সাধাৰণ জনতাৰ মূৰত মূল্যবৃদ্ধিৰ বোজা জাপি দি চৰকাৰে ঘৰুৱা ৰন্ধন গেছৰ (এল পি জি) চিলিণ্ডাৰৰ মূল্য ২৯ টকা বৃদ্ধি কৰিছে।
নতুন হাৰ অনুসৰি দিল্লীত ১৪.২ কিলোগ্ৰাম ওজনৰ ঘৰুৱা এল পি জি চিলিণ্ডাৰৰ মূল্য এতিয়া ৯১৩ টকাৰ পৰিৱৰ্তে ৯৪২ টকা। আনহাতে, গুৱাহাটীত ঘৰুৱা ৰন্ধন গেছৰ চিলিণ্ডাৰৰ মূল্য ৯৯১ টকা হ’ল। ইয়াৰ আগেয়ে গুৱাহাটীত ইয়াৰ দাম আছিল ৯৬২ টকা। সংশোধিত মূল্য তৎক্ষণাত কাৰ্যকৰী হ’ব।
যোৱা তিনিমাহৰ ভিতৰত এয়া দ্বিতীয়টো মূল্যবৃদ্ধি। ইয়াৰ পূৰ্বে ৭ মাৰ্চত চৰকাৰে ঘৰুৱা এল পি জি চিলিণ্ডাৰৰ মূল্য ৬০ টকা বৃদ্ধি কৰিছিল। এই একেৰাহে দ্বিতীয়বাৰৰ বাবে দাম বৃদ্ধিয়ে ঘৰুৱা গ্ৰাহকৰ মাহিলী বাজেটৰ ওপৰত অতিৰিক্ত বোজা জাপি দিব।
উদ্যোগৰ সূত্ৰ অনুসৰি পশ্চিম এছিয়াত চলি থকা ভূ-ৰাজনৈতিক উত্তেজনা আৰু বিশ্বৰ ইন্ধন বজাৰত অস্থিৰতাৰ বাবে এল পি জিৰ ব্যয় ক্ৰমাগতভাৱে বৃদ্ধি পাইছে।
আমেৰিকা-ইৰাণৰ উত্তেজনা আৰু অঞ্চলটোৰ সামুদ্ৰিক যোগান পথৰ প্ৰতি ক্ৰমাৎ বৃদ্ধি পোৱা সংকটে আন্তঃৰাষ্ট্ৰীয় বজাৰত ইন্ধনৰ মূল্য উৰ্ধমুখী কৰি ৰাখিছে, যাৰ ফলত ঘৰুৱা বজাৰতো তাৰ প্ৰভাৱ পৰিছে।
সূত্ৰসমূহে জনোৱা মতে, মাৰ্চ মাহত মূল্যবৃদ্ধিৰ পিছতো চৰকাৰী খণ্ডৰ তেল বিপণন কোম্পানীসমূহে ঘৰুৱা এল পি জি বিক্ৰীৰ ক্ষেত্ৰত যথেষ্ট লোকচানৰ সন্মুখীন হৈছিল।
এল পি জিৰ এই মূল্যবৃদ্ধিৰ সময়তে আন ইন্ধনৰ মূল্যও বৃদ্ধি পাইছে। মে’ মাহৰ মাজভাগৰ পৰা পেট্ৰ’ল আৰু ডিজেলৰ মূল্য মুঠতে প্ৰায় ৭.৫০ টকা প্ৰতি লিটাৰত বৃদ্ধি পাইছে, আনহাতে চিএনজিৰ মূল্যও প্ৰায় ৬ টকা প্ৰতি কিলোগ্ৰাম বৃদ্ধি পাইছে।
উদ্যোগৰ সূত্ৰ অনুসৰি শেহতীয়াকৈ মূল্য সংশোধন হোৱাৰ পিছতো চৰকাৰী তেল কোম্পানীসমূহে পেট্ৰ’ল আৰু ডিজেল বিক্ৰীৰ ক্ষেত্ৰত চাপৰ সন্মুখীন হৈছে। অনুমান কৰা হৈছে যে কোম্পানীসমূহে পেট্ৰ’লত প্ৰতি লিটাৰত প্ৰায় ১১ টকা আৰু ডিজেলত প্ৰতি লিটাৰত ৩৩.৬ টকা লোকচানত ভুগিছে।
