বিগত বৰ্ষত আৰম্ভ হোৱা অসম আৰক্ষীৰ Mission for Overall Improvement for Responsive Image চমুকৈ MOITRI (মৈত্ৰী) আঁচনিৰ অধীনত মাৰ্ঘেৰিটা আৰক্ষী থানা গৃহ অত্যাধুনিক ৰূপত নিৰ্মাণ কৰা থকা হৈছে।
মাৰ্ঘেৰিটাৰ বিধায়ক ভাস্কৰ শৰ্মাই আজি উক্ত নিৰ্মাণকাৰ্য পৰিদৰ্শন কৰাৰ লগতে মাৰ্ঘেৰিটা আৰক্ষী থানাৰ ভাৰপ্ৰাপ্ত আৰক্ষী বিষয়া মুন্দিদ্ৰ চমুৱাৰ সৈতে এক বৈঠকত মিলিত হয়।
উক্ত বৈঠকত অঞ্চলটোৰ আইন-শৃংখলা সম্পৰ্কীয় কেইবাটাও গুৰুত্বপূৰ্ণ বিষয় আৰু গাওঁৰক্ষী বাহিনীৰ শক্তিশালীকৰণৰ সন্দৰ্ভত আলোচনা কৰা হয়।
উল্লেখযোগ্য যে অসম-অৰুণাচল প্ৰদেশৰ সীমামূৰীয়া মাৰ্ঘেৰিটা আৰক্ষী থানাই এক বৃহৎ অঞ্চল সামৰি উগ্ৰপন্থী বিৰোধী অভিযান তথা আন আন আইন শৃংখলাজনিত সমস্যাৰ মোকাবিলা কৰিব লাগে যদিও থানাখনত প্ৰৰ্য্যাপ্ত পৰিমাণৰ আৰক্ষীৰ অভাৱ।
অসম চৰকাৰে আৰক্ষী থানা সমূহক অধিক গতিশীল কৰাৰ মানসেৰে ৰাজ্যৰ ৩৫৫খন থানাক ‘মৈত্ৰী’ আঁচনিৰ অধীনত উন্নীত কৰাৰ লক্ষ্য হৈছিল।
প্ৰথম পৰ্যায়ত ইয়াৰে ৭৩খন থানাক অত্যাধুনিকভাৱে সজাই-পৰাই তোলাৰ বাবে ৰাজ্য চৰকাৰৰ বিত্ত বিভাগে ইতিমধ্যে ১৮৯ কোটি টকা মুকলি কৰি দিছে।
থানাসমূহক ‘গ্ৰীণ ফিল্ড আৰু ব্ৰাউন ফিল্ড’ ভাগত ভাগ কৰা হ’ব। গ্ৰীণ ফিল্ড আঁচনিত থানাসমূহ নতুনকৈ নিৰ্মাণ কৰা হ’ব আৰু ব্ৰাউন ফিল্ড আঁচনিত থানাসমূহ মেৰামতি কৰা হ’ব।
নতুনকৈ নিৰ্মাণ কৰা থানাসমূহত সভাকক্ষ, বিশেষভাৱে সক্ষম লোকৰ বাবে আৰু মহিলা-যুৱতীৰ বাবে বিশেষ কোঠা, ড্ৰাগছ আসক্ত আৰু শিশু অপৰাধীৰ বাবে বিশেষ কোঠাৰ উপৰি বিভিন্ন সা-সুবিধা উপলব্ধ হ’ব।
