কৰ’না ৰোগীৰ সংস্পৰ্শলৈ অহা হাস্পাতলৰ ডাক্তৰ-নাৰ্ছক কৰা হ’ল কোৱাৰেন্টাইন

দেশত ধাৰাবাহিক কৰ’না ভাইৰাছৰ দ্বাৰা সংক্ৰমিত ৰোগীৰ হাৰ বৃদ্ধি পোৱা দেখা গৈছে। কৰ’না ভাইৰাছৰ বিৰুদ্ধে ডাক্তৰ আৰু নাৰ্ছসকলে প্ৰত্যক্ষভাৱে যুদ্ধত অৱতীৰ্ণ হৈছে।

ইয়াৰ মাজতে দিল্লীৰ ৰাম মনোহৰ লোহিয়া হাস্পাতলত COVID-19ত আক্ৰান্ত ৰোগীৰ সংস্পৰ্শলৈ অহাৰ পাছত একাংশ ডাক্তৰ, নাৰ্ছ আৰু কিছু ৰোগীক কোৱাৰেন্টাইন কৰা হৈছে।

ৰাম মনোহৰ লোহিয়া হাস্পাতলৰ সূত্ৰই জানিবলৈ দিয়া মতে কেইজনমান জ্যেষ্ঠ চিকিৎসক আৰু নাৰ্ছক প্ৰট’কলৰ আধাৰত কোৱাৰেন্টাইন কৰা হৈছে।

তদুপৰি, কৰ্ত্যৱত নিয়োজিত কৰ্মীসকলকো নিজকে কোৱাৰেন্টাইন কৰিবলৈ কোৱা হৈছে।

এগৰাকী চিকিৎসা বিষয়াই জানিবলৈ দিয়া মতে হাস্পাতলখনত এজন সন্দেহজনক ৰোগীক এটা ৱাৰ্ডৰ পৰা আন এটা ৱাৰ্ডলৈ স্থানান্তৰ কৰা হৈছিল।

প্ৰথমতে কৰ’না ভাইৰাছ আক্ৰান্ত হোৱাৰ সন্দেহ কৰা ৰোগীজনক ১১নম্বৰ ৱাৰ্ডত ভৰ্তি কৰা হৈছিল যদিও পৰীক্ষাত নিগেটিভ ওলোৱাৰ পাছত ৰোগীজনক ৬নম্বৰ ৱাৰ্ডলৈ স্থানান্তৰিত কৰা হয়।

কিন্তু দ্বিতীয়বাৰ ৰোগীজনক পৰীক্ষা কৰাৰ পাছত COVID-19ৰ পজিটিভ পোৱা যায়। যাৰ বাবে ৰোগীজনক পুনৰ ১১নম্বৰ ৱাৰ্ডলৈ প্ৰেৰণ কৰা হয়।

উল্লেখ্য যে দিল্লীত কৰ’না ভাইৰাছৰ ৰোগী ধৰা পৰাৰে পৰা ৰাম মনোহৰ লোহিয়া হাস্পাতলত কৰ’না আক্ৰান্ত ৰোগীৰ চিকিৎসা কৰি অহা হৈছে। হাস্পাতলখনত COVID-19ৰ বাবে বিশেষ পৰীক্ষা আৰু চিকিৎসাৰ সুবিধা আছে।