মাৰ্কিন ৰাষ্ট্ৰপতি ড’নাল্ড ট্ৰাম্পক ২০২১ বৰ্ষৰ শান্তিৰ ন’বেল বঁটাৰ বাবে মনোনীত কৰা হৈছে।
সংযুক্ত আৰৱ আমিৰশ্বাহী আৰু ইজৰাইলৰ মাজত স্বাক্ষিৰত ‘ঐতিহাসিক শান্তি চুক্তি’ত ট্ৰাম্পে লোৱা ভূমিকাৰ বাবে নৰৱেৰ সোঁপন্থী ৰাজনীতিক টাইব্ৰিং গেজড্ডেই ২০২১ বৰ্ষৰ শান্তি ন’বেল বঁটাৰ বাবে মনোনীত কৰিছে।
ফক্স-নিউজৰ এক সাক্ষাৎকাৰত টাইব্ৰিঙে কয়, “তেওঁ যোগ্য। মই ভাবো শান্তিৰ ন’বেল বঁটাৰ বাবে মনোনীত অনান্য প্ৰাৰ্থীতকৈ শান্তিৰ প্ৰতিষ্ঠাৰ বাবে তেওঁ (ট্ৰাম্প) বেছি চেষ্টা কৰি আহিছে।”
ট্ৰাইবিঙৰ মতে বিশ্বত শান্তি প্ৰতিষ্ঠা কৰাৰ ক্ষেত্ৰত মাৰ্কিন ৰাষ্ট্ৰপতি ড’নাল্ড ট্ৰাম্পে যথেষ্ট পৰিমাণে চেষ্টা কৰি আহিছে।
ট্ৰাম্পৰ মনোনয়ন পত্ৰখনত টাইব্ৰিঙে ইজৰাইল আৰু ইউ এ ইৰ মাজত শান্তি প্ৰতিষ্ঠাৰ বাবে লোৱা উদ্যোগৰ সৱিশেষ তথ্য দাঙি ধৰিছে।
“আশা কৰা হৈছে মধ্য প্ৰাচ্যৰ দেশসমূহে ইউ এ ইৰ পদাঙ্ক অনুসৰণ কৰিব। মধ্য প্ৰাচ্যৰ দেশসমূহে এই চুক্তিক সহযোগিতা কৰিলে ই মধ্য প্ৰাচ্যক এক সমৃদ্ধ অঞ্চললৈ পৰিণত কৰিব।” টাইব্ৰিঙে কয়।
ট্ৰাম্পৰ উদ্যোগত স্বাক্ষিৰত এই চুক্তিৰ চৰ্তাৱলীয়ে ইউ এ ই-ৰে একাধিক বাণিজ্য চুক্তি স্বাক্ষৰ কৰি ইজৰাইলৰ সৈতে ইয়াৰ সম্পৰ্ক স্বাভাৱিক কৰি তুলিব আৰু মধ্য প্ৰাচ্যত পশ্চিমৰ বিতৰ্কিত অংশীদাৰিত্ব সম্পৰ্কীয় পৰিকল্পনাক ৰুদ্ধ কৰিব বুলিও টাইব্ৰিঙে কয়।
টাইব্ৰিঙে উত্তৰ কোৰিয়াৰ শাসক কিম উন জঙৰ সৈতে মাৰ্কিন ৰাষ্ট্ৰপতি ট্ৰাম্পৰ আলোচনাক বিশ্বৰ এক ঐতিহাসিক আৰু গতিশীল পদক্ষেপ বুলিও মন্তব্য কৰিছে।
টাইব্ৰিঙে আশা প্ৰকাশ কৰিছে যে ন’বেল কমিটিয়ে ট্ৰাম্পৰ শান্তিৰ পক্ষে লোৱা সকলো পদক্ষেপক বিবেচনা কৰি সঠিক সিদ্ধান্ত গ্ৰহণ কৰিব।
উল্লেখ্য যে, আমেৰিকাৰ প্ৰাক্তন ৰাষ্ট্ৰপতি বাৰাক ওবামা, উড্ৰো উইলচন, জিমি কাৰ্টাৰ আৰু থিওডোৰ ৰুজভেল্টে ইতিমধ্যে শান্তিৰ ন’বেল বঁটা লাভ কৰিছিল।
স্মৰ্তব্য যে, উত্তৰ কোৰিয়াৰ পাৰমাণৱিক শস্ত্ৰ পৰীক্ষণ স্থগিত ৰখাত লোৱা ভূমিকাৰ বাবে ২০১৮ চনতো ড’নাল্ড ট্ৰাম্পক শান্তিৰ ন’বেল বঁটাৰ বাবে মনোনীত কৰা হৈছিল।
