বিহাৰৰ ভোট গণনাৰ লগে লগে তামিলনাডুৰ ওপৰত গুৰুত্ব আৰোপ কৰা হৈছে। বংগৰ লগতে তামিনাডুত অহা বছৰৰ আৰম্ভণিতে নিৰ্বাচন অনুষ্ঠিত হ’ব। প্ৰধানমন্ত্ৰী নৰেন্দ্ৰ মোদীয়ে বুধবাৰে তামিলনাডুলৈ গৈ কেইবাটাও উন্নয়নমূলক প্ৰকল্পৰ আধাৰশিলা স্থাপন কৰে। বুধবাৰে তেওঁ তাত এখন ৰাজহুৱা সভাও অনুষ্ঠিত কৰে। তামিলনাডু চৰকাৰকো তীব্ৰ আক্ৰমণ চলায়। মোদীৰ উপস্থিতিয়ে তামিলনাডুত বহু বিতৰ্কৰ সৃষ্টি কৰিছে। শাসকীয় ডি এম কে দলৰ এজন নেতাই প্ৰধানমন্ত্ৰীক নৰকাসুৰৰ সৈতে তুলনা কৰে।
বুধবাৰে এখন ৰাজহুৱা সভাত ডি এম কেৰ টেংকাছি দক্ষিণ জিলাৰ সম্পাদক জে জয়বালানে কয় যে, “মোদীয়ে আপোনালোকৰ ভোট চুৰি কৰিব বিচাৰিছে। তেওঁ আচলতে এজন নৰকাসুৰ। তেওঁৰ কাম শেষ হ‘লেহে তামিলনাডুৰ বিকাশ হ‘ব।” দৰাচলতে তামিলনাডু চৰকাৰে প্রস্তাৱ কৰা কেইবাটাও মেট্ৰ’ প্রকল্পত কেন্দ্রীয় চৰকাৰে অনুমোদন দিয়া নাই৷ যাৰ বাবে সমগ্ৰ ষ্টেলিন প্ৰশাসনে মোদীক সমালোচনা কৰিছে। সেই বিষয়ত কথা কৈ থাকোঁতে জয়বালানে ব্যক্তিগতভাৱে প্ৰধানমন্ত্ৰীক আক্ৰমণ কৰে। ডি এম কে নেতাগৰাকীয়ে প্ৰধানমন্ত্ৰীগৰাকীক হিন্দু পৌৰাণিক কাহিনীৰ অন্যতম দানৱ ‘নৰকাসুৰ’ৰ সৈতে তুলনা কৰে।
স্বাভাৱিকতে তেওঁৰ এই মন্তব্যই তামিলনাডুৰ ৰাজনীতিত বিতৰ্কৰ সৃষ্টি কৰিছে। ইয়াৰ পূৰ্বেও কেইবাবাৰো তামিলভূমিৰ পৰা ব্যক্তিগতভাৱে আক্ৰমণ কৰা হৈছে মোদীক। বিজেপিৰ মতে ডি এম কে শাসনত ঘৃণামূলক ভাষণ স্বাভাৱিক হৈ পৰিছে, আৰু তাৰ বাবেই নেতাসকলে প্ৰধানমন্ত্ৰীক মুকলিকৈ ভাবুকি দিছে। এই মন্তব্যৰ সন্দৰ্ভত আনুষ্ঠানিকভাৱে কোনো প্ৰত্যুত্তৰ দিয়া নাই ডি এম কে-এ। কিন্তু ইতিহাসে প্রকাশ কৰিছে যে প্রধানমন্ত্রীক যেতিয়াই ব্যক্তিগতভাৱে আক্রমণ কৰা হৈছে, তেতিয়াই বিৰোধী শিবিৰে ভোট হেৰুৱাইছে৷ এতিয়া তামিলনাডুত কি হয় সেয়া হ’ব লক্ষ্যণীয়।
