ধুবুৰী আৰক্ষীয়ে শনিবাৰে অবৈধ তিৰ খেলৰ বিৰুদ্ধে এক অভিযান চলাই ৪ গৰাকীকৈ ব্যক্তিক গ্ৰেপ্তাৰ কৰাৰ লগতে তেওঁলোকৰ পৰা নগদ ২০ হাজাৰ টকা জব্দ কৰে।
ধুবুৰীৰ উপ আৰক্ষী অধীক্ষক ত্ৰিনয়ন বৰুৱাই এই কথা জানিবলৈ দি কয় যে এক গোপন সূত্ৰৰ পম খদি আৰক্ষীৰ দলে জিলাখনৰ বিভিন্ন স্থানত অভিযান চলাই তামৰহাট অঞ্চলৰ পৰা ২জন, আলমগঞ্জ বজাৰৰ পৰা এজন আৰু গোলকগঞ্জ বজাৰ অঞ্চলৰ পৰা এজনক আটক কৰিবলৈ সক্ষম হয়।
ধৃত লোককেইজনক তামৰহাটৰ ফজলুৰ ৰহমান (৫৮) আৰু দেবব্ৰত শাহা (২৯), আলমগঞ্জৰ বাকৰ আলী (৪০) আৰু গোলকগঞ্জৰ ৰাজু শাহা (৩৫) বুলি চিনাক্ত কৰা হৈছে।
আটক কৰা লোককেইজনৰ বিৰুদ্ধে ইতিমধ্যে প্ৰয়োজনীয় আইনী ব্যৱস্থা গ্ৰহণ কৰা হৈছে বুলি আৰক্ষীৰ সূত্ৰত প্ৰকাশ।
আনহাতে ধুবুৰী সদৰ আৰক্ষী থানাৰ উপ পৰিদৰ্শক মহিদুল জামানৰ নেতৃত্বত চলা এক অভিযানত এজন ড্ৰাগছ সৰবৰাহকাৰীক আটক কৰা হয়। ধৃত লোকজনক ধুবুৰীৰ ৩ নং আইৰনজঙলা গাঁৱৰ আমজাদ আলী মোল্লাহৰ পুত্ৰ ছাহাবুদ্দিন মোল্লাহ বুলি চিনাক্ত কৰা হৈছে।
উক্ত অভিযানৰ সময়ত আৰক্ষীয়ে ধৃত ব্যক্তিজনৰ পৰা ৭২টা নিষিদ্ধ জাতীয় আৰ চি কফ চিৰাপৰ বটল জব্দ কৰে।
