অপৰিৱৰ্তনীয় হৈয়ে আছে ডিব্ৰুগড় জিলাৰ কোভিড পৰিস্থিতি।
বুধবাৰে দিনটোত ডিব্ৰুগড়ত ৩৭৫ গৰাকী লোকৰ শৰীৰত কোভিড অৱস্থিতি ধৰা পৰাৰ বিপৰীতে মৃত্যু হৈছে আৰু ১০ গৰাকী আক্ৰান্তৰ।
আনহাতে বুধবাৰৰ দিনটোত ডিব্ৰুগড় কেন্দ্ৰীয় কাৰাগাৰ ৫২ গৰাকীকৈ কয়দীৰ শৰীৰতো পোৱা গৈছে কোভিড ভাইৰাছৰ অৱস্থিতি। তেওঁলোকক কাৰাগৰৰ ভিতৰতে আইচ’লেশ্যনত ৰখা হৈছে।
বুধবাৰে ৩৭৫ গৰাকীৰ শৰীৰত কোভিডৰ অৱস্থিতি ধৰাৰ পৰাৰ লগে লগে জিলাখনত কোভিড ৰোগীৰ সংখ্যা ৮৮৪৫ গৰাকীলৈ বৃদ্ধি পালে। বৰ্তমান কোভিড এক্টিভ হৈ থকা আক্ৰান্তৰ সংখ্যা হৈছে ৪৪৪১ গৰাকী।
“বৰ্তমানলৈকে কোভিড এক্টিভ ৰোগীৰ সংখ্যা হৈছে ৪৪৪১ গৰাকী। জিলাখনত বুধবাৰে ১০ গৰাকী আক্ৰান্তৰ মৃত্যু হৈছে।” ডিব্ৰুগড় জিলা স্বাস্থ্য বিভাগে কয়।
ইফালে ডিব্ৰুগড় জিলা প্ৰশাসনে মৰাণ আৰু তাৰ দাতিকাষৰীয়া অঞ্চলসমূহত কোভিড আক্ৰান্ত লোকৰ সংখ্যা বৃদ্ধি হোৱাৰ বাবে মৰাণত এটা কোভিড কেয়াৰ চেণ্টাৰ আৰম্ভ কৰিছে।
জিলা প্ৰশাসনে জিলাখনত কোভিড সংক্ৰমণ প্ৰতিৰোধ কৰিবলৈ কোভিড প্ৰটকল কঠোৰভাৱে বলৱৎ কৰিছে যদিও কোভিড সংক্ৰমণ প্ৰতিৰোধ কৰিব পৰা নাই। আনফালে জিলাখনৰ চাহ বাগিচাসমূহতো ক্ৰমশঃ বৃদ্ধি পাইছে কোভিড সংক্ৰমণ।
“আমি জিলাখনত ১৯ টা কন্টেইনমেন্ট জ’ন ঘোষণা কৰিছো। চাহ বাগিচাসমূহতো বহু কোভিড পজিটিভ পোৱা গৈছে। আমি বাগিচাসমূহত প্ৰতিষেধক প্ৰদান কৰা আৰম্ভ কৰিছো।” জিলা উপায়ুক্ত পল্লৱ কুমাৰ ঝাএ সংবাদ মাধ্যমৰ আগত কয়।
