ভাৰতত সংখ্যালঘুৰ ওপৰত আচৰণৰ অৱনতি ঘটিছে বুলি মাৰ্কিন যুক্তৰাষ্ট্ৰৰ আন্তৰ্জাতিক ধৰ্মীয় স্বাধীনতা সংক্ৰান্ত কমিছনে (USCIRF) এক প্ৰতিবেদন প্ৰকাশ কৰিছে। এই প্ৰতিবেদনত ভাৰতৰ বৈদেশিক গুপ্তচৰ সংস্থা ৰিচাৰ্চ এণ্ড এনালিচিছ উইং (R&AW)ৰ ওপৰত নিষেধাজ্ঞা জাৰিৰ পৰামৰ্শ কৰা হৈছে।
আমেৰিকা আৰু কানাডাত শিখ বিচ্ছিন্নতাবাদীৰ হত্যাৰ ষড়যন্ত্ৰত R&AWৰজড়িত থকাৰ অভিযোগ উত্থাপন কৰি কমিছনে ভাৰতক নিৰ্দিষ্ট কাৰণত উদ্বেগজনক দেশ হিচাপে চিহ্নিত কৰাৰ পৰামৰ্শ প্ৰদান কৰিছে।
২০২৩ চনত আমেৰিকাই অভিযোগ কৰিছিল যে ভাৰতে খলিস্তানিক আমেৰিকা আৰু কানাডাত হত্যাৰ চেষ্টা কৰিছিল, যাৰ ফলত দুয়োখন দেশৰ সম্পৰ্কত তিক্ততাৰ সৃষ্টি হৈছিল। প্ৰাক্তন গুপ্তচৰ বিকাশ যাদৱৰ বিৰুদ্ধে আমেৰিকাই গ্ৰেপ্তাৰী পৰোৱান জাৰি কৰিছিল, যদিও ভাৰতে এই অভিযোগ অস্বীকাৰ কৰিছিল।
প্ৰতিবেদনত কোৱা হৈছে, ২০২৪ চনত ভাৰতত ধৰ্মীয় স্বাধীনতাৰ অৱনতি ঘটাৰ লগতে সংখ্যালঘুৰ ওপৰত হাৰাশাস্তি আৰু বৈষম্য বৃদ্ধি পাইছে। হিন্দু জাতীয়তাবাদী প্ৰধানমন্ত্ৰী নৰেন্দ্ৰ মোদী আৰু তেওঁৰ ভাৰতীয় জনতা পাৰ্টিয়ে মুছলমান আৰু অন্যান্য সংখ্যালঘুৰ বিৰুদ্ধে ঘৃণামূলক ভাষণ আৰু অপপ্ৰচাৰ চলোৱাৰ অভিযোগ উত্থাপন কৰিছিল। বিগত বৰ্ষৰ নিৰ্বাচনৰ সময়ত মোদীয়ে মুছলমানক অনুপ্ৰৱেশকাৰী বুলি মন্তব্য কৰাৰ কথাও উল্লেখ কৰিছে প্ৰতিবেদনখনত।
মাৰ্কিন বিদেশ মন্ত্ৰণালয়ৰ প্ৰতিবেদনত সংখ্যালঘুৰ নিৰ্যাতনৰ কথা উত্থাপন কৰিলে ভাৰতে সদায় ইয়াক একপক্ষীয় বুলি খাৰিজ কৰি আহিছে। অৱশ্যে এই প্ৰতিবেদন সন্দৰ্ভত ভাৰতে এতিয়ালৈ কোনো প্ৰতিক্ৰিয়া প্ৰকাশ কৰা নাই।
