দিল্লীত সুৰাৰ দোকানৰ সন্মুখত মঙলবাৰে ৰাতিপুৱাৰে পৰা দীঘলীয়া শাৰী দেখিবলৈ পোৱা গ’ল। পুৱা ৫বজাৰ পৰাই শাৰী পাতি সুৰা ক্ৰয়ৰ বাবে অপেক্ষা কৰিলে সুৰাৰ গ্ৰাহকে।
দিল্লী চৰকাৰে সুৰাৰ দাম ৭০শতাংশ বৃদ্ধি কৰিছে যদিও গ্ৰাহকৰ মাজত ইয়াৰ কোনো প্ৰভাৱ পৰা পৰিলক্ষিত হোৱা নাই।
দিল্লী চৰকাৰে সুৰাৰ ওপৰত বিশেষ কৰ’না টেক্স আৰোপ কৰাৰ কথা ঘোষণা কৰিছে। মঙলবাৰৰ পৰা দিল্লীবাসীয়ে সুৰা ক্ৰয়ৰ বাবে ৭০শতাংশ অধিক দাম ভৰিব লাগিব।
সোমবাৰে সুৰা ক্ৰয়ৰ বাবে লোকৰ ভিৰ দেখি চৰকাৰ চিন্তিত হৈ পৰে। কৰ’নাৰ বিৰুদ্ধে চলি থকা যুঁজখন পথচ্যুত হৈ পৰাৰ শংকাই দেখা দিয়ে।
ইয়াৰ পাছতে দিল্লী চৰকাৰে সুৰাৰ এম আৰ পিৰৰ ওপৰত ৭০শতাংশ বিশেষ কৰ’না কৰ আদায় কৰাৰ নিৰ্দেশ জাৰি কৰে।
এতিয়া গ্ৰাহকে ৫০০টকা দামৰ বটলত ৮৫০ টকা ভৰিব লাগিব। সেইদৰে ১০০০ টকাৰ বটলত ১৭০০টকা আৰু ২০০০টকাৰ বটলত ৩৪০০টকা ভৰিব লাগিব।
দিল্লীৰ আবকাৰী আয়ুক্তই আৰক্ষী আয়ুক্তলৈ লিখা এখন পত্ৰত স্পষ্ট কৰি দিছে সুৰাৰ দোকানসমূহত সামাজিক দূৰত্বৰ নিয়ম পালন কৰোৱাৰ দায়িত্ব আৰক্ষীয়ে ল’ব লাগিব।
সুৰাৰ দোকানসমূহ পুৱা ৯বজাৰ পৰা সন্ধিয়া ৬বজালৈকে খোলা থাকিব। দিল্লীৰ মুখ্য মন্ত্ৰী অৰৱিন্দ কেজৰিৱালে সতৰ্ক কৰি দি কৈছে যে ৰাইজে বান্ধি দিয়া নিয়মসমূহ পালন নকৰিলে ৰেহাইসমূহ উঠাই লোৱা হ’ব।
