শেহতীয়াকৈ প্ৰাক্তন ৰাষ্ট্ৰপতি জো বাইডেনৰ নিৰাপত্তাৰ অনুমতি পত্ৰ বাতিল কৰাৰ লগে লগে আমেৰিকাৰ ৰাজনীতিত এক নতুন উত্তেজনাৰ সৃষ্টি হৈছে। ইয়াৰ আঁৰতো বৰ্তমানৰ ৰাষ্ট্ৰপতি ড’নাল্ড ট্ৰাম্প। ২০২১ চনত যেতিয়া বাইডেন ক্ষমতালৈ আহিছিল তেতিয়া তেওঁ ট্ৰাম্পৰ নিৰাপত্তাৰ অনুমতি পত্ৰ বাতিল কৰিছিল, যাৰ ফলত বৰ্তমানৰ ৰাষ্ট্ৰপতি ট্ৰাম্পে বাইডেনৰ নিৰাপত্তাৰ অনুমতি পত্ৰ বাতিল কৰি প্ৰতিশোধ ল’লে।
২০২১ চনত কাৰ্যভাৰ গ্ৰহণ কৰাৰ পিছত বাইডেনে ট্ৰাম্পৰ নিৰাপত্তাৰ অনুমতি পত্ৰ বাতিল কৰিছিল। ইয়াৰ আঁৰৰ যুক্তি আছিল আমেৰিকাৰ কেপিটেল আক্ৰমণত ট্ৰাম্পৰ ভূমিকা, যিয়ে তেওঁক আৰু অধিক সতৰ্ক কৰি তুলিছিল।
সেই সময়ত বাইডেনে কৈছিল, “ট্ৰাম্পৰ (ড’নাল্ড ট্ৰাম্প) আচৰণে প্ৰমাণ কৰে যে তেওঁ আৰু গোপনীয় চোৰাংচোৱা তথ্য লাভ কৰাৰ যোগ্য নহয়।” ইয়াৰ পিছত ট্ৰাম্পক আৰু গোপনীয় তথ্যৰ সৈতে জড়িত কৰি ৰখা হোৱা নাছিল। কিন্তু এইবাৰ ২০২৫ চনত যেতিয়া ট্ৰাম্প পুনৰ ক্ষমতালৈ আহিল, তেওঁ বাইডেনৰ বিৰুদ্ধে প্ৰতিশোধ ল’লে।
ট্ৰাম্পে নিজৰ ছ’চিয়েল মিডিয়া প্লেটফৰ্মত পোনপটীয়াকৈ লিখিছে, ‘বাইডেনৰ গোপন তথ্য এতিয়া আৰু লাভ কৰাৰ প্ৰয়োজন নাই। আমি এই ক্ষেত্ৰত তেওঁৰ নিৰাপত্তাৰ অনুমতি পত্ৰ বাতিল কৰিছো।” তেনে কৰি তেওঁ বাইডেনক প্ৰত্যাহ্বান জনায়, ঠিক যেনেকৈ ২০২১ চনত বাইডেনে তেওঁৰ বিৰুদ্ধে সিদ্ধান্ত লৈছিল। ট্ৰাম্পে লগতে কয় যে প্ৰতিবেদনত দেখা গৈছে যে ‘’বাইডেনৰ স্মৃতিশক্তি অতি কম। গোপন ত্থ্যক লৈ তেওঁক আৰু ভৰসা কৰিব নোৱাৰি।‘’ এই মন্তব্যৰে তেওঁ বাইডেনক এক প্ৰকাৰৰ তিৰ্যক কটু মন্তব্য কৰিলে।
২০২৫ চনত ট্ৰাম্পৰ ক্ষমতালৈ ঘূৰি অহা আৰু বাইডেনৰ নিৰাপত্তাৰ অনুমতি পত্ৰ বাতিলৰ সিদ্ধান্তই আমেৰিকাৰ ৰাজনৈতিক মহলত যথেষ্ট আলোড়নৰ সৃষ্টি কৰিছে। ৰিপাব্লিকান নেতা ট্ৰাম্পে দাবী কৰিছে যে তেওঁ কেতিয়াও আমেৰিকাৰ ৰাষ্ট্ৰীয় নিৰাপত্তাৰ সৈতে খেলা নকৰে আৰু নিজৰ দেশৰ স্বাৰ্থত পৰম সাৱধানতা অৱলম্বন কৰিব। এই পদক্ষেপৰ জৰিয়তে ট্ৰাম্পে এক শক্তিশালী বাৰ্তা প্ৰেৰণ কৰে যে তেওঁৰ মতে বাইডেনে গোপনীয় তথ্য লাভ কৰাৰ কোনো প্ৰয়োজন নাই।
বাইডেনৰ সৈতে এই ৰাজনৈতিক সংঘাতৰ আঁৰত আছে আৰু বহুত বেছি পটভূমি। আমেৰিকাৰ প্ৰাক্তন ৰাষ্ট্ৰপতিসকলে সাধাৰণতে গোপনীয় তথ্যৰ সুবিধা লাভ কৰে, কিন্তু তেওঁলোকৰ আচৰণ বা কৰ্মক্ষমতাৰ ওপৰত কোনো সন্দেহ থাকিলে সেই সুবিধা বাতিল কৰিব পাৰি। ট্ৰাম্পৰ এই পদক্ষেপ তেওঁৰ প্ৰতিশোধৰ অংশ হ’ব পাৰে, কিন্তু ইয়াক দেশৰ ৰাজনীতিত এক গুৰুত্বপূৰ্ণ মুহূৰ্ত হিচাপে দেখা গৈছে।
এই ঘটনাই অনাগত দিনত আৰু অধিক ৰাজনৈতিক উত্তেজনাৰ সৃষ্টি কৰিব নেকি, নে দুয়োৰে মাজত বুজাবুজি বা সমাধান হ’ব সেয়া লক্ষণীয় হ’ব৷ এই বিষয়টো আমেৰিকাৰ ৰাজনৈতিক ভৱিষ্যতৰ বাবে গুৰুত্বপূৰ্ণ হ’ব পাৰে।
