প্ৰচণ্ড গৰমৰ দিনকেইটাত বাহিৰৰ পৰা ঘৰলৈ উভতি আহি এগিলাচ বৰফৰ দৰে ঠাণ্ডা পানী খালে মন-প্ৰাণ জুৰ পৰি যায়। গৰমকালি ফ্ৰীজৰ ঠাণ্ডা পানী খোৱাৰ এই অভ্যাস বহু লোকৰে থাকে। সাময়িকভাৱে ই শৰীৰক আৰাম দিয়ে যদিও চিকিৎসকসকলৰ মতে অতিৰিক্ত ঠাণ্ডা পানী খোৱাৰ এই অভ্যাসে শৰীৰৰ বাবে মাৰাত্মক ক্ষতি কঢ়িয়াই আনিব পাৰে। তীব্ৰ গৰমত অত্যাধিক ঠাণ্ডা পানী খালে কি কি স্বাস্থ্যজনিত সমস্যা হ’ব পাৰে সেই বিষয়ে সকলোৱে জনাটো অতি প্ৰয়োজনীয়।
গৰমত বাহিৰৰ পৰা অহাৰ পিছতে হঠাত ঠাণ্ডা পানী খালে আমাৰ পাকস্থলী বা পৰিপাক তন্ত্ৰৰ ওপৰত ইয়াৰ প্ৰত্যক্ষ প্ৰভাৱ পৰে। ঠাণ্ডা পানীয়ে আমাৰ শৰীৰৰ ৰক্তনলীবোৰ সংকুচিত কৰি পেলায়। ইয়াৰ ফলত খাদ্য হজম হোৱাৰ প্ৰক্ৰিয়াটো লেহেমীয়া হৈ পৰে। চিকিৎসকসকলৰ মতে ইয়াৰ বাবে কোষ্ঠকাঠিন্য, পেট ফুলা বা বদহজমৰ দৰে মাৰাত্মক সমস্যাই দেখা দিব পাৰে।
বিভিন্ন গৱেষণাত দেখা গৈছে যে অতিৰিক্ত ঠাণ্ডা পানী খালে শৰীৰৰ ভেগাছ স্নায়ু উত্তেজিত হৈ পৰিব পাৰে। এই স্নায়ুটো আমাৰ শৰীৰৰ স্নায়ুতন্ত্ৰৰ এটা অতি গুৰুত্বপূৰ্ণ অংশ, যিয়ে হৃদস্পন্দন নিয়ন্ত্ৰণ কৰাত সহায় কৰে। বৰফৰ দৰে ঠাণ্ডা পানীয়ে এই স্নায়ুক হঠাত ঠাণ্ডা কৰি পেলায়, যাৰ ফলত হৃদস্পন্দন বা হাৰ্ট ৰেট হঠাত কৰি যোৱাৰ আশংকা থাকে।
গৰমৰ মাজত হঠাত খুব ঠাণ্ডা পানী খালে হাওঁফাওঁত অতিৰিক্ত শ্লেষ্মা জমা হ’বলৈ ধৰে। ফলত শ্বাসনলীত সংক্ৰমণ হোৱাৰ সম্ভাৱনা থাকে। যিসকল লোক ইতিমধ্যে ছাইনাছ বা মাইগ্ৰেণৰ সমস্যাত ভুগি আছে, তেওঁলোকৰ বাবে ঠাণ্ডা পানী খোৱাৰ ফলত এই সমস্যা আৰু অধিক বৃদ্ধি পাব পাৰে। ইয়াৰ উপৰি ডিঙিৰ বিষ, চৰ্দি আৰু কাহৰ দৰে সমস্যা হোৱাটো অতি স্বাভাৱিক হৈ পৰে।
যেতিয়া আমি প্ৰচণ্ড ৰ’দৰ পৰা ঘৰলৈ আহোঁ, তেতিয়া আমাৰ শৰীৰৰ উষ্ণতা যথেষ্ট বেছি থাকে। এই অৱস্থাত হঠাত বৰফৰ দৰে ঠাণ্ডা পানী খালে শৰীৰৰ ভিতৰৰ স্বাভাৱিক উষ্ণতাৰ ভাৰসাম্য হেৰাই যায়। বিজ্ঞানৰ ভাষাত ইয়াক থাৰ্মেল শ্বক বুলি ক’ব পাৰি। ইয়াৰ ফলত শৰীৰৰ ৰোগ প্ৰতিৰোধ ক্ষমতা দুৰ্বল হৈ পৰে আৰু মানুহ অতি সোনকালে বেমাৰত পৰিব পাৰে।
গৰমৰ দিনকেইটাত সুস্থ হৈ থাকিবলৈ চিকিৎসকসকলে ফ্ৰীজৰ ঠাণ্ডা পানী নোখাবলৈ পৰামৰ্শ দিয়ে। ইয়াৰ পৰিৱৰ্তে স্বাভাৱিক উষ্ণতাৰ পানী বা সামান্য ঠাণ্ডা পানী খোৱাটোৱেই আটাইতকৈ সুৰক্ষিত। এই সময়ত মাটিৰ কলহৰ পানী খোৱাটো শৰীৰৰ বাবে অতি লাভদায়ক, কাৰণ মাটিৰ কলহে প্ৰাকৃতিক উপায়েৰে পানী ঠাণ্ডা কৰি ৰাখে আৰু ই শৰীৰৰ কোনো ক্ষতি নকৰে। লগতে ৰ’দৰ পৰা অহাৰ লগে লগেই পানী নোখায় অন্ততঃ দহৰ পৰা পোন্ধৰ মিনিট সময় ফেনৰ তলত বহি শৰীৰৰ উষ্ণতা স্বাভাৱিক হোৱাৰ পিছতহে পানী খোৱা উচিত।
