বাংলাদেশত পুনৰ একবাৰ হিংসাত্মক পৰিস্থিতিৰ সৃষ্টি হৈছে। ইউনুছ চৰকাৰৰ বিৰুদ্ধে বিদ্ৰোহ ঘোষণা কৰি আৱামী লীগৰ কৰ্মীসকলে ব্যাপক প্ৰতিবাদ আৰম্ভ কৰিছে। ৰাজধানী ঢাকাত চলি থকা এই উত্তেজনাময় পৰিস্থিতিৰ মাজতে এতিয়ালৈকে কমেও ১৭খন বাছত অগ্নি সংযোগ কৰা হৈছে। লগতে চহৰখনৰ পাঁচটা স্থানত বিস্ফোৰণৰ খবৰো পোৱা গৈছে। পৰিস্থিতি নিয়ন্ত্ৰণৰ উদ্দেশ্যে ঢাকা আৰু মৈমনসিংৰ দৰে ডাঙৰ চহৰত সেনাবাহিনী মোতায়েন কৰা হৈছে।
বাংলাদেশৰ প্ৰসিদ্ধ সংবাদপত্ৰ প্ৰথম আলোৰ খবৰ অনুসৰি, বৃহস্পতিবাৰে প্ৰথমে কমলপুৰ ষ্টেচনৰ বাহিৰত আৰু গোপালগঞ্জ PWD বিভাগৰ কাৰ্যালয়ত আৱামী লীগৰ কৰ্মীসকলে অগ্নি সংযোগ কৰে। ইয়াৰ পিছতে তেওঁলোকে দুখন বাছ জ্বলাই দিয়ে আৰু ৰাজপথত উত্তেজনাময় পৰিস্থিতিৰ সৃষ্টি কৰে।
আন্তঃৰাষ্ট্ৰীয় ন্যায়ালয়ে ১৩ নৱেম্বৰত শ্বেখ হাছিনাৰ বিৰুদ্ধে প্ৰথম ৰায় ঘোষণা কৰাৰ কথা। আৱামী লীগৰ কৰ্মীসকলে আশংকা কৰিছে যে এই ৰায়ত হাছিনাক দোষী সাব্যস্ত কৰা হ‘ব পাৰে, যাৰ ফলত তেওঁ বাংলাদেশলৈ ঘূৰি অহাত বাধা সৃষ্টি হ’ব পাৰে।
উল্লেখ্য যে, ২০২৪ চনৰ জুলাই মাহত হোৱা বিদ্ৰোহৰ সময়ত হাছিনাৰ বিৰুদ্ধে মানৱাধিকাৰ লংঘনৰ অভিযোগ উঠিছিল। সেই সময়ত হাছিনাৰ নিৰ্দেশত আৰক্ষীয়ে প্ৰতিবাদকাৰীসকলৰ ওপৰত গুলীচালনা কৰিছিল বুলি অভিযোগ উত্থাপিত হৈছিল। এই গোচৰত হাছিনাৰ উপৰিও প্ৰাক্তন গৃহমন্ত্ৰীও অভিযুক্ত।
ইপিনে, দিল্লীত শ্বেখ হাছিনাই এক সাক্ষাৎকাৰত ইউনুছ চৰকাৰক “আমেৰিকাৰ পণ্য” বুলি অভিহিত কৰি তীব্ৰ আক্ৰমণ কৰে। তেওঁৰ মতে, ইউনুছ চৰকাৰে বাংলাদেশৰ স্বাৰ্থ আমেৰিকাৰ আগত বিক্ৰী কৰিছে।
ইফালে, ইউনুছ চৰকাৰৰ মুখপাত্ৰই হাছিনাকেই এই হিংসাৰ মূল কাৰণ বুলি অভিহিত কৰিছে। তেওঁ কয়, “হাছিনাৰ নিৰ্দেশত দেশখন পুনৰ অগ্নিকুণ্ডত পৰিণত কৰাৰ চেষ্টা কৰা হৈছে।”
বাংলাদেশ চৰকাৰে নাগৰিকসকলক ১৩ নৱেম্বৰত ঘৰতে থাকিবলৈ আহ্বান জনায় আৰু সকলো চোৰাংচোৱা সংস্থাক হাই এলাৰ্টত ৰখা হৈছে। বাংলাদেশ আৰক্ষীয়ে বিগত ২৪ ঘণ্টাত ১০০ৰো অধিক আৱামী লীগ কৰ্মীক গ্ৰেপ্তাৰ কৰিছে। হিংসা দমন কৰিবলৈ বিজিপি, আৰক্ষী আৰু সেনা জোৱান সক্ৰিয়ভাৱে মোতায়েন কৰা হৈছে।
এনে পৰিস্থিতিয়ে এতিয়া বাংলাদেশৰ ৰাজনৈতিক পৰিৱেশক পুনৰ এক সংকটজনক পৰ্যায়লৈ লৈ গৈছে।
