ডিমৌ আদৰ্শ চিকিৎসালয়ৰ চিকিৎসক ডাঃ সুৰজিত গিৰিৰ বিৰুদ্ধে দণ্ডাধীশ পৰীস্মিতা দিহিঙীয়াই অভব্য আচৰণ কৰাৰ অভিযোগ উত্থাপন হৈছে।
যাৰ বাবে চিকিৎসা সেৱাৰ পৰা অব্যাহতি বিচাৰি NHM কৰ্তৃপক্ষলৈ পত্ৰ প্ৰেৰণ কৰিছে ডিমৌ আদৰ্শ চিকিৎসালয়ৰ বিশিষ্ট সংজ্ঞাহাৰক বিশেষজ্ঞ, সৰ্প দংশৰ সামাজিক কৰ্মকৰ্তা ডাঃ সুৰজিত গিৰিয়ে।
এগৰাকী দণ্ডাধীশে অভব্য ব্যৱহাৰ, অপমান কৰাৰ বাবে এই সিদ্ধান্ত লোৱা বুলি সামাজিক মাধ্যমত সদৰি কৰিছে ডাঃ সুৰজিত গিৰিয়ে।
উল্লেখ্য যে, ১৮ বছৰে চিকিৎসা সেৱা আগবঢ়াই অহা ডাক্তৰ গিৰিয়ে ৩ হেজাৰো অধিক সাপে দংশন কৰা লোকক চিকিৎসা কৰি জীৱন দান দিছে। তদুপৰি সংজ্ঞাহাৰক হিচাপে ডাঃ গিৰিয়ে ৭০০০ ৰো অধিক অস্ত্ৰোপচাৰ কৰিছে ।
জানিব পৰা মতে, ২০০৮ চনত তেওঁ ডিমৌ আদৰ্শ চিকিৎসালয়ত এন আৰ এইছ এমৰ অধীনত ঠিকা ভিত্তিক চিকিৎসক হিচাপে যোগদান কৰিছিল।
আজিও ঠিকা ভিত্তিক চিকিৎসকৰ চাকৰিয়েই তেওঁ কৰি আহিছে এই চিকিৎসালয়খনত। তেওঁক লৈ কোনো ৰোগীৰ কেতিয়াও অভিযোগ নাছিল। চিকিৎসালয়খনৰ উৰ্ধতম কৰ্তৃপক্ষই তেওঁক তেওঁৰ সুবিধা অনুযায়ী চিকিৎসা সেৱা প্ৰদান আৰু কৰ্তব্য সম্পাদন কৰিবলৈ দিছিল।
যোৱা ১১ জুলাইত তেওঁ কৰ্তব্যৰত অৱস্থাত থাকোতেই চিকিৎসালয়খনলৈ এগৰাকী দণ্ডাধীশ আহিল। দণ্ডাধীশগৰাকীয়ে চিকিৎসক সুৰজিৎ গিৰীক মতাই নিলে এটা কোঠালৈ। থিয় কৰাই ৰাখিয়েই তেওঁক সুধিলে- ‘কৰ্তব্য কিয় ভালদৰে সম্পাদন কৰা নাই?’
কথাতো শুনি তেওঁ আচৰিত হ’ল। সেই সময়ত উক্ত স্থানত থকা চিকিৎসালয়খনৰ অধীক্ষক চিকিৎসকগৰাকী তথা আন জ্যেষ্ঠ চিকিৎসা বিষয়াসকলে এবাৰো নকলে যে তেওঁ কৰ্তব্যৰ প্ৰতি কেতিয়াও অবহেলা কৰা নাই।
চিকিৎসা সেৱাকে ধৰ্ম বুলি গ্ৰহণ কৰা চিকিৎসক গিৰীয়ে কথাটোত বৰ আঘাত পালে। কোনো চিকিৎসালয়ত চিকিৎসকৰ ডিউটি লিষ্ট বনাবলৈ দণ্ডাধীশ অহাৰ উদাহৰণ নাই। কিন্তু সেই চিকিৎসালয়খনলৈ এনেদৰে দণ্ডাধীশ আহি তেওঁক কৰা এই ব্যৱহাৰত মৰ্মাহত হৈ চিকিৎসক ডাঃ গিৰীয়ে এই সিদ্ধান্ত লয়।
উল্লেখ্য যে, ডাঃ সুৰজিৎ গিৰিক অপদস্থ কৰা বুলি অভিযোগ উঠা দণ্ডাধীশ পৰিস্মীতা দিহিঙীয়াক পূৰ্বেও নিয়ম উলংঘাৰ বাবে নিলম্বন কৰা হৈছিল। ২০২৪ চনৰ ২৫ ছেপ্টেম্বৰত দিয়া নিৰ্দেশ অনুসৰি শিৱসাগৰত নতুন পদবীলৈ বদলি হ’বলৈ অস্বীকাৰ কৰাৰ বাবে সেইসময়ত বোকাখাতৰ নিৰ্বাচনী বিষয়া হিচাপে কাৰ্যনিৰ্বাহ কৰা পৰিস্মিতা দিহিঙীয়াক চাকৰিৰ পৰা নিলম্বন কৰা হৈছিল। দিহিঙীয়াৰ এই কাৰ্যক কাৰ্যালয়ৰ শিষ্টাচাৰ বিঘ্নিত কৰা আৰু জনস্বাৰ্থত ব্যৰ্থ হোৱা বুলি গণ্য কৰা হৈছিল, যাৰ ফলত ৰাজ্যপালে তেওঁক অসম সেৱা (অনুশাসন আৰু আপীল) নিয়ম, ১৯৬৪ৰ অধীনত তৎক্ষণাত নিলম্বন কৰিছিল।
