মহানগৰ আৰক্ষীয়ে উপঢৌকন লোৱাৰ অভিযোগত বৃহস্পতিবাৰে মাজনিশা দিছপুৰ থানাৰ উপ-পৰিদৰ্শক গহিন পেগুক গ্ৰেপ্তাৰ কৰে।
জানিব পৰা মতে গহিন পেগুৱে এটা গোচৰৰ সংক্ৰান্তত দিছপুৰ থানা চৌহদত নিশা এজন বেংক বিষয়াৰ পৰা ধন লৈছিল আৰু সেই সময়তে মহানগৰ আৰক্ষীয়ে দিছপুৰ আৰক্ষীৰ সহায়ত পেগুক হাতে-লোটে ধৰা পেলায়।
উল্লেখ্য যে অনৈতিক কাৰ্যত লিপ্ত থকাৰ অভিযোগত অভিযুক্ত বেংক বিষয়াজনৰ গোচৰটো নিষ্পত্তি কৰাৰ বাবে আৰক্ষী বিষয়া পেগুৱে ৫০ হাজাৰ টকা বিচাৰিছিল।
কিন্তু আলোক কুমাৰ ঝা নামৰ বেংক বিষয়াজনে এই সমগ্ৰ বিষয়টো দুৰ্নীতি নিবাৰক শাখাক অৱগত কৰাত আৰক্ষীৰ দিহা অনুসৰি বৃহস্পতিবাৰে নিশা দিছপুৰ থানালৈ গৈ বিষয়া গৰাকীক ৫০ হাজাৰ টকা দিয়ে।
ইয়াৰ পিছতে মহানগৰ আৰক্ষীয়ে দিছপুৰ আৰক্ষীৰ সহায়ত টকাসহ উপ-পৰিদৰ্শক গহিন পেগুক গ্ৰেপ্তাৰ কৰি দিছপুৰ থানাত মাৰাথন জেৰা চলায়।
বৰ্তমান দিছপুৰ থানাৰ পৰা ধৃত পেগুক স্বাস্থ্য পৰীক্ষাৰ কাৰণে চিকিৎসালয়লৈ নিয়া হৈছে।
উল্লেখ্য যে ইয়াৰ পূৰ্বেও উপ-পৰিদৰ্শক পেগুৰ বিৰুদ্ধে এগৰাকী মহিলাৰ পৰা ধন দাবী কৰাৰ অভিযোগ আছিল।
আৰক্ষী বিষয়াজনে এজন অভিযুক্তৰ পৰা ৫০ হাজাৰ টকাৰ উৎকোচ লৈ বাছত উঠাই ঘৰলৈ পঠিয়াই দিয়াৰ অভিযোগ আনিছিল মহিলাগৰাকীয়ে।
এই অভিযোগ অনা মহিলা গৰাকী চানমালা বেগম আৰু অভিযুক্তগৰাকী ৰাজু অধিকাৰী বুলি জানিব পৰা যায়।
অধিকাৰীৰ বিৰুদ্ধে মহিলা গৰাকীয়ে প্ৰবঞ্চনাৰ অভিযোগ আনি দিছপুৰ থানাত ভাৰতীয় দণ্ড বিধিৰ ৪২০/৪০৬/২৯৪ ধাৰাত ১৫১৭/১৯ নম্বৰত এক গোচৰ ৰুজু কৰিছিল। আৰু সেই গোচৰৰ ভিত্তিত দিছপুৰ আৰক্ষীয়ে গ্ৰেপ্তাৰ কৰিছিল অধিকাৰীক।
কিন্তু গ্ৰেপ্তাৰৰ পাছতেই অভিযুক্ত অধিকাৰীৰ পৰা আৰক্ষী বিষয়া গহিন পেগুৱে ৫০ হাজাৰ উৎকোচ লৈ এৰি দিছিল।
