বৰপেটা জিলাৰ সীমান্ত এলেকা কোকিলা-গুনিয়ালগুৰী সংযোগী দলঙৰ জৰাজীৰ্ণ ৰূপ একাংশ প্ৰচাৰ মাধ্যমত বাৰে বাৰে প্ৰকাশ হোৱাৰ পিছত কোকিলা আৰক্ষী নিৰীক্ষণ চকীৰ ভাৰপ্ৰাপ্ত আৰক্ষী বিষয়া শিৱ প্ৰসাদ কলিতাই ৰাইজৰ সুবিধাৰ্থে বাঁহৰ সাকো নিৰ্মাণ কৰি দিয়ে।
উল্লেখ্য যে ২০১৮-১৯ বৰ্ষত লাচিত চিলাৰায় আঁচনিৰ অধীনত বিধায়ক আব্দুল হাই নাগৰীয়ে ২০১৮ চনৰ ২৭ মে’ত ৩৮.৭৬ মিটাৰ দীঘল ১৬৯.৯৩ কোটি টকাৰ ব্যয় সাপেক্ষে দলঙৰ কাম আৰম্ভ কৰে।
কিন্তু ঠিকাদাৰ জামিনুৰ খন্দকাৰে লেহেমীয়া আৰু নিম্নমানৰ সামগ্ৰীৰে কাম কৰাৰ বাবে ৰাইজে টুলুঙা নাওৰে পকেটৰ টকা দি পাৰাপাৰ হ’ব লগীয়া হৈছে।
বিগত আঢ়ৈটা বছৰে যমৰ যাতনাত ভূগিবলগীয়া হৈছে বৃহত্তৰ অঞ্চলৰ জন সাধাৰণ।
পূৰ্বতে ইয়াত থকা কাঠৰ দলংখন ভাঙি সম্পূৰ্ণ কাঠ ঠিকাদাৰজনে লৈ গৈ বাঁহৰ সাকো নিৰ্মাণ কৰি দিয়ে। কিন্তু নিৰ্মাণৰ কিছু দিন পিছতেই সাকোখন ভাঙি যাতায়ত অচল হৈ পৰে।
ইয়াৰ পিছত বহুবাৰ ৰাইজে দলংখন নিৰ্মাণ কৰে যদিও প্ৰায় এমাহ ধৰি ৰাইজে পাৰাপাৰ হ’ব পৰা নাই। দৈনিক হাজাৰ হাজাৰ ৰাইজৰ এইটো ৰাস্তাৰে পাৰাপাৰ হ’বলগীয়া হয়।
লকডাউনৰ আগতে ১২/১ৃ৪ খন বিদ্যালয়-মহাবিদ্যালয়ৰ ছাত্ৰ-ছাত্ৰী এইখন দলঙেৰে পাৰাপাৰ হৈছে। বিভিন্ন সময়ত দুই এটা দুৰ্ঘটনাও সংঘটিত হোৱাৰ প্ৰমাণ আছে। ইয়াৰ পিছতো গা লৰা নাই বিধায়কৰ আশীষ পুষ্ট ঠিকাদাৰ জনৰ।
আনকি ঠিকাদাৰ জনে নামমাত্ৰ দুই তিনিজন শ্ৰমিক লৈ মাটিযুক্ত বালিৰে কাম কৰি আছে। লকডাউনৰ আগত কাম বন্ধ ৰাখি এতিয়া লকডাউনৰ সময়ত লকডাউনৰ বাহানা দি মাত্ৰ ২-৩ শ্ৰমিকেৰে কাম কৰি আছে। সেয়ে ঠিকাদাৰৰ অনুজ্ঞাপত্ৰ বাতিল কৰাৰ লগতে শীঘ্ৰে কাম সম্পূৰ্ণ কৰিবলৈ দাবী জনাইছে স্থানীয় ৰাইজে।
দলং খনেৰে মানুহ পাৰাপাৰ হ’ব নোৱাৰাৰ বাবে কোকিলা আৰক্ষী নিৰীক্ষণ চকীৰ ভাৰপ্ৰাপ্ত আৰক্ষী বিষয়া শিৱ প্ৰসাদ কলিতাই ৰাইজৰ সুবিধাৰ্থে পুনৰ এখন বাঁহৰ সাকো নিৰ্মাণ কৰি দিয়ে।
আৰক্ষী বিষয়াজনৰ এনে মানসিকতাক সকলোৱে প্ৰশংসা কৰিছে।