ডেৰা সচ্চা চৌদাৰ মুৰব্বী গুৰমীত ৰাম ৰহিম সিঙক পুনৰ পেৰ’লত মুকলি কৰি দিয়া হৈছে। হাৰিয়ানাৰ ৰোহটকৰ সুনাৰিয়া কাৰাগাৰ কৰ্তৃপক্ষই তেওঁক ৩০ দিনৰ বাবে পেৰ’লত মুকলি কৰি দিছে। আজি অৰ্থাৎ ২৬ মে’ মঙলবাৰে পুৱা ৬ বজাত সুনাৰিয়া জেলৰ পৰা মুকলি কৰি দিয়া হয়।
সূত্ৰ অনুসৰি, ধৰ্ষণ আৰু যৌন কেলেংকাৰীৰ গোচৰত দোষী সাব্যস্ত হোৱাৰ পিছত মুঠ ১৬ বাৰ পেৰ’ল বা অস্থায়ী মুক্তিৰ ভিত্তিত ৰাম ৰহিমক মুকলি কৰি দিয়া হৈছে। জানিব পৰা মতে চলিত বৰ্ষৰ ২৪ জুনত পুনৰ কাৰাগাৰলৈ ঘূৰি আহিব লাগিব ৰাম ৰহিমে। ইয়াৰ পূৰ্বে চলিত বৰ্ষৰ জানুৱাৰী মাহত ৪০ দিনৰ বাবে পেৰ’লত মুকলি কৰি দিয়া হৈছিল ডেৰা সচ্চা চৌদাৰ মুৰব্বীগৰাকীক। ৰাম ৰহিমক বাৰে বাৰে পেৰ’লত মুকলি কৰি দিয়াৰ বাবে একাধিক প্ৰশ্ন উত্থাপন হৈছে।
ৰাম ৰহিমৰ অধিবক্তা জিতেন্দ্ৰ খুৰাণাই কয় যে আইনৰ ভিত্তিত ৰাম ৰহিমক পেৰ’লত মুকলি কৰি দিয়া হৈছে। মঙলবাৰে কাৰাগাৰৰ পৰা ওলাই আহি ছিৰছাৰ ডেৰা সচ্চা চৌদাৰ কাৰ্যালয়লৈ যায় ৰাম ৰহিমে। সূত্ৰৰ পৰা জানিব পৰা মতে, ছিৰছাৰ জিলা দণ্ডাধীশে ৰাম ৰহিমক তাত থাকিবলৈ অনুমতি দিছে।
ৰাম ৰহিমে ২০১৭ চনত আশ্ৰমৰ ভিতৰত দুগৰাকী শিষ্যাক ধৰ্ষণ কৰাৰ অভিযোগ উত্থাপন হৈছিল। সেই বছৰৰ ২৫ আগষ্টত পঞ্চকুলাৰ চিবিআই আদালতে ৰাম ৰহিমক দোষী সাব্যস্ত কৰিছিল। আদালতে তেওঁক ২০ বছৰৰ কাৰাদণ্ডৰ শাস্তি বিহে। তেতিয়াৰ পৰাই ৰাম ৰহিম সুনাৰিয়া কাৰাগাৰত বন্দী হৈ আছে।
আনহাতে, সাংবাদিক ৰাম চন্দৰ প্ৰজাপতিয়ে ৰাম ৰহিমৰ যৌন কেলেংকাৰীক জনসাধাৰণৰ মাজলৈ লৈ আহিছিল। তাৰ বাবেই তেওঁক হত্যা কৰা বুলি অভিযোগ উঠে। সেই গোচৰতো ৰাম ৰহিমক দোষী সাব্যস্ত কৰি যাৱজ্জীৱন কাৰাদণ্ড আৰু ৫০ হাজাৰ টকা জৰিমনা বিহা হয়। কিন্তু পিছত আদালতে হত্যাকাণ্ডৰ গোচৰত ৰাম ৰহিমক দোষমুক্ত কৰে। কিন্তু যৌন কেলেংকাৰীৰ গোচৰত এতিয়াও জেলত আছে ৰাম ৰহিম।
হাৰিয়ানাৰ সুনাৰিয়া কাৰাগাৰত বন্দী হৈ থকা ৰাম ৰহিমক প্ৰথমবাৰৰ বাবে ২০২০ চনৰ ২৪ অক্টোবৰত এদিনৰ বাবে পেৰ’লত মুকলি কৰি দিয়া হয়। ইয়াৰ পিছত ২০২১ চনৰ মে’ মাহত, ২০২২ চনৰ ফেব্ৰুৱাৰী, জুন আৰু অক্টোবৰ মাহত ৰাম ৰহিমক পেৰ’লত মুকলি কৰি দিয়া হয়। ২০২৩ চনৰ জানুৱাৰী, জুলাই, নৱেম্বৰ, ২০২৪ চনৰ জানুৱাৰী, আগষ্ট, অক্টোবৰ, ২০২৫ চনৰ জানুৱাৰী, এপ্ৰিল, আগষ্ট মাহত পুনৰ সাময়িকভাৱে মুকলি কৰি দিয়া হয় ৰাম ৰহিমক।
