আজি কলিয়াবৰৰ বাণিজ্যিক কেন্দ্ৰ জখলাবন্ধাত কলিয়াবৰ মহকুমা প্ৰশাসনে উচ্ছেদ অভিযান চলাই। কলিয়াবৰ মহকুমা প্ৰশাসন আৰু জখলাবন্ধা আৰক্ষীয়ে ৰাতিপুৱাৰে পৰা অঞ্চলটোৰ বিভিন্ন অবৈধ দোকান-পোহাৰত বুলডজাৰেৰে তীব্ৰ অভিযান চলাই।
তথ্য অনুসৰি, বিগত ১৯ এপ্ৰিলত জখলাবন্ধাৰ প্ৰবীৰ ৰয় নামৰ এজন যুৱ ব্যৱসায়ীয়ে নিজৰ ব্যৱসায়িক প্ৰতিষ্ঠানৰ পৰা নিশা ঘৰলৈ ওভতি আহি থকাৰ সময়ত জখলাবন্ধাৰ পৰা চিকনি সংযোগী পথত এখন চুইফট ডিজায়াৰ গাড়ীয়ে তীব্ৰ বেগেৰ ব্যৱসায়ীজনক খুণ্ডা মাৰে আৰু এই দুৰ্ঘটনাটোত যুৱ ব্যৱসায়ীগৰাকীৰ মৃত্যু ঘটে।
ঘটনাটোৰ প্ৰতিবাদত ২০ এপ্ৰিলত জখলাবন্ধাৰ সকলো ব্যৱসায়ীয়ে লগ হৈ ৰাষ্ট্ৰীয় ঘাইপথ অৱৰোধ কৰি চিকনি-জখলাবন্ধা পথটো সম্প্ৰসাৰণৰ বাবে দাবী উত্থাপন কৰি তীব্ৰ প্ৰতিবাদ সাব্যস্ত কৰে।
প্ৰতিবাদকাৰী সকলক শান্ত কৰাৰ বাবে কলিয়াবৰ মহকুমাৰ কাৰ্যবাহী দণ্ডাধীশে পথটো অচিৰেই সম্প্ৰসাৰণ কৰা হ’ব বুলি আশ্বাস দিয়ে। এই আশ্বাসৰ প্ৰতিফলস্বৰূপে ২০ এপ্ৰিলত কলিয়াবৰ মহকুমাৰ কাৰ্যবাহী দণ্ডাধীশদ্বয় অমৰজ্যোতি নাথ ,বাৰ্বী হাজৰিকা আৰু জখলাবন্ধা আৰক্ষী চকীৰ ভাৰপ্ৰাপ্ত আৰক্ষী বিষয়াৰ নেতৃত্বত অঞ্চলটোত উচ্ছেদ অভিযান চলোৱা হয়।
জখলাবন্ধাৰ মাজেৰে যোৱা ৩৭ নং ৰাষ্ট্ৰীয় ঘাইপথৰ দুয়োকাষত বিগত বহু বছৰৰ পৰা অবৈধ পাৰ্কিং আৰু পদপথৰ ওপৰত বহুতো সৰু-বৰ ব্যৱসায়ী প্ৰতিষ্ঠান অনুমতিবিহীনভাবে গঢ়লৈ উঠাত সাধাৰণ জনতাই যাতায়তৰ ক্ষেত্ৰত দুৰ্ভোগৰ সন্মুখিন হ’বলগীয়া হৈ আহিছে।
আনহাতে, অবৈধ পাৰ্কিংৰ ফলত জখলাবন্ধাত ৩৭ নং ৰাষ্ট্ৰীয় ঘাইপথত যথেষ্ট যান-যতৰ সৃষ্টি হোৱাৰ লগতে পথ দুৰ্ঘটনাৰ সংখ্যা বাঢ়ি গৈ আছে। এনেবোৰ সমস্যা সমাধানৰ বাবে প্ৰশাসনে ২০ এপ্ৰিলত চলোৱা উচ্ছেদ অভিযানত একাংশ ব্যৱসায়ীয়ে বাধা প্ৰদান কৰি ইয়াৰ বাবে প্ৰশাসনৰ ফালৰ পৰা কিছুদিনৰ সময় বিচাৰে।
ৰাইজৰ দাবীৰ প্ৰতি সহাৰি জনাই প্ৰশাসনে সাময়িকভাবে উচ্ছেদ অভিযান বন্ধ ৰাখে যদিও স্থানীয় ব্যৱসায়ীসকলৰ লগত ২৫ এপ্ৰিলত অনুষ্ঠিত হোৱা প্ৰশাসনৰ আলোচনা মৰ্মে আজিৰ পৰা পুনৰ উচ্ছেদ অভিযান চলোৱাৰ সিদ্ধান্ত গ্ৰহণ কৰা হয়।