আজি শনিবাৰে অষ্টমীৰ দিনটোত কলিয়াবৰৰ শিলঘাটৰ ব্ৰহ্মপুত্ৰৰ ঘাটত হাজাৰ-হাজাৰ দৰ্শনাৰ্থীৰ সমাগম ঘটে। ব্ৰহ্মপুত্ৰত পবিত্ৰ স্নান কৰাৰ উদ্দেশ্য ভক্তপ্ৰাণ ৰাইজে ভিৰ কৰেহি শিলঘাটৰ ব্ৰহ্মপুত্ৰৰ পাৰত।
প্ৰবাদ আছে যে, চ’ত মাহৰ শুক্লাষ্টমীৰ দিনটোত গংগা নৈ ব্ৰহ্মপুত্ৰ বুকুৱেদি উজাই বয় আৰু এই পবিত্ৰ জলধাৰাত স্নান কৰিলে পাপ খণ্ডন হয়। সেয়েহে, আজিৰ দিনটোত ব্ৰহ্মপুত্ৰত গংগা স্নান কৰাৰ উদ্দেশ্যে ৰাজ্যৰ ভিন্ন প্ৰান্তৰ হাজাৰ-হাজাৰ লোকৰ সমাগম ঘটে শিলঘাটৰ ব্ৰহ্মপুত্ৰৰ ঘাটত।
আজি অষ্টমীৰ দিনটোৰ পৰা শিলঘাটৰ কামাখ্যা দেৱালৰ নামনিত ব্ৰহ্মপুত্ৰৰ পাৰত সপ্তাহ-যোৰাকৈ অনুষ্ঠিত হৈছে বিশাল অশোকাষ্টমী মেলা।
এই বিশাল মেলালৈ ৰাজ্যৰ বিভিন্ন প্ৰান্তৰ পৰা বহু ব্যৱসায়ীয়ে প্ৰতি বছৰৰ দৰে এইবাৰো বেপাৰৰ বাবে আহি শিলঘাটত ভিৰ কৰা পৰিলক্ষিত হৈছে। অশোকঅষ্টমী মেলা কমিটিয়ে প্ৰতি বছৰৰ দৰে এইবাৰো মেলাস্থলীত হাজাৰ হাজাৰ লোকৰ সমাগম হ’ব বুলি আশা কৰিছে।