মানুহৰ শৰীৰৰ পৰা ঘাম ওলোৱাটো এক স্বাভাৱিক নিয়ম। শৰীৰে গৰম অনুভৱ কৰিলে ঘাম ওলায় আৰু শৰীৰৰ উত্তাপ নিয়ন্ত্ৰিত কৰি ৰাখে৷ কিন্তু কিছুমান মানুহৰ অটোনমিক নাৰ্ভাচ চিষ্টেম অধিক সক্ৰিয় হোৱাৰ ফলত এনে লোকসকলে হাতৰ তলুৱাত, কপালত, কাষলতিৰ তলত আৰু দুই ভৰিত বেছিকৈ ঘামি নানান আহুকালৰ সন্মুখীন হয় আৰু হীনমান্যতাত ভোগে৷
কিছুমান পৰিয়ালৰ একাধিক লোকক এনে অৱস্থাত ভোগা দেখা যায় আৰু সেয়ে এই ৰোগত জেনেটিক কাৰণ জড়িত বুলি বিজ্ঞানীসকলে ঠাৱৰ কৰিছে। শৰীৰৰ নানাধৰণৰ ৰোগৰ ফলতো এনে অতিৰিক্ত ঘাম ওলোৱা অৱস্থাৰ সৃষ্টি হ’ব পাৰে৷
এনে অৱস্থাক Secondary Generalized Hyperhidrosis বুলিব পাৰি৷ আনহাতে কোনো ৰোগসংক্ৰান্তীয় কাৰণ নোহোৱাকৈ অতিৰিক্ত ঘাম ওলোৱা অৱস্থাক Primary Focal Hyperhidrosis বোলে৷
প্ৰাইমেৰী হাইপাৰহাইড্ৰচিচৰ বিশেষত্ব হ’ল –ইয়াৰ লক্ষণসমূহ সাধাৰণতে দুয়োফালে সমান হয়৷ ঘামে দৈনন্দিন জীৱনত ব্যাঘাত ঘটায়৷ সপ্তাহত কমেও এদিন অতিৰিক্তভাৱে ঘামে৷ সাধাৰণতে ২৫ বছৰ বয়সৰ আগতেই লক্ষণসমূহ পৰিস্ফুট হয়৷
সাধাৰণতে পৰিয়ালত একে লক্ষণ আন সদস্যৰো দেখা যায়৷ নিদ্ৰামগ্ন অৱস্থাত সাধাৰণতে ঘাম নোলায়৷ প্ৰাইমেৰী হাইপাৰহাইড্ৰচিচৰ আৰু কিছুমান লক্ষণীয় দিশ হ’ল— চিন্তা-দূৰ্ভাৱনা হ’লে গৰম-ঠাণ্ডা ব্যতিৰেকে বেছি ঘামে৷ আনকি কিছুমান দ্ৰব্যৰ ঘ্ৰাণেও ঘাম উলিওৱা অৱস্থা কৰিব পাৰে৷
কফি,নিকোটিন,গৰম মছলা আদিৰ সেৱনে বেছিকৈ ঘাম ওলিয়ায়৷ আকৌ ভেচলিন, গ্লিচাৰিন, লেচিথিন, প্ৰপাইলিন, গ্লাইকল আদিৰ ব্যৱহাৰে শৰীৰৰ পৰা বেছিকৈ ঘাম বাহিৰ কৰা দেখা যায়৷
বেছিকৈ ঘমা মানে কি?
এই সমস্যাটো সৰ্বসাধাৰণৰ বাবে অস্বস্তিকৰ আৰু আমনিদায়ক সমস্যা। কাষলতিৰ তলৰ ঘাম সচৰাচৰ কৈশোৰ অৱস্থাৰ পৰা আৰম্ভ হয়, কিন্তু হাতৰ তলুৱা আৰু ভৰিৰ তলুৱাৰ ঘাম তাৰ আগতেই শিশু অৱস্থাৰ পৰাই আৰম্ভ হোৱা দেখা যায়। চিকিৎসাৰ ব্যৱস্থা নল’হে এই সমস্যা গোটেই জীৱনজুৰি থাকে।
ঘৰ্ম গ্ৰন্থিৰ দ্বাৰা সৃষ্ট পনীয়া পদাৰ্থ ছালৰ ৰন্ধ্ৰৰে বাহিৰেলৈ ওলাই অহাকেই ঘাম বোলে। ঘৰ্ম গ্ৰন্থি চুঙা আকৃতিৰ গ্ৰন্থি, যি ছালৰ তলতেই থাকে। এই ঘৰ্ম গ্ৰন্থিয়েই ছালত থকা সৰু সৰু ৰন্ধ্ৰৰ মাজেৰে ছালৰ ওপৰলৈ ঘাম বাহিৰ কৰি দিয়ে।
শৰীৰে নিৰ্দিষ্ট পৰিমাণৰ বেছিকৈ ঘাম বাহিৰ কৰি দিয়াকেই ঘমা বুলি কোৱা হয়। সচৰাচৰ ঘামৰ সহায়ত শৰীৰে তাপ নিয়ন্ত্ৰণ কৰে।
বেছিকৈ ঘাম ওলোৱা মানেই শৰীৰত পানী কমি যোৱা। শৰীৰ নিৰ্জল নহ’বলৈ প্ৰচুৰ পানী খোৱা উচিত। কাষতলি তল বেছিকৈ ঘমা লোকে ঘামৰ দাগ লগা সমস্যা নহ’বলৈ ঘনাই পিন্ধা কাপোৰ ধোৱা উচিত। নহ’লে ঘামৰ লগত বীজাণুৰ সংক্ৰমণ ঘটি চৰ্মৰোগ আৰু দুৰ্গন্ধৰ সৃষ্টি কৰিব পাৰে।
যদি অত্যধিক ঘাম ওলাই, তেন্তে খোৱাৰ ওপৰত নিয়ন্ত্ৰণ ৰাখক:-
১. মচলাযুক্ত খাদ্য পৰিহাৰ কৰিব।
২.আপোনাৰ আহাৰত গৰম খাদ্য অন্তৰ্ভুক্ত নকৰিব।
৩.খালী পেটত প্ৰতিদিনে ১০ টা ভিজা কিচমিচ খাব।
৪.আহাৰত অত্যাধিক মিঠা সোৱাদযুক্ত খাদ্য নাৰাখিব।
