শিৱসাগৰ জিলাৰ কোভিড-১৯ পৰিস্থিতি নিয়ন্ত্ৰণ আৰু প্ৰতিৰোধ সন্দৰ্ভত শিৱসাগৰ জিলা প্ৰশাসনে হাতত লোৱা ব্যৱস্থাসমূহৰ লগতে আন আন যাৱতীয় প্ৰস্তুতিসমূহৰ বিষয়ে সোমবাৰে এক সংবাদমেল যোগে অৱগত কৰে জিলা উপায়ুক্ত বিষ্ণু কমল বৰাই।
তেওঁ জিলাখনত কোভিডত আক্ৰান্ত ৰোগীৰ বাবে বৰ্তমান ৩১২ খন বিচনা বিভিন্ন চিকিৎসালয়ত সাজু কৰা হৈছে বুলি জানিব দিয়ে। ইয়াৰে শিৱসাগৰ অসামৰিক চিকিৎসায়ত ১৩০ খন, ডিমৌ চক্ৰত ১২ খন, আমগুৰি চক্ৰত ২২ খন, অ’ এন জি চি চিকিৎসালয়ত ৩০ খন, লিগিৰীপুখৰীত ২০ খন আৰু ডিমৌ পলিটেকনিক প্ৰতিষ্ঠানৰ ক’ভিড কেয়াৰ চেণ্টাৰত ৮০ খন বিচনাৰ ব্যৱস্থা কৰা হৈছে। ইয়াৰে ৯৪ খন বিচনা বৰ্তমান কভিড আক্ৰান্ত ৰোগীৰ দ্বাৰা ভৰ্তি হৈ আছে।
জিলাখনৰ কোভিড-১৯ ৰোগত আক্ৰান্ত লোকসকলক অক্সিজেন চিলিণ্ডাৰ যোগান ধৰা বিষয়টো জিলা প্ৰশাসনে বিশেষ গুৰুত্ব প্ৰদান কৰি বৰ্তমান বি টাইপ অক্সিজেন চিলিণ্ডাৰ ১৬০ আৰু ২২ টা অক্সিজেন কনচেণ্ট্ৰৰ মজুত আছে বুলিও তেওঁ জানিবলৈ দিয়ে।
সেইদৰে চ্যুকাফা মাল্টি স্পেচিয়েলিটি চিকিৎসালয়ত ১৮ খন আৰু অ’ এন জি চি চিকিৎসালয়ত ৩০ খন বিচনা কোভিড ৰোগীৰ বাবে সাজু আছে বুলি সদৰী কৰি তেওঁ কয় যে, অক্সিজেন প্ৰদানৰ বাবে দৰকাৰী ৰেগুলেটৰ ইতিমধ্যে ব্যৱস্থা কৰা হৈছে। আনহাতে ব্যক্তিগত হস্পিটেলৰ লগতো যোগাযোগ কৰি মুঠ ৩০ খন বিচনা সাজু কৰা হৈছে বুলি জানিবলৈ দিয়ে জিলা উপায়ুক্ত গৰাকীয়ে।
এক মাৰ্চ তাৰিখৰ পৰা জিলাখনত মুঠ ১৪৩০ গৰাকী লোক কোভিড ৰোগত আক্ৰান্ত হোৱাৰ বিপৰীতে বৰ্তমান সক্ৰিয় ৰোগীৰ সংখ্যা হৈছে ৬৭৭ গৰাকী। ইয়াৰে ৫৭৩ গৰাকী হোম আইছলেচনত আছে।
প্ৰতিষেধক প্ৰদানৰ ক্ষেত্ৰত জিলাখনৰ মুঠ ৮৪,০৭৯ গৰাকী লোকক ইতিমধ্যে প্ৰতিষেধক প্ৰদান কৰা হৈছে বুলি উপায়ুক্ত গৰাকীয়ে উল্লেখ কৰে। ইয়াৰে ৪৯,৭৮৮ গৰাকী সাধাৰণ নাগৰিকে প্ৰথম পালি লোৱাৰ বিপৰীতে ১১,৪৫১ গৰাকীয়ে দ্বিতীয় পালি গ্ৰহণ কৰিছে।
আনহাতে জিলাখনত ইতিমধ্যে ৪৬,৫৩৫ গৰাকী লোকক ৰেপিড এন্টিজেন কভিড পৰীক্ষা কৰাৰ বিপৰীতে ৩৭৪৫ গৰাকী লোকক আৰটিপিচিআৰ কোভিড পৰীক্ষা সম্পন্ন কৰা হৈছে বুলি উপায়ুক্ত গৰাকীয়ে জানিব দিয়ে।
ইতিমধ্যে ৩০২ টা কণ্টেইনমেণ্ট জ’ন স্থাপন কৰা জিলাখনত এতিয়াও ২০১ টা কণ্টেইনমেণ্ট জ’ন বাহাল আছে। এই কণ্টেইনমেণ্ট জ’নসমূহৰ ১৯৬ টা পৰিয়ালক দৰকাৰী খাদ্য সামগ্ৰী প্ৰশাসনৰ তৰফৰ পৰা প্ৰদান কৰা হৈছে বুলিও উপায়ুক্ত গৰাকীয়ে সংবাদমেলত উল্লেখ কৰে। কোভিড-১৯ ৰোগত আক্ৰান্ত লোক সকলৰ অৱস্থা পৰ্যৱেক্ষণৰ বাবে আশাকৰ্মী/এএনএম/জিএনএমসকলক ৰোগীসকলৰ দৈনিক খবৰ লোৱাৰ এক ব্যৱস্থা কৰাৰ উপৰিও তেওঁলোকৰ মনোবল বৃদ্ধিৰ বাবে উপায়ুক্তকে ধৰি আন আন অতিৰিক্ত উপায়ুক্তসকলে ফোন কৰি এইসকল ৰোগীৰ খবৰ লোৱাৰ এক ব্যৱস্থা কৰিছে।
সংবাদমেলত অতিৰিক্ত উপায়ুক্ত (স্বাস্থ্য) চন্দনা বৰুৱা, অতিৰিক্ত উপায়ুক্ত বিতোপন নেওগ, স্বাস্থ্যসেৱাৰ যুটীয়া সঞ্চালক ডাঃ স্যমন্ত মাধৱ শৰ্মা, মুখ্য চিকিৎসা বিষয়া ডাঃ হেমন্ত বৰুৱা আৰু জিলা দুৰ্যোগ ব্যৱস্থাপনা প্ৰাধিকৰণৰ জিলা প্ৰকল্প বিষয়া ৰূপম বৰাও উপস্থিত থাকে।
