দিল্লীৰ বিজেপিৰ সভাপতি মনোজ তিৱাৰীয়ে ৰাষ্ট্ৰীয় ৰাজধানীখনতো এন আৰ চি প্ৰৱৰ্তন কৰাৰ দাবী তুলিছে।
মনোজ তিৱাৰীয়ে কয় যে দিল্লীত ৰাষ্ট্ৰীয় নাগৰিক পঞ্জী প্ৰস্তুত কৰাৰ প্ৰয়োজনীয়তা আছে কিয়নো ইয়াৰ পৰিস্থিতি ভয়াবহ হৈ পৰিছে।
তেওঁ কয়,’’অবৈধ অনুপ্ৰৱেশকাৰী যিসকল ইয়াত বহি গৈছে, তেওঁলোক আটাইতকৈ বিপদজনক। আমি ইয়াতো এন আৰ চি প্ৰৱৰ্তন কৰিম।‘’
অসমত এন আৰ চিৰ চূড়ান্ত তালিকা প্ৰকাশ হোৱাৰ পাছতে মনোজ তিৱাৰীয়ে এই দাবী উত্থাপন কৰিছে।
অসমত শনিবাৰে প্ৰকাশ কৰা এন আৰ চিৰ চূড়ান্ত তালিকাত ৩,১১,২১,০০৪গৰাকী লোকৰ নাম অন্তৰ্ভুক্ত হোৱাৰ বিপৰীতে ১৯,০৬,৬৭৭গৰাকী লোকৰ নাম বাদ পৰিছে।
ইপিনে, অসমত এন আৰ চিৰ চূড়ান্ত তালিকা প্ৰকাশ হোৱাৰ পাছতে কংগ্ৰেছে অন্তৰ্ৱতীকালীন ৰাষ্ট্ৰীয় অধ্যক্ষ ছোনিয়া গান্ধীৰ ১০ নং জনপথৰ বাসগৃহত এখন বৈঠক আহ্বান কৰে।
কংগ্ৰেছে বিষয়টোকলৈ চৰকাৰক আক্ৰমণৰ কৌশল ৰচনা কৰাৰ বাবেই এই বৈঠক আহ্বান কৰা বুলি জানিব পৰা গৈছে। বৈঠকত দলৰ জ্যেষ্ঠ নেতা গোলাম নবী আজাদৰ লগতে সাংসদ গৌৰৱ গগৈও উপস্থিত থাকে।
এন আৰ চিৰ চূড়ান্ত তালিকাত বাদ পৰা প্ৰায় ১৯ লাখ লোকে এন আৰ চিত নাম অন্তৰ্ভুক্তিৰ বাবে এতিয়াও সুযোগ পাব।
এন আৰ চিত বাদ পৰা এই লোকসকলে নাম অন্তৰ্ভুক্তিৰ বাবে ১২০ দিনৰ ভিতৰত বিদেশী ন্যায়াধীকৰণত আবেদন কৰিব লাগিব।
ৰাজ্য চৰকাৰে এন আৰ চিৰ পৰা নাম বাদ পৰা লোকসকলৰ গোচৰসমূহ নিষ্পত্তি কৰাৰ বাবে ৰাজ্যখনত ৪০০ খন বিদেশী ন্যায়াধীকৰণ স্থাপন কৰিব।