গুৱাহাটী মহানগৰীৰ কাষৰীয়া ঐতিহাসিক দীপৰ বিলত পৰম্পৰাগতভাৱে আৰম্ভ হৈছে সমূহীয়া মাছ ধৰা উৎসৱ, যাক স্থানীয়ভাৱে ‘বিল মাৰা’ উৎসৱ বুলি জনা যায়। ইংৰাজী নৱবৰ্ষৰ প্ৰথমটো দেওবাৰে অনুষ্ঠিত হোৱা এই উৎসৱৰ প্ৰথম দিনাই বিলৰ পাৰত ক্ৰেতাৰ ব্যাপক সমাগম পৰিলক্ষিত হয়।
ৰৌ, ভকুৱা, চিতল, বৰালি, বিগহেড আৰু মিৰিকাৰ দৰে থলুৱা মাছ ক্ৰয় কৰিবলৈ পুৱাৰ পৰাই দীপৰ বিলত গ্ৰাহকৰ হেতা-ওপৰা লাগে। হাড় কঁপোৱা শীতকো নেওচি বিলৰ পাৰ উৎসৱমুখৰ হৈ পৰে। এই বিশেষ দিনটোৰ বাবে স্থানীয় মাছমৰীয়াসকলে বছৰজুৰি অপেক্ষা কৰি থাকে।
পৰম্পৰাগত নিয়ম অনুসৰি, এইবাৰো একেলগে প্ৰায় দুই হাজাৰৰো অধিক মাছমৰীয়াই বিলত নামি মাছ ধৰে। প্ৰায় ৫০০ খনৰো অধিক নাও বিলত নমোৱা হয় আৰু প্ৰতিখন নাওতে দুজন-তিনিজনকৈ মাছমৰীয়া থাকে। দীপৰ বিলৰ দাঁতি-কাষৰীয়া অঞ্চলৰ মাছমৰীয়াসকলে যুগ যুগ ধৰি মাঘ বিহুৰ উৰুকাৰ প্ৰাকক্ষণত তথা নৱবৰ্ষৰ প্ৰথমটো দেওবাৰে এই উৎসৱ পালন কৰি আহিছে।
উৎসৱৰ পূৰ্বে মাছমৰীয়াসকলে নাও ৰং কৰা, মেৰামতি কৰা আৰু জাল- সাজু কৰাকে ধৰি প্ৰায় মাহজোৰা প্ৰস্তুতি চলায়। বাৰিষাৰ সময়ত বিলত এৰি দিয়া বিভিন্ন প্ৰজাতিৰ মাছৰ পোণাবোৰ ডাঙৰ হোৱাৰ পাছত এই সময়তে সমূহীয়া মাছ ধৰা পৰ্ব অনুষ্ঠিত হয়।
দীপৰ বিলৰ এই উৎসৱৰ এক বিশেষত্ব হ’ল যে ইয়াত ধৰা মাছবোৰ কোনো ওজন নোহোৱাকৈ আনুমানিক হিচাপত বিক্ৰী কৰা হয়। এই আকৰ্ষণৰ বাবেই বিলৰ পাৰত পুৱাৰে পৰা গ্ৰাহকৰ তীব্ৰ ভিৰ হয় আৰু বহু লোকে ৫-৭ ঘণ্টালৈ অপেক্ষা কৰিও মাছ ক্ৰয় কৰে।
উল্লেখ্য যে দীপৰ বিল পাছপাৰা সমবায় সমিতিৰ বিষয়ববীয়াসকলে জনোৱা মতে, বৃহত্তৰ আজাৰা অঞ্চলৰ কেওটপাৰা, মেধিপাৰা, হীৰাপাৰা, হাতুৱাপাৰা, নোৱাপাৰা, মাটিয়া, নতুনবস্তি আৰু বৰবৰী আদি গাঁৱৰ অনুসূচিত জাতিৰ প্ৰায় ৮২৫ টা মাছমৰীয়া পৰিয়ালে এই বিলৰ ওপৰতে নিৰ্ভৰ কৰি জীৱিকা নিৰ্বাহ কৰি আহিছে। সমিতিখনে বিলৰ সংৰক্ষণ, পোণা মেলা আৰু উন্নয়নৰ কাম-কাজ তদাৰক কৰে।
এইবাৰ ৰৌ, ভকুৱা আৰু বৰালি অধিক পৰিমাণে ধৰা পৰিছে যদিও পূৰ্বৰ বছৰসমূহৰ তুলনাত মাছৰ উৎপাদন প্ৰায় ৪০ শতাংশতকৈও অধিক হ্ৰাস পাইছে। ইয়াৰ ফলত মাছমৰীয়াসকলৰ মাজত হতাশাৰ সৃষ্টি হোৱাৰ লগতে গ্ৰাহকেও অধিক মূল্যত মাছ ক্ৰয় কৰিবলগীয়া হৈছে।
এই সমূহীয়া মাছ ধৰা পৰ্ব আগন্তুক মাঘ বিহুৰ উৰুকা পৰ্যন্ত চলি থাকিব। উৎসৱ উপলক্ষে বিলৰ পাৰৰ শ্ৰীকৃষ্ণ মন্দিৰত আয়তীসকলে নাম-প্ৰসংগ পৰিৱেশন কৰি এক আধ্যাত্মিক পৰিৱেশৰো সূচনা কৰে।
