আইনী বাধা আৰু ৰেইলৱে প্ৰকাশ কৰা অনিচ্ছাৰ মাজতে জগন্নাথ মন্দিৰলৈ হাতী প্ৰেৰণৰ চুক্তিৰ সৈতে জড়িত আঁকোৰগোজ ‘মধ্যভোগী’ দুজনে এতিয়া এক ‘বিশ্বাসযোগ্য’ পথ পৰিবহণ কোম্পানীৰ অন্বেষণ চলাইছে।
তিনিচুকীয়াৰ সূত্ৰসমূহে নৰ্থইষ্ট নাওক কয় যে হুকুমদাৰ খান আৰু ইমৰাণ খান নামৰ ‘মধ্যভোগী’ দুজনে শনিবাৰে হাতী চাৰিটা আহেমদাবাদলৈ পৰিবহণৰ বাবে এক ‘বিশ্বাসযোগ্য’ লজিষ্টিক কোম্পানীৰ সৈতে সম্পৰ্ক স্থাপনৰ চেষ্টা চলাইছিল।
আহমেদাবাদলৈ হাতী কেইটা পৰিবহণৰ বাবে এই প্ৰচেষ্টা তীব্ৰতৰ কৰাৰ কাৰণ হৈছে দুটা গোচৰ। গুৱাহাটী উচ্চ ন্যায়ালয়ত তৰা এখন ৰাজহুৱা স্বাৰ্থজড়িত আবেদন আৰু এখন তাৎক্ষণিক লেখ আবেদন। দুয়োটা গোচৰেই অহা সোমবাৰে শুনানিৰ বাবে গ্ৰহণ কৰা হ’ব।
দ্বিতীয়তে, উত্তৰ-পূব সীমান্ত ৰেইলৱেই শুকুৰবাৰে সন্ধিয়া কয় যে তেওঁলোকে ‘স্পেচিয়েল কাৰ্গো’ প্ৰেৰণ কৰা বিষয়ত ৰেইলৱে ভৱনৰ পৰা আইনী পৰামৰ্শ বিচাৰিছে। উত্তৰ-পূব সীমান্ত ৰেইলৱেই উচ্চতম ন্যায়ালয়ৰ এটা নিৰ্দেশৰ সন্দৰ্ভত এটা স্পষ্টীকৰণৰ অপেক্ষা কৰিছে।
‘’আমাক গুৱাহাটী উচ্চ ন্যায়ালয়ত দাখিল কৰা এখন ৰাজহুৱা স্বাৰ্থজড়িত আবেদনৰ কাৰণে হাতীকেইটা প্ৰেৰণ নকৰিবলৈ কোৱা হৈছে,’’-তিনিচুকীয়াৰ এডিশ্যনেল ডিভিজনেল ৰেইলৱে মেনেজাৰ মাছুদ আলমে নৰ্থইষ্ট নাওৰ আগত এইদৰে কয়।
উত্তৰ-পূব সীমান্ত ৰেইলৱেৰ চীফ পেছেঞ্জাৰ ট্ৰেফিক মেনেজাৰেও অসম চৰকাৰৰ বন বিভাগৰ পৰা বিষয়টো সন্দৰ্ভত এক স্পষ্টীকৰণ বিচাৰিছে বুলি সূত্ৰসমূহে কয়।
চীফ পেছেঞ্জাৰ ট্ৰেফিক মেনেজাৰেজনে অসমৰ বন বিভাগে হাতী চাৰিটা এখন যাত্ৰীবাহী ৰেইলৰ জৰিয়তে পৰিবহণৰ বাবে হোচা দিয়া আৰু ইয়াৰ বাবে ব্ৰহ্মপুত্ৰ মেইলকে উত্তম বিকল্প হিচাপে চিনাক্ত কৰা সন্দৰ্ভত স্পষ্টীকৰণ বিচাৰিছে।
শনিবাৰে নিশা হাতী চাৰিটা পৰিবহণৰ বাবে তৎপৰতা প্ৰদৰ্শনৰ কাৰণ হৈছে ‘মধ্যভোগী’ দুজনে দেওবাৰে সন্ধিয়াৰ ভিতৰতে অসম সীমান্ত পাৰ হ’ব বিচাৰিছে।
হুকুমদাৰ খান আৰু ইমৰাণ খান দুয়োজনে জানে যে গুৱাহাটী উচ্চ ন্যায়ালয়ে এবাৰ গোচৰ দুটা শুনানিৰ বাবে গ্ৰহণ কৰিলে হাতী চাৰিটা পৰিবহণ কৰাটো জটিল হৈ পৰিব।
যদি হাতী চাৰিটা স্থলপথেৰে পৰিবহণ কৰিব লাগে, অসম চৰকাৰৰ বন বিভাগে এখন নতুন পৰিবহণ অনুজ্ঞাপত্ৰ ইচ্ছ্যু কৰিব লাগিব।
আহমেদাবাদলৈ চাৰিটা হাতী পৰিবহণ কৰাৰ বিষয়টোক লৈ সংবাদ মাধ্যম গৰম হৈ থকাৰ মাজতে বিষয়টো শুকুৰবাৰে লোকসভাৰ শূন্যকালত উত্থাপিত হয়।
অসমৰ সাংসদ গৌৰৱ গগৈয়ে বৃহস্পতিবাৰে কেন্দ্ৰীয় পৰিৱেশ আৰু বন বিভাগৰ মন্ত্ৰী প্ৰকাশ জাভেদকাৰলৈ এখন পত্ৰ প্ৰেৰণ কৰিছিল আৰু তেওঁৱেই শুকুৰবাৰে লোকসভাৰ শূন্যকালত জাননী দিছিল।
