ দিয়া হোৱা নাছিল। ঘটনাৰ ভিডিঅ’ ভাইৰেল হোৱাৰ লগে লগে তৎপৰ হৈ উঠিল প্ৰশাসন।
ভিডিঅ’টোত এহাল দম্পতীয়ে ভাৰতীয় সাজ-পোছাক পৰিধান কৰাৰ বাবে ৰেষ্টুৰেণ্টৰ মেনেজাৰে তেওঁলোকৰ লগত বেয়া আচৰণ কৰা বুলি অভিযোগ কৰা দেখা গৈছে। আনলোকক প্ৰৱেশত বাধা দিয়া হোৱা নাছিল যদিও তেওঁলোকক স্পষ্টকৈ কোৱা হৈছিল যে এনে সাজ-পোছাকত ৰেষ্টুৰেণ্টখনত প্ৰৱেশৰ অনুমতি নাই।
ব্যক্তিজনে ক’লে, “এই ধৰণৰ মানসিকতা গ্ৰহণযোগ্য নহয়। ভাৰতীয় সাজ-পোছাক পিন্ধি যদি মানুহক প্ৰৱেশ কৰিবলৈ নিদিয়ে তেন্তে এনে ৰেষ্টুৰেণ্টৰ ব্যৱসায় কৰাৰ কোনো অধিকাৰ নাই। বন্ধ কৰিব লাগে।”
এই বিতৰ্ক পোহৰলৈ অহাৰ লগে লগে দিল্লীৰ মন্ত্ৰী কপিল মিশ্ৰই টুইটাৰ যোগে তীব্ৰ প্ৰতিক্ৰিয়া প্ৰকাশ কৰে। তেওঁ লিখিছে, ‘পীতমপুৰাৰ এখন ৰেষ্টুৰেণ্টত ভাৰতীয় সাজ-পোছাক পৰিধান কৰি প্ৰৱেশ নিষিদ্ধ কৰাৰ অভিযোগ উত্থাপন হৈছে। এই বিষয়ত মুখ্যমন্ত্ৰী ৰেখা গুপ্তাই কঠোৰ স্থিতি গ্ৰহণ কৰিছে। প্ৰশাসনক তদন্ত কৰি তৎকালীন ব্যৱস্থা গ্ৰহণ কৰিবলৈ নিৰ্দেশ দিয়া হৈছে।”
পিছৰ এটা পোষ্টত মিশ্ৰই কয় যে ৰেষ্টুৰেণ্ট কৰ্তৃপক্ষই তেওঁলোকৰ নীতি সলনি কৰিছে। এতিয়াৰে পৰা সাজ-পোছাকৰ ওপৰত ভিত্তি কৰি কাকো ৰেষ্টুৰেণ্টখনত প্ৰৱেশ কৰাত বাধা দিয়া নহ’ব। আনকি ৰাখী উপলক্ষে ভাৰতীয় সাজ-পোছাক পৰিধান কৰি অহা ‘ভগ্নী’সকলক বিশেষ ৰেহাই দিয়া হ’ব বুলিও তেওঁলোকে আশ্বাস দিছে।
অৱশ্যে ৰেষ্টুৰেণ্টৰ স্বত্বাধিকাৰী নীৰজ আগৰৱালাই এই অভিযোগ খাৰিজ কৰি দম্পতীহালৰ কোনো বুকিং নাছিল বুলি দাবী কৰিছে। সেইবাবেই তেওঁলোকক প্ৰৱেশত বাধা দিয়া হৈছিল। তেওঁলোকৰ কোনো নিৰ্দিষ্ট সাজ-পোছাক সম্পৰ্কীয় নীতি নাই। সকলোকে আদৰণি জনোৱা হয়।
