ভাৰতীয় ক্ৰিকেট দলৰ প্ৰাক্তন অধিনায়ক‘কেপ্টেইন কুল’ তথা প্ৰাদেশিক সেনাৰ লেফটেনেন্ট কৰ্ণেল মহেন্দ্ৰ সিং ধোনীয়ে সেনাৰ প্ৰশিক্ষণৰ বাবে অধিক সময় জম্মু-কাশ্মীৰত কটাব। ধোনীৰ এই আগ্ৰহৰ প্ৰতি সন্মতি জনাইছে সেনা প্ৰধান বিপিন ৰাৱাটে।
ধোনীয়ে তেওঁৰ নিজৰ ১০৬ ইনফেন্ট্ৰি বেটেলিয়নৰ সৈতে জড়িত হৈ থাকিব। ইয়াত বেটেলিয়নটো পেৰাছ্যুট ৰেজিমেন্ট হিচাপে আছে। অৱশ্যে, সেনাৰ ফালৰ পৰা স্পষ্ট কৰি দিয়া হৈছে যে এই সময়ছোৱাত ধোনীক সেনাৰ কোনো অভিযানৰ অংশ কৰি লোৱা নহয়।
ধোনীৰ দুমাহৰ প্ৰশিক্ষণ আগষ্ট মাহৰ পৰা আৰম্ভ হ’ব আৰু ইয়াৰ বাবে তেওঁ ইতিমধ্যে প্ৰস্তুতি আৰম্ভ কৰিছে।
মহেন্দ্ৰ সিং ধোনীয়ে কাশ্মীৰত থকাৰ কাৰণটো হৈছে তেওঁৰ ১০৬ ইনফেন্ট্ৰি বেটেলিয়নটো কাশ্মীৰত সম্প্ৰতি কৰ্তব্য সম্পাদনৰ বাবে নিয়োগ কৰা হৈছে। বেটেলিয়নটোৰ মুখ্য কাৰ্যালয় হৈছে বাংগালোৰত।
উল্লেখযোগ্য যে বিশ্বকাপৰ পাছৰে পৰাই ধোনীৰ অৱসৰক লৈ বিভিন্ন ধৰণৰ বাতৰি প্ৰকাশ পাই আহিছে। কিন্তু ৱেষ্টইণ্ডিজ ভ্ৰমণৰ বাবে টীম ইণ্ডিয়াৰ নিৰ্বাচনৰ বৈঠকৰ পাছত মুখ্য নিৰ্বাচক এম এস কে প্ৰসাদে ধোনীৰ অৱসৰ গ্ৰহণৰ প্ৰসংগটো নস্যাৎ কৰিছে।
মহেন্দ্ৰ সিং ধোনীয়ে বহু সময়ত কৈছে যে যদি তেওঁ ক্ৰিকেটাৰ নহ’লহেঁতেন তেতিয়াহ’লে তেওঁ হয়তো সেনাত যোগদান কৰিলেহেঁতেন। তেওঁৰ কিট বেগটোও আনকি বহুবাৰ সেনাৰ ৰঙৰ দেখা গৈছিল। সেনাৰ ৰঙৰ তেওঁ টী-শ্বাৰ্টো পৰিধান কৰে। তেওঁ তেওঁৰ গ্লোবছটো বলিদান বেজ লগাইছিল।
ধোনীয়ে এইবাৰেই প্ৰথমবাৰৰ বাবে সেনাৰ প্ৰশিক্ষণ ল’বলৈ আগবঢ়া নাই। ২০১৫ চনত ধোনীয়ে আগ্ৰাত এক মাহৰ বাবে পেৰা প্ৰশিক্ষণ স্কুলত বিশেষ বাহিনীৰ সৈতে প্ৰশিক্ষণ লৈছিল।