আমেৰিকাৰ চাঞ্চল্যকৰ জৰ্জ ফ্লয়েড হত্যাকাণ্ডৰ হত্যাকাৰী আৰক্ষী বিষয়া ডেৰেক ছোভিনক শুকুৰবাৰে দেশখনৰ মিনছোটা আদালতে ২২বছৰ ৬মাহৰ কাৰাদণ্ডৰ নিৰ্দেশ দিছে।
মিনছোটাৰ হেন’পিন আদালতে যোৱা এপ্ৰিল মাহত ফ্লয়েড হত্যাৰ গোচৰত আৰক্ষী বিষয়া ডেৰেকক দোষী সাৱ্যস্ত কৰিছিল। তেওঁৰ বিৰুদ্ধে উত্থাপিত তিনিটা অভিযোগেই প্ৰমানিত হয়।
শাস্তি ঘোষণাৰ পাছত বিচাৰকগৰাকীয়ে কয়,’’ক্ষমতা তথা কৰ্তৃত্বৰ অপব্যৱহাৰ কৰি আৰু বিশ্বাসভংগ কৰাৰ লগতে ডেৰেক ছোভিনে যি নিষ্ঠুৰতা প্ৰদৰ্শন কৰিছে, তাৰ বাবে তেওঁ এই শাস্তি ভোগ কৰিব লাগিব।‘’
উল্লেখযোগ্য যে যোৱা বছৰৰ মে’ মাহত জাল নোট ব্যৱহাৰৰ অভিযোগত আৰক্ষী বিষয়া ডেৰেকে আঁঠুৰে ডিঙি চেপি ফ্লয়েডক হত্যা কৰিছিল।
এগৰাকী স্কুলীয়া ছাত্ৰীয়ে গ্ৰহণ কৰা ৯ মিনিটৰ সেই ভিডিঅ’টোৱে সমগ্ৰ বিশ্বতে ধুমুহাৰ সৃষ্টি কৰিছিল।
ফ্লয়েড হত্যাৰ পাছতে বৰ্ণবাদ তথা আৰক্ষীৰ নিৰ্যাতনৰ বিৰুদ্ধে ‘ব্লেক লাইভছ মেটাৰ্ছ’ শ্ল’গানেৰে আমেৰিকাত আৰম্ভ হোৱা প্ৰতিবাদে গোটেই বিশ্বকে জোকাৰি গৈছিল।