যোৰহাট জিলাৰ টীয়কৰ জাঁজীমুখ কমাৰ গাঁৱৰ বহু কেইটা খিলঞ্জীয়া পৰিয়াল বান আৰু গৰাখহনীয়াৰ কৱলত পৰি সৰ্বস্বান্ত হোৱা ঘটনাটোত অসম প্ৰেমী যুৱ ছাত্ৰ সমাজ নামৰ সংগঠনটোয়ে তীব্ৰ আক্ষেপ প্ৰকাশ কৰিছে।
সংগঠনটোৱে লগতে অহা ১৫ দিনৰ ভিতৰত চৰকাৰে পৰিয়ালকেইটাক নিৰাপদ স্থানত স্থায়ী সংস্থাপন দিয়াৰ ব্যৱস্থা নকৰিলে গণতান্ত্ৰিক ভাৱে প্ৰতিবাদ গঢ়ি তোলাৰো হুংকাৰ দিছে৷
অসম প্ৰেমী যুৱ ছাত্ৰ সমাজ নামৰ সংগঠনটোয়ে এক প্ৰেছ বিবৃতি যোগে এই কথা জানিবলৈ দিছে l একেটা প্ৰেছ বিবৃতিতে সংগঠনটোৱে আক্ষেপ প্ৰকাশ কৰি কয় যে, “ভাৰতবৰ্ষ স্বাধীনতাৰ আজি ৭৩ টা বছৰৰ পাছতো অসমভূমিৰ যোৰহাট জিলাৰ টীয়কৰ জাঁজীমুখ কমাৰ গাঁৱৰ বহু কেইটি খিলঞ্জীয়া পৰিয়াল বান আৰু গৰাখহনীয়াৰ কৱলত পৰি সৰ্বস্বান্ত হোৱাটো দুখ:জনক৷”
বিবৃতিটোত আৰু কয় যে, “যি সময়ত চৰকাৰখনে জাতি-মাটি-ভেটিৰ কথা কৈ অসমত হিন্দু বাংলাদেশীক সংস্থাপন দিব বিচাৰিছে, সেই সময়ত জাঁজীমুখৰ এই পৰিয়ালকেইটাৰ ঘৰৰখন ছবি দেখিলেই বুজিব, অসমৰ খিলঞ্জীয়া জনতাই কিমান কষ্টৰে জীৱন অতিবাহিত কৰিছে৷”
“জাঁজী নদীৰ প্ৰলয়ংকাৰী বানে উটুৱাই লৈ যোৱাৰ সময়তে প্ৰচণ্ড গৰাখহনীয়াই এইসমূহ পৰিয়ালৰ ভেটি উচন কৰি পেলাইছে৷ আজি ২০ টা বছৰে নিৰাপদ স্থানত সংস্থাপনৰ বাবে সংশ্লিষ্ট বিভাগক অনুৰোধ জনাই আহিছে যদিও, তেওঁলোকৰ অনুৰোধ ৰক্ষা কৰিবলৈ চৰকাৰৰ সদিচ্ছা অভাৱ দেখা গৈছে৷” বিবৃতিটোত আৰু কয়।
আজি সংগঠনটোৱে টীয়ক ৰাজহ চক্ৰ বিষয়া আকাশী দুৱৰাৰ যোগেদি ৰাজ্যৰ মুখ্যমন্ত্ৰী সৰ্বানন্দ সোণোৱাললৈ এখন স্মাৰক পত্ৰ প্ৰেৰণ কৰাৰ লগতে ১৫ দিনৰ ভিতৰত পৰিয়াল বোৰক নিৰাপদ স্থানত স্থায়ী সংস্থাপন দিয়াৰ ব্যৱস্থা নকৰিলে অসম প্ৰেমী যুৱ ছাত্ৰ সমাজে গণতান্ত্ৰিক ভাৱে প্ৰতিবাদ গঢ়ি তুলিব বুলি সতৰ্ক কৰি দিয়ে৷