মহানগৰীৰ উলুবাৰীৰ বি কে কাকতি পথত সংঘটিত এক বিধ্বংসী অগ্নিকাণ্ডত কেইবাটাও বাসগৃহ আৰু ব্যৱসায়িক প্ৰতিষ্ঠান সম্পূৰ্ণৰূপে ভষ্মীভূত হয়।
বৃহস্পতিবাৰে দুপৰীয়া প্ৰায় ১২ বজাত বি কে কাকতি পথৰ মান্তি সিং নামৰ মহিলাগৰাকীৰ মালিকানাধীন চৌহদত এই অগ্নিকাণ্ড সংঘটিত হয়। চৌহদটোত থকা তৰ্জাৰ বেৰৰ ঘৰত প্ৰায় ১০ টা পৰিয়াল ভাড়াতীয়া হিচাপে আছিল।
অগ্নিকাণ্ডৰ সঠিক কাৰণ বৰ্তমানলৈ জানিব পৰা হোৱা নাই যদিও চৌহদটোত থকা এগৰাকী মহিলাই প্ৰকাশ কৰা মতে ভাত ৰান্ধি থকা সময়ত ষ্টোভৰ পৰা জুইৰ সুত্ৰপাত ঘটে আৰু নিমিষতে সমগ্ৰ চৌহদটো আৱৰি ধৰে।
অগ্নিকাণ্ডটোত প্ৰায় ৭ টা চিলিণ্ডাৰ বিষ্ফোৰণ ঘটে আৰু চৌহদটোত থকা কেবাটাও তৰ্জাৰ বেৰৰ ঘৰৰ লগতে সম্মুখৰ তিনিখন দোকান ভষ্মীভূত হয়। ইয়াৰ উপৰিও চৌহদটোৰ পৰা জুই ওচৰতে থকা ঘৰবোৰলৈও সম্প্ৰসাৰিত হয়।
ইয়াৰ পিছতে ঘটনাস্থলীত অগ্নি-নিৰ্বাপক বাহিনী উপস্থিত হৈ প্ৰায় ডেৰ ঘন্টা জোৰা প্ৰচেষ্টাৰ পিছত জুই নিৰ্বাপিত কৰিবলৈ সক্ষম হয়।
অগ্নিকাণ্ডটোত কোনো লোক হতাহত হোৱা নাই যদিও কেইবালাখ টকাৰ সা-সম্পত্তি সম্পূৰ্ণৰূপে জুইত জাহ যায়।