মাৰণাস্ত্ৰৰ অবাধ প্ৰচলনে আতংকময় পৰিস্থিতিৰ সৃষ্টি কৰিছে আমেৰিকা যুক্তৰাষ্ট্ৰত। বিগত সময়ছোৱাত আমেৰিকাত গুলীচালনাৰ বহু চাঞ্চল্যকৰ ঘটনা সংঘটিত হৈছে। এনে এক ঘটনাই শেহতীয়াকৈ জোকাৰি তুলিছে ডেনভাৰ চহৰ।
প্ৰকাশিত খবৰ অনুসৰি, শনিবাৰে নিশা ডেনভাৰ চহৰত এখন বাৰৰ ভিতৰত প্ৰৱেশত বাধা পোৱাৰ ক্ষোভতে নিৰ্বিচাৰে গুলীবৰ্ষণ কৰে। এই চাঞ্চল্যকৰ ঘটনাত আহত হয় পাঁচজনকৈ লোক।
ঘটনা সন্দৰ্ভত আৰক্ষীয়ে সদৰী কৰা মতে, মহিলাগৰাকীয়ে আন ব্যক্তিৰ পৰিচয় পত্ৰ ব্যৱহাৰ কৰাৰ সন্দেহত তেওঁক বাৰৰ ভিতৰলৈ সোমোৱাত বাধা দিয়া হৈছিল।
প্ৰৱেশৰ পৰা বঞ্চিত হোৱাৰ পিছতে ক্ষোভিত মহিলাগৰাকীয়ে প্ৰৱেশৰ বাবে পাতি থকা শাৰীৰ পৰা ওলাই আহে আৰু বন্দুক উলিয়াই অতৰ্কিতে গুলীচালনা কৰে। নিশা প্ৰায় ১১.১৫ বজাত এই ঘটনা সংঘটিত হয় বুলি জানিব পৰা গৈছে।
মহিলাগৰাকীৰ এই আক্ৰমণৰ ফলত পাঁচজন লোক আহত হয়। এনে অতৰ্কিত আক্ৰমণত বাৰৰ বাহিৰত শাৰীত থকা লোকসকল ভীতিগ্ৰস্ত হৈ উক্ত স্থানৰ পৰা পলায়ন কৰে।
ইফালে এই ঘটনাৰ পিছত যোৱা ছয় দিন ধৰি মহিলাগৰাকী পলায়ন কৰি আছে বুলি আৰক্ষীয়ে জানিবলৈ দিছে। পলাতক মহিলাগৰাকীৰ সন্ধানত ডেনভাৰ আৰক্ষীয়ে অভিযান অব্যাহত ৰাখিছে বুলি সদৰী কৰে।
