আমি এনে এটা যুগৰ এনে এটা পৰিস্থিতিত আছোঁ যে প্ৰয়োজন হওক বা নহওক দিন-ৰাতিয়ে আমি মোবাইল ফোনটোৰ লগতে সময় কটাও। মোবাইলৰ প্ৰতি থকা এই আসক্তিয়ে আমাৰ জীৱনটো একাকী আৰু নিসংগ কৰি তুলিছে। ফোনটোৱে আমাৰ সম্পৰ্কবোৰৰ লগতে মানসিক অৱস্থাতো কুপ্ৰভাৱ পেলাইছে। যাৰ ফলত নতুনকৈ সৃষ্টি হৈছে এটা ধাৰা – ডিজিটেল ডিটক্স ভেকেশ্যনছ।
মোবাইল আৰু কম্পিউটাৰে আমাৰ জীৱনটো, আমাৰ মানসিক অৱস্থাক ভাৰাক্ৰান্ত কৰি পেলাইছে। যাৰ বাবে মানুহে এতিয়া ডিজিটেল বস্তুটোৰ পৰা পলায়নৰ বাবে হাহাকাৰ কৰিছে।
এই কথাটোলৈ লক্ষ্য কৰি শেহতীয়াকৈ হোটেল, ৰিজৰ্ট বা ৰেষ্টুৰেন্ট সমূহেও মানুহক ডিজিটেল ছুটী প্ৰদানৰ বাবে ব্যৱস্থা গ্ৰহণ কৰিছে। মানুহে ডিজিটেল দুনীয়াৰ পৰা অলপ সময়ৰ বাবে পৰিত্ৰাণ বিচাৰি নিৰ্জন ঠাই, ৰিজৰ্ট আদিত ছুটী কটাবলৈ যাবলৈ আৰম্ভ কৰিছে।
ৰিজৰ্টসমূহেও এতিয়া গ্ৰাহকক সময় কটাবলৈ জাৰ্নেল বা কিতাপ আগবঢ়াবলৈ লৈছে। ভ্ৰমণকাৰীসকলক মানসিক অৱস্থা উন্নত কৰিবৰ বাবে যোগ, ধ্যান, আনকি জাৰ্নেলিং ক্লাছো অন্তৰ্ভুক্ত কৰিছে ৰিজৰ্ট সমূহত।
ৰিজৰ্ট সমূহে শেহতীয়াকৈ ৱাই ফাই বা ইন্টাৰনেট সেৱা নিজৰ সুবিধা সমূহৰ পৰা আঁতৰাই ডিজিটেল ডিটক্স ভেকেশ্যনৰ ব্যৱস্থা কৰিছে।
মাজনিশাৰ কথোপকথন, ভ্ৰমণ, আদ্দা, সংগীত, দুর্গম স্থান ভ্ৰমণ আদিৰ বাবে পৰ্যটকক আমন্ত্ৰণ কৰি বিশেষ ব্যৱস্থা হাতত লৈছে পৰ্যটন উদ্যোগসমূহৰ লগতে ৰিজৰ্ট, হোম ষ্টে বা হোটেলসমূহে।
এই ডিজিটেল ডিটক্স ভেকেশ্যনছে ভ্ৰমণকাৰী বা পৰ্যটকক মানসিক চাপ আৰু উদ্বেগ হ্ৰাস কৰাত সহায় কৰিছে। ফলত মনোযোগ আৰু সৃষ্টিশীলতা বৃদ্ধি পাইছে। ডিজিটেল ভেকেশ্যনে উন্নত টোপনিতো সহায় কৰিছে।
মুঠৰ ওপৰত ভাৰ্চুৱেল জগতৰ পৰা আঁতৰি নিজক সময় দি মানসিক প্ৰশান্তি লাভ কৰাৰ বাবেই শেহতীয়াকৈ এই ধাৰাটো জনপ্ৰিয় হৈ উঠিছে।
