গুজৰাটৰ গোধৰা কাণ্ডত তদানীন্তন মুখ্যমন্ত্ৰী তথা বৰ্তমানৰ প্ৰধানমন্ত্ৰী নৰেন্দ্ৰ মোদীৰ ভূমিকাক লৈ সংবাদ সংস্থা বিবিচি- এ প্ৰস্তুত কৰা তথ্যচিত্ৰক কেন্দ্ৰ কৰি দেশত সৃষ্টি হোৱা বিতৰ্ক অব্যাহত আছে। দেশৰ দুখনকৈ আগশাৰীৰ বিশ্ববিদ্যালয়ত তথ্যচিত্ৰখনৰ প্ৰদৰ্শনক লৈ হোৱা উত্তপ্ত পৰিস্থিতিৰ অনুৰূপ পৰিৱেশ আজি দেখিবলৈ পোৱা গৈছে দিল্লী বিশ্ববিদ্যালয়ত।
দিল্লী বিশ্ববিদ্যালয়ৰ কলা বিভাগৰ চৌহদত আজি বিশ্ববিদ্যালয়খনৰ শিক্ষাৰ্থীসকলে চৰকাৰী নিষেধাজ্ঞাক আওকাণ কৰি বিবিচি নিৰ্মিত এই তথ্যচিত্ৰখন প্ৰদৰ্শন কৰিবলৈ চেষ্টা কৰাৰ সময়তে দমনমূলক ব্যৱস্থা গ্ৰহণ কৰে দিল্লী আৰক্ষীয়ে। তথ্যচিত্ৰখনৰ প্ৰদৰ্শনৰ সময়ত হোৱা বাক-বিতণ্ডাৰ পিছতে আৰক্ষীয়ে আটক কৰিছে কেইবাগৰাকীও শিক্ষাৰ্থীক।
দিল্লী আৰক্ষীৰ এই পদক্ষেপৰ পাছতে প্ৰতিক্ৰিয়া প্ৰকাশ কৰিছে বিশ্ববিদ্যালয়খনৰ ছাত্ৰ নেতাসকলে। ছাত্ৰ নেতাসকলৰ ভাষ্য মতে, ছাত্ৰ-ছাত্ৰীসকলে তথ্যচিত্ৰখন শান্তিপূৰ্ণভাৱে চোৱাৰ পৰিকল্পনা কৰিছিল। কিন্তু দিল্লী আৰক্ষী বিশ্ববিদ্যালয় চৌহদত উপস্থিত হৈ হিংসাত্মক কাৰ্যকলাপ চলায় বুলি ছাত্ৰ নেতাসকলে অভিযোগ কৰিছে।
ছাত্ৰ নেতাসকলে লগতে হিন্দুত্ববাদী সংগঠন তথা বিজেপিৰ আদৰ্শগত গুৰু সংস্থা আৰ এছ এছ আৰু আন একাংশ একে আদৰ্শৰ সংগঠনৰ সদস্যই তথ্যচিত্ৰখনৰ দৰ্শনৰ বাবে গোট খোৱা শিক্ষাৰ্থীসকলক আক্ৰমণ কৰাৰ গুৰুতৰ অভিযোগ উত্থাপন কৰিছে। ইফালে স্থানীয় আৰক্ষীৰ এগৰাকী উচ্চপদস্থ বিষয়াই বিশ্ববিদ্যালয় চৌহদৰ পৰা ২৪ গৰাকী শিক্ষাৰ্থীক আটক কৰা হৈছে আৰু এতিয়া পৰিস্থিতি স্বাভাৱিক অৱস্থালৈ ঘূৰি আহিছে বুলি মন্তব্য কৰে।
আনহাতে বিশ্ববিদ্যালয় কৰ্তৃপক্ষই উল্লেখ কৰা মতে তথ্যচিত্ৰখনৰ ৰাজহুৱা প্ৰদৰ্শনীৰ বাবে কোনো অনুমতি বিচৰা হোৱা নাছিল আৰু এনে কোনো গণ সমাৱেশৰ বিৰুদ্ধে জিলা প্ৰশাসনেও নিৰ্দেশনা জাৰি কৰিছিল। দিল্লী আৰক্ষীক এই পৰিকল্পনাৰ বিষয়ে অৱগত কৰা বিশ্ববিদ্যালয়ৰ মুখ্য প্ৰক্টৰ ৰজনী আব্বিয়েও আৰক্ষীৰ পক্ষ গ্ৰহণ কৰে আৰু তথ্যচিত্ৰখনৰ দৰ্শনীৰ ব্যৱস্থা কৰাসকলে কেৱল শান্তি বিঘ্নিত কৰা উপলক্ষ্য বিচাৰে বুলি মন্তব্য কৰে।
উল্লেখ্য যে পূৰ্ব নিৰ্ধাৰিত সময় অনুসৰি আজি সন্ধিয়া ৫.৩০ বজাত বিবিচিৰ এই তথ্যচিত্ৰখনৰ দৰ্শনৰ বাবে বৃহৎ সংখ্যক ছাত্ৰ-ছাত্ৰী সমবেত হৈছিল। প্ৰধানত: বাওঁপন্থী দল আৰু অন্যান্য বিৰোধী ছাত্ৰ সংগঠনৰ নেতৃত্বত শিক্ষাৰ্থীসকল বিশ্ববিদ্যালয়ৰ কলা শাখাৰ এলেকাত সমবেত হৈছিল আৰু তথ্যচিত্ৰখনৰ দৰ্শনী বন্ধ কৰিবলৈ প্ৰশাসনে অঞ্চলটোত ১৪৪ নং ধাৰা জাৰি কৰাৰ বিৰুদ্ধে প্ৰতিবাদ সাব্যস্ত কৰিছিল।
