তিনি মাহৰ বাবে চাকৰিৰ কাৰ্যকাল বৃদ্ধি কৰা হ’ল বৰ্তমানৰ অসমৰ আৰক্ষী সঞ্চালক প্রধান কুলধৰ শইকীয়াৰ। নৰ্থ ইষ্ট নাওৰ সৈতে হোৱা কতা বতৰাত অসম আৰক্ষীৰ চিপিআৰঅ’ ৰাজীৱ শইকীয়াই এই কথা জানিবলৈ দিয়ে।
অহা ৩১ আগষ্টত অৰ্থ্যাৎ কাইলৈ অৱসৰ গ্ৰহণ কৰাৰ কথা আছিল আৰক্ষী সঞ্চালক প্ৰধানগৰাকীয়ে। শুকুৰবাৰে অনুষ্ঠিত কৰা সংবাদমেলতো শইকীয়াই কাইলৈ অৰ্থ্যাৎ ৩১ আগষ্টলৈকে তেওঁ অসম আৰক্ষীৰ মুখ্য কাৰ্য্যালয়ত থাকিব বুলি উল্লেখ কৰিছিল।
কিন্তু শুকুৰবাৰে সন্ধিয়াভাগত কেন্দ্ৰীয় গৃহ মন্ত্ৰণালয়ে এক জাননী যোগে শইকীয়াৰ কাৰ্য্যকাল আৰু তিনিমাহৰ বাবে বৃদ্ধি কৰাৰ কথা ঘোষণা কৰিছে।
এপইন্টমেন্ট কমিটি অব কেবিনেটে কেন্দ্ৰীয় গৃহ মন্ত্ৰনালয়ৰ প্ৰস্তাৱত অনুমোদন জনোৱা বুলি উক্ত জাননীখনত প্ৰকাশ পাইছে। কেন্দ্ৰীয় গৃহ মন্ত্ৰণালয়ে শইকীয়াৰ কাৰ্য্যকাল বৃদ্ধি কৰাৰ বাবে এপইন্টমেন্ট কমিটিৰ ওচৰত প্ৰস্তাৱ আগবঢ়াইছিল।
উক্ত জাননীখন কেন্দ্ৰীয় চৰকাৰৰ উপ সচিব স্মিতা সাৰাংগীৰ স্বাক্ষৰ সম্বলিত। কিন্তু বৰ্তমান পৰ্য্যন্ত তেওঁৰ সময়সীমা বৃদ্ধি কৰাৰ কাৰণ জানিব পৰা হোৱা নাই।
উল্লেখযোগ্য যে ১৯৮৫ চনতে আইপিএছ বিষয়া হিচাপে নিযুক্তি লাভ কৰিছিল ৰঙিয়াৰ কুলধৰ শইকীয়াই। ২০১৮ চনৰ ১ মে’ৰ পৰা অসম আৰক্ষীৰ সঞ্চালক প্ৰধান হিচাপে কুলধৰ শইকীয়াই কাৰ্য্যনিৰ্বাহ কৰি আহিছে।
ইফালে তেওঁৰ পাছতে প্ৰাক্তন আছু নেতা তপন ডেকাই অসম আৰক্ষীৰ সঞ্চালক প্ৰধান পদটো গ্ৰহণ কৰিব বুলিও চৰ্চা চলি আহিছে। ১৯৮৮ বৰ্ষৰ ভাৰতীয় আৰক্ষী সেৱাৰ বিষয়া ডেকা বৰ্তমান আই বিৰ উত্তৰ-পূবৰ যুটীয়া সঞ্চালক হিচাপে কৰ্মৰত।