ভিষ্টাৰাৰ এখন বিলাসী বিমান। নিৰ্ধাৰিত সূচী অনুসৰি বিমানখন অৱতৰণ কৰিব লাগিছিল গোৱাৰ ডাবোলিম বিমানবন্দৰত। পিছে হঠাতে ঘটিল এক অঘটন।
বিমানখন অৱতৰণ কৰাৰ ঠিক আগে আগে এয়াৰ ট্ৰেফিক কণ্ট্ৰ’লাৰে ৰাণৱে’ত দেখা পায় এটা কুকুৰ আৰু লগে লগে বিমানখনক সতৰ্ক কৰি দিয়ে। এনে পৰিস্থিতিত বিমানখন অৱতৰণ নকৰাকৈয়ে উভতাই নিয়ে পাইলটে।
সোমবাৰে বিয়লি সংঘটিত হয় এই ঘটনা। ডাবোলিম বিমানবন্দৰৰ ৰাণৱে’ত কুকুৰটো দেখা পোৱাৰ পিছতে পাইলটজনক কিছু সময়ৰ বাবে অপেক্ষা কৰিবলৈ কোৱা হৈছিল।
পিছে পাইলটজনে ইয়াৰ পৰিৱৰ্তে বিমানখন পুনৰ বাংগালুৰুলৈ উভতাই নিয়াটোৱেই উচিত হ’ব বুলি বিবেচনা কৰে বুলি গোৱা বিমানবন্দৰৰ সঞ্চালকগৰাকীয়ে সংবাদ মাধ্যমৰ আগত অৱগত কৰে।
সূচী অনুসৰি, বিমানখনে সোমবাৰে দিনৰ ১২.৫৫ বজাত বেংগালুৰুৰ কেম্পেগৌডা আন্তঃৰাষ্ট্ৰীয় বিমানবন্দৰৰ পৰা ৰাওনা হৈছিল যদিও বিয়লি ৩.০৫ বজাত পুনৰ উভতি বাংগালুৰত উপস্থিত হৈছিল।
অৱশ্যে পিছত বিমানখন পুনৰ সন্ধিয়া ৪.৫৫ বজাত বেংগালুৰুৰ পৰা উৰা মাৰি সন্ধিয়া ৬.১৫ বজাত গোৱাত উপস্থিত হয় বুলি গোৱা বিমানবন্দৰ কৰ্তৃপক্ষই জানিবলৈ দিয়ে।
