‘‘ অসম আৰক্ষীৰ বহু লোক ক’ৰ’নাত আক্ৰান্ত হৈছে ৷ এয়া কঠিন সময়, ৰাইজৰ মাজত থাকি কাম কৰিছে আৰক্ষীয়ে,’’ অসম আৰক্ষীৰ মুখ্য কাৰ্যালয়ত অনুষ্ঠিত এখন সংবাদ মেলত এইদৰে কয় আৰক্ষী সঞ্চালক প্ৰধান ভাস্কৰ জ্যোতি মহন্তয়।
ক’ৰ’নাৰ সংক্ৰমণৰ সময়ত অসম আৰক্ষীয়ে এটা ব্যৱস্থাপনা সাজু কৰিছে বুলি উল্লেখ কৰি মহন্তই কয় ‘‘আৰক্ষীৰ ক’ৰ’না আক্ৰান্ত সকলৰ সৈতে দিনে দুবাৰকৈ ফোন কৰি সা-সুবিধা সন্দৰ্ভত খবৰ লোৱা হৈছে ৷ আমাৰ হেল্প ডেস্ক সাজু হৈ আছে। আক্ৰান্ত সকলৰ পৰিয়ালৰো দৈনিক খবৰ লোৱা হৈছে।”
আৰক্ষীৰ মনোবল বৃদ্ধি কৰাৰ বাবে লোৱা বিভিন্ন পদক্ষেপৰ বাবে মুখ্য মন্ত্ৰী সৰ্বানন্দ সোণোৱালক কৃতজ্ঞতা জ্ঞাপন কৰে ডিজিপি মহন্তই ৷
আনহাতে, স্বাস্থ্য মন্ত্ৰী হিমন্ত বিশ্ব শৰ্মাক ধন্যবাদ জনাই মহন্তই কয়, ‘‘খানাপাৰাৰ কোভিড কেয়াৰ কেন্দ্ৰত এটা য়ুনিত আৰক্ষীৰ লোকৰ চিকিৎসাৰ বাবে বিশেষকৈ দিয়া হৈছে। ”
ইপিনে, অসম আৰক্ষীয়ে ক’ৰ’নাৰ সৈতে যুজিবলৈ অত্যাধুনিক সা-সুবিধাৰে দেৰগাঁৱত এখন ২৬ খন আসন যুক্ত অত্যাধুনিক চিকিৎসালয় নিৰ্মাণ কৰা হ’ব বুলিও মহন্তই লগতে কয়।
বৰমনিপুৰতো এখন কোভিদ কেয়াৰ কেন্দ্ৰ এটা স্থাপন কৰা হৈছে ৷ যাৰ বাবে ২২ জন চিকিৎসক আৰু ২৫০ জন নাৰ্চক প্ৰশিক্ষণ দি থকা বুলি জানিব দিয়ে আৰক্ষী সঞ্চালক প্ৰধান গৰাকীয়ে।
সংবাদমেলত কৃষক মুক্তি সংগ্ৰাম সমিতিৰ নেতা অখিল গগৈ সন্দৰ্ভতো মত ব্যক্ত কৰে আৰক্ষী সঞ্চালক প্ৰধান গৰাকীয়ে।
অখিল গগৈ যদিহে অসুস্থ তেওঁৰ চিকিৎসাৰ সকলো ব্যৱস্থা গ্ৰহণ কৰা হ’ব বুলি তেওঁ কয়।
এই পৰ্যন্ত অসম আৰক্ষীৰ ২২০ গৰাকী লোক ক’ৰ’নাত আক্ৰান্ত হৈছে আৰু ৯৪৫ গৰাকী আৰক্ষীৰ লোক কোৱাৰেন্টাইনত আছে বুলি মহন্তই উল্লেখ কৰে।
তেওঁ লগতে অসম আৰক্ষীয়ে পূৰ্বতে এনেকুৱা পৰিবেশ হ’ব পাৰে বুলি ধাৰণ কৰি প্ৰস্তুতি সম্পূৰ্ণ কৰিছিল বুলি মত ব্যক্ত কৰে।
ক’ৰ’নাৰ সংক্ৰমণৰ সময়তো আৰক্ষীৰ উগ্ৰপন্থী বিৰোধী অভিযানৰ চোক হ্ৰাস পোৱা নাই বুলিও ডি জি পি গৰাকীয়ে উল্লেখ কৰি ল’কডাউনৰ সময়তো আৰক্ষীয়ে বিভিন্ন স্থানত অভিযান চলাই অবৈধ মাৰণাস্ত্ৰ, ড্ৰাগছ ইত্যাদি উদ্ধাৰ কৰিবলৈ সক্ষম হৈছে বুলি কয়।
আৰক্ষীৰ যিসকল কৰ’নাত আক্ৰান্ত হৈছে তেওঁলোকৰ অৱস্থা সুস্থিৰ বুলি জনাই মহন্তই ৷
