ভাৰতৰ শীৰ্ষ স্থানীয় সন্ত্ৰাসবাদ বিৰোধী তদন্ত সংস্থা ‘ৰাষ্ট্ৰীয় অনুসন্ধান সংস্থা’, চমুকৈ নিয়া- ৰ নতুন সঞ্চালক প্ৰধান হিচাপে নিযুক্তি দিয়া হৈছে পঞ্জাৱৰ প্ৰাক্তন আৰক্ষী সঞ্চালক প্ৰধান ডিজিপি দিনকাৰ গুপ্তাক।
বৃহস্পতিবাৰে দেশৰ কৰ্মচাৰী মন্ত্ৰালয়ে জাৰি কৰা এক চৰকাৰী নিৰ্দেশ অনুসৰি কেবিনেটৰ নিযুক্তি সমিতিয়ে দিনকাৰ গুপ্তাৰ নাম নিয়াৰ মুৰব্বী হিচাপে অনুমোদন জনায়।
অভিজ্ঞ আৰক্ষী বিষয়া গৰাকী পঞ্জাৱৰ চোৰাংচোৱা বিভাগৰ আৰক্ষী সঞ্চালক প্ৰধানৰ পদতো অধিষ্ঠিত হৈছিল। পঞ্জাৱ ৰাজ্যিক চোৰাংচোৱা শাখা, ৰাজ্যিক সন্ত্ৰাসবাদী বিৰোধী দল (এটিএছ) আৰু সংগঠিত অপৰাধ নিয়ন্ত্ৰণ গোট (অ’চিচিইউ)- এই সকলো গোট পঞ্জাৱৰ চোৰাংচোৱা বিভাগৰ অন্তৰ্গত আছিল।
তদুপৰি তেওঁ ২০০৪ চনৰ পৰা ২০১২ চনলৈ ভিভিআইপিৰ নিৰাপত্তাৰ তত্বাৱধান কৰা ইণ্টেলিজেঞ্চ ব্যুৰো গোটৰ মুৰব্বী হিচাপে আঠ বছৰ কাৰ্যকাল অতিবাহিত কৰিছিল।
আৰক্ষী প্ৰশাসনত স্নাতকোত্তৰ ডিগ্ৰী লাভ কৰা দিনকৰ গুপ্তা ক্ৰমে ১৯৯২ আৰু ১৯৯৪ চনত দুটাকৈ আৰক্ষী বীৰত্ব পদকৰে সন্মানিত হৈছিল। ইয়াৰোপৰি তেওঁক গুণগত সেৱাৰ বাবে ৰাষ্ট্ৰপতিৰ দ্বাৰা পুলিচ মেডেল আৰু বিশিষ্ট সেৱাৰ বাবে ২০১০ চনত ৰাষ্ট্ৰপতি আৰক্ষী পদকৰ দ্বাৰাও সন্মানিত কৰা হৈছিল।
উল্লেখ্য যে, নিয়াৰ সঞ্চালক প্ৰধান পদৰ পৰা ৱাই চি মোডীৰ অৱসৰৰ পিছত যোৱা বৰ্ষৰ মে’ মাহত চেণ্ট্ৰেল ৰিজাৰ্ভড পুলিচ ফ’ৰ্চ(চিআৰপিএফ)- ৰ সঞ্চালক প্ৰধান কুলদ্বীপ সিঙক নিয়াৰ অতিৰিক্ত দায়িত্ব অৰ্পণ কৰা হৈছিল।
এতিয়া দিনকাৰ গুপ্তাক কুলদ্বীপ সিঙৰ স্থানত নিয়াৰ সঞ্চালক প্ৰধান হিচাপে স্থায়ী নিযুক্তি দিয়া হৈছে। কোনো আগতীয়া নিৰ্দেশনা নাহিলে তেওঁৰ অৱসৰ গ্ৰহণৰ সময় পৰ্যন্ত, ২০২৪ চনৰ ৩১ মাৰ্চলৈকে গুপ্তা নিয়াৰ মুৰব্বীৰ পদত অধিষ্ঠিত থাকিব।
স্মতৰ্ব্য যে পাকিস্তানী সন্ত্ৰাসবাদী গোটৰ দ্বাৰা সংঘটিত ভয়াৱহ ২৬/১১ মুম্বাই আক্ৰমণৰ পিছতে দেশৰ নিৰাপত্তাজনিত বিষয়ৰ প্ৰতি লক্ষ্য ৰাখি কেন্দ্ৰীয় স্বতন্ত্ৰ সংস্থা ‘নেচনেল ইনভেষ্টিগেচন এজেন্সি’ (NIA) গঠন কৰা হৈছিল।