আমগুৰিৰ অভয়পুৰীয়া গাঁৱক হস্ততাঁতৰ আদৰ্শ গাওঁ হিচাপে ঘোষণা কৰিলে শিৱসাগৰ জিলা প্ৰশাসন আৰু জিলা হস্ততাতঁ বস্ত্ৰশিল্প বিভাগে।
শিৱসাগৰ জিলা প্ৰশাসন আৰু হস্ততাতঁ বস্ত্ৰশিল্প বিভাগে ম’ৰাবজাৰ গাওঁ পঞ্চায়তৰ অভয়পুৰীয়া গাঁৱলৈ আগবঢ়োৱা এই স্বীকৃতিৰ কথা বৃহস্পতিবাৰে ৰাজহুৱাভাৱে ঘোষণা কৰে জিলা উপায়ুক্ত ডাঃ এম এছ লক্ষ্মীপ্ৰিয়াই।
গ্ৰামাঞ্চলৰ মহিলাসকলে বোৱা-কটা কৰি আত্মনিৰ্ভৰশীল হোৱাৰ মানসেৰে গঠন কৰা আমগুৰিৰ অভয়পুৰীয়া শিল্প সমবায় নামৰ অনুষ্ঠানটোত হস্ততাঁত বস্ত্ৰশিল্প বিভাগৰ দ্বাৰা চলি থকা এমহীয়া (হস্ততাঁতৰ) এটা প্ৰশিক্ষণ শিবিৰৰ সামৰণি পৰে ৷
এই উপলক্ষে বৃহস্পতিবাৰে আয়োজিত ৰাজহুৱা সভাত সভাপতিত্ব কৰে হস্ততাঁত বস্ত্ৰশিল্প বিভাগৰ শিৱসাগৰৰ সহকাৰী সঞ্চালক ৰামকৃষ্ণ শৰ্মাই।
সভাত মুখ্য অতিথি ৰূপে অংশগ্ৰহণ কৰি জিলা উপায়ুক্তগৰাকীয়ে আগন্তুক ব’হাগ বিহুত অভয়পুৰীয়াৰ পৰা পঞ্চাশ হাজাৰ গামোচা উৎপাদন হোৱাৰ প্ৰত্যাশা কৰে ৷
সভাত অসম ৰাজ্যিক গ্ৰামীণ জীৱিকা অভিযানৰ জিলা প্রকল্প প্রৱন্ধক সুৰজ জ্যোতি গগৈ, ৰেচম বিভগৰ প্ৰকল্প বিষয়া মুনিন্দ্ৰ কুমাৰ বৰ্মন আৰু যথেষ্ট সংখ্যক স্থানীয় ৰাইজ উপস্থিত থাকে ৷
এই সভাতে পঞ্চাশ গৰাকী শিপিনীক সূতা বিতৰণ কৰা হয়।
উল্লেখযোগ্য যে, অভয়পুৰীয়া শিল্প সমবায়ৰ সম্পাদিকা অমিয়া নেওগ গগৈৰ পৰিকল্পনা আৰু এই অনুষ্ঠানৰ শিপিনী সকলৰ সহযোগত হস্ততাঁতৰ এক প্ৰদৰ্শনী অনুষ্ঠিত কৰা হয়৷