ভাৰতৰ স্নাতকোত্তৰ চিকিৎসা শিক্ষা ব্যৱস্থাত এক চৰম বিশৃংখলতাৰ সৃষ্টি হৈছে। ২০২৫-২৬ শিক্ষাবৰ্ষৰ বাবে দেশত মুঠ পিজি মেডিকেল আসনৰ সংখ্যা ৬৭ হাজাৰৰো অধিক যদিও এই বিশাল সংখ্যক আসনৰ ভিতৰত হাজাৰ হাজাৰ আসন খালী হৈ আছে।
NEET PG 2025 ৰ বাবে প্ৰায় ২.৩ লাখ প্ৰাৰ্থীয়ে অৱতীৰ্ণ হৈছিল। প্ৰাথমিক কাটঅফ আছিল জেনেৰেল/ইডব্লিউএছৰ বাবে ২৭৬ নম্বৰ (৫০ শতাংশ), জেনেৰেল পিডব্লিউবিডিৰ বাবে ২৫৫ আৰু এছচি/এছটি/অবিচিৰ বাবে ২৩৫ নম্বৰ।
কিন্তু দুটা ৰাউণ্ডৰ কাউন্সেলিঙৰ অন্তত প্ৰায় ১৮ হাজাৰ আসন খালী ৰোৱাৰ পিছত কেন্দ্ৰীয় স্বাস্থ্য মন্ত্ৰালয় আৰু এনবিইএমএছে এই কাটঅফ ব্যাপক হ্ৰাস কৰিছে।
তৃতীয় ৰাউণ্ডৰ বাবে জেনেৰেল/ইডব্লিউএছৰ বাবে কাটঅফ ৭ শতাংশ কমাই ১০৩ নম্বৰলৈ, জেনেৰেল পিডব্লিউবিডিৰ বাবে ৫ শতাং কমাই ৯০ নম্বৰলৈ আৰু এছচি/এছটি/অবিচিৰ বাবে শতাংশ শূন্যলৈ কমাই ৪০ নম্বৰলৈকে হ্ৰাস কৰি (ঋণাত্মক নম্বৰৰ বাবে) যোগ্যতা নিৰ্ধাৰণ কৰা হৈছে।
ফলত এতিয়া যিকোনো প্ৰাৰ্থীয়ে ঋণাত্মক নম্বৰ পাইও কাউন্সেলিঙত অংশগ্ৰহণ কৰিব পাৰিব। এই সিদ্ধান্তৰ স্পষ্ট উদ্দেশ্য হৈছে আসনৰ অপচয় ৰোধ কৰা। কিন্তু ইয়াৰ ফলত চিকিৎসা জগতত ব্যাপক ক্ষোভৰ সৃষ্টি হৈছে। আটাইতকৈ চিন্তনীয় কথাটো হ’ল খালী ৰোৱা আসনৰ আধাতকৈও অধিক ব্যক্তিগত চিকিৎসা মহাবিদ্যালয়ত। ইয়াত মাচুল ২৫ লাখৰ পৰা ১ কোটি টকাৰ ওপৰত।
বহু প্ৰাৰ্থীয়ে অধিক মাচুল, নন-ক্লিনিকেল শাখা (যেনে এনাটমী, ফিজিঅ’লজী), দূৰৈৰ কলেজ বা দুৰ্বল আন্তঃগাঁথনিৰ বাবে আসন গ্ৰহণ নকৰে। ফলস্বৰূপে চৰকাৰী কিছু আসন খালী হৈয়েই আছে যদিও ব্যক্তিগত কলেজৰ আসন আটাইতকৈ বেছি পূৰণ নোহোৱাকৈ আছে। চিকিৎসা সংস্থাসমূহে কয় যে এই কাটঅফ হ্ৰাসে মেধাক (মেৰিট) ক্ষতিগ্ৰস্ত কৰিছে।
যোগ্য প্ৰাৰ্থীসকলে কঠোৰ পৰিশ্ৰম কৰে আৰু উচ্চ নম্বৰ লাভ কৰে, কিন্তু ঋণাত্মক নম্বৰ পোৱা প্ৰাৰ্থীসকলে এতিয়া সুযোগ পাব, যাৰ ফলত চিকিৎসা শিক্ষাৰ মানদণ্ডৰ ওপৰত প্ৰশ্ন উত্থাপন হয়।
এনবিইএমএছ আৰু স্বাস্থ্য মন্ত্ৰালয়ে দাবী কৰে যে সকলো প্ৰাৰ্থী এমবিবিএছ উত্তীৰ্ণ চিকিৎসক, গতিকে তেওঁলোক প্ৰশিক্ষণৰ বাবে যোগ্য। কিন্তু সমালোচকসকলে কয় যে ব্যক্তিগত মহাবিদ্যালয়সমূহত আসন পূৰণৰ বাবে এই কাম কৰা হৈছে, য’ত মাচুল অতিৰিক্ত আৰু গুণগত মানৰ ওপৰত প্ৰশ্ন আছে।
যোৱা কেইবছৰমানৰ পৰা এনে কাটঅফ হ্ৰাস পাইছে যদিও সমস্যাটো সমাধান হোৱা নাই। প্ৰশ্ন উত্থাপন হয় যে চাহিদা নাথাকিলে কিয় ইমানবোৰ আসন বৃদ্ধি কৰা হৈছে? ব্যক্তিগত কলেজৰ মাচুল কিয় নিয়ন্ত্ৰণ কৰা হোৱা নাই? নন-ক্লিনিকেল শাখাৰ প্ৰতি আগ্ৰহ বৃদ্ধিৰ কোনো পদক্ষেপ কিয় কৰা হোৱা নাই?
এই পৰিস্থিতিয়ে দেখুৱাইছে যে ভাৰতত চিকিৎসা শিক্ষাৰ ক্ষেত্ৰত গভীৰ সংকটৰ সৃষ্টি হৈছে। এফালে চিকিৎসকৰ অভাৱ, আনফালে খালী আসন। কাটঅফ কমাই আসন ভৰোৱাটো হয়তো হ্ৰস্বম্যাদী সমাধান হ’ব পাৰে, কিন্তু দীৰ্ঘম্যাদীভাৱে চিকিৎসকৰ মানদণ্ড, ৰোগীৰ সুৰক্ষা, দেশৰ স্বাস্থ্য ব্যৱস্থাৰ ক্ষতি হ’ব পাৰে।
